| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
4. பட²மனானாதித்தி²யஸுத்தவண்ணனா
4. Paṭhamanānātitthiyasuttavaṇṇanā
54. சதுத்தே² நானாதித்தி²யஸமணப்³ராஹ்மணபரிப்³பா³ஜகாதி எத்த² தரந்தி ஏதேன ஸங்ஸாரோக⁴ந்தி தித்த²ங், நிப்³பா³னமக்³கோ³. இத⁴ பன விபரீதவிபல்லாஸவஸேன தி³ட்டி²க³திகேஹி ததா² க³ஹிததி³ட்டி²த³ஸ்ஸனங் ‘‘தித்த²’’ந்தி அதி⁴ப்பேதங். தஸ்மிங் ஸஸ்ஸதாதி³னானாகாரே தித்தே² நியுத்தாதி நானாதித்தி²யா, நக்³க³னிக³ண்டா²தி³ஸமணா சேவ கட²கலாபாதி³ப்³ராஹ்மணா ச பொக்க²ரஸாதாதி³பரிப்³பா³ஜகா ச ஸமணப்³ராஹ்மணபரிப்³பா³ஜகா. நானாதித்தி²யா ச தே ஸமணப்³ராஹ்மணபரிப்³பா³ஜகா சாதி நானாதித்தி²யஸமணப்³ராஹ்மணபரிப்³பா³ஜகா.
54. Catutthe nānātitthiyasamaṇabrāhmaṇaparibbājakāti ettha taranti etena saṃsāroghanti titthaṃ, nibbānamaggo. Idha pana viparītavipallāsavasena diṭṭhigatikehi tathā gahitadiṭṭhidassanaṃ ‘‘tittha’’nti adhippetaṃ. Tasmiṃ sassatādinānākāre titthe niyuttāti nānātitthiyā, nagganigaṇṭhādisamaṇā ceva kaṭhakalāpādibrāhmaṇā ca pokkharasātādiparibbājakā ca samaṇabrāhmaṇaparibbājakā. Nānātitthiyā ca te samaṇabrāhmaṇaparibbājakā cāti nānātitthiyasamaṇabrāhmaṇaparibbājakā.
‘‘ஸஸ்ஸதோ அத்தா ச லோகோ சா’’திஆதி³னா பஸ்ஸந்தி ஏதாய, ஸயங் வா பஸ்ஸதி, ததா² த³ஸ்ஸனமத்தமேவ வாதி தி³ட்டி², மிச்சா²பி⁴னிவேஸஸ்ஸேதங் அதி⁴வசனங். ஸஸ்ஸதாதி³வஸேன நானா அனேகவிதா⁴ தி³ட்டி²யோ ஏதேஸந்தி நானாதி³ட்டி²கா. ஸஸ்ஸதாதி³வஸேனேவ க²மனங் க²ந்தி, ரோசனங் ருசி, அத்த²தோ ‘‘ஸஸ்ஸதோ அத்தா ச லோகோ சா’’திஆதி³னா (உதா³॰ 55) பவத்தோ சித்தவிபல்லாஸோ ஸஞ்ஞாவிபல்லாஸோ ச. ததா² நானா க²ந்தியோ ஏதேஸந்தி நானாக²ந்திகா, நானா ருசியோ ஏதேஸந்தி நானாருசிகா. தி³ட்டி²க³திகா ஹி புப்³ப³பா⁴கே³ ததா² ததா² சித்தங் ரோசெத்வா க²மாபெத்வா ச பச்சா² ‘‘இத³மேவ ஸச்சங் மோக⁴மஞ்ஞ’’ந்தி அபி⁴னிவிஸந்தி. அத² வா ‘‘அனிச்சங் நிச்ச’’ந்திஆதி³னா ததா² ததா² த³ஸ்ஸனவஸேன தி³ட்டி², க²மனவஸேன க²ந்தி, ருச்சனவஸேன ருசீதி ஏவங் தீஹிபி பதே³ஹி தி³ட்டி² ஏவ வுத்தாதி வேதி³தப்³பா³. நானாதி³ட்டி²னிஸ்ஸயனிஸ்ஸிதாதி ஸஸ்ஸதாதி³பரிகப்பவஸேன நானாவித⁴ங் தி³ட்டி²யா நிஸ்ஸயங் வத்து²ங் காரணங், தி³ட்டி²ஸங்கா²தமேவ வா நிஸ்ஸயங் நிஸ்ஸிதா அல்லீனா உபக³தா, தங் அனிஸ்ஸஜ்ஜித்வா டி²தாதி அத்தோ². தி³ட்டி²யோபி ஹி தி³ட்டி²க³திகானங் அபி⁴னிவேஸாகாரானங் நிஸ்ஸயா ஹொந்தி.
‘‘Sassato attā ca loko cā’’tiādinā passanti etāya, sayaṃ vā passati, tathā dassanamattameva vāti diṭṭhi, micchābhinivesassetaṃ adhivacanaṃ. Sassatādivasena nānā anekavidhā diṭṭhiyo etesanti nānādiṭṭhikā. Sassatādivaseneva khamanaṃ khanti, rocanaṃ ruci, atthato ‘‘sassato attā ca loko cā’’tiādinā (udā. 55) pavatto cittavipallāso saññāvipallāso ca. Tathā nānā khantiyo etesanti nānākhantikā, nānā ruciyo etesanti nānārucikā. Diṭṭhigatikā hi pubbabhāge tathā tathā cittaṃ rocetvā khamāpetvā ca pacchā ‘‘idameva saccaṃ moghamañña’’nti abhinivisanti. Atha vā ‘‘aniccaṃ nicca’’ntiādinā tathā tathā dassanavasena diṭṭhi, khamanavasena khanti, ruccanavasena rucīti evaṃ tīhipi padehi diṭṭhi eva vuttāti veditabbā. Nānādiṭṭhinissayanissitāti sassatādiparikappavasena nānāvidhaṃ diṭṭhiyā nissayaṃ vatthuṃ kāraṇaṃ, diṭṭhisaṅkhātameva vā nissayaṃ nissitā allīnā upagatā, taṃ anissajjitvā ṭhitāti attho. Diṭṭhiyopi hi diṭṭhigatikānaṃ abhinivesākārānaṃ nissayā honti.
ஸந்தீதி அத்தி² ஸங்விஜ்ஜந்தி உபலப்³ப⁴ந்தி. ஏகேதி ஏகச்சே. ஸமணப்³ராஹ்மணாதி பப்³ப³ஜ்ஜூபக³மேன ஸமணா, ஜாதியா ப்³ராஹ்மணா, லோகேன வா ஸமணாதி ச ப்³ராஹ்மணாதி ச ஏவங் க³ஹிதா. ஏவங்வாதி³னோதி ஏவங் இதா³னி வத்தப்³பா³காரேன வத³ந்தீதி ஏவங்வாதி³னோ. ஏவங் இதா³னி வத்தப்³பா³காரேன பவத்தா தி³ட்டி² ஏதேஸந்தி ஏவங்தி³ட்டி²னோ. தத்த² து³தியேன தி³ட்டி²க³திகானங் மிச்சா²பி⁴னிவேஸோ த³ஸ்ஸிதோ, பட²மேன தேஸங் யதா²பி⁴னிவேஸங் பரேஸங் தத்த² பதிட்டா²பனவஸேன வோஹாரோ.
Santīti atthi saṃvijjanti upalabbhanti. Eketi ekacce. Samaṇabrāhmaṇāti pabbajjūpagamena samaṇā, jātiyā brāhmaṇā, lokena vā samaṇāti ca brāhmaṇāti ca evaṃ gahitā. Evaṃvādinoti evaṃ idāni vattabbākārena vadantīti evaṃvādino. Evaṃ idāni vattabbākārena pavattā diṭṭhi etesanti evaṃdiṭṭhino. Tattha dutiyena diṭṭhigatikānaṃ micchābhiniveso dassito, paṭhamena tesaṃ yathābhinivesaṃ paresaṃ tattha patiṭṭhāpanavasena vohāro.
ஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி எத்த² லோகோதி அத்தா. ஸோ ஹி தி³ட்டி²க³திகேஹி லோகியந்தி எத்த² புஞ்ஞங் பாபங் தப்³பி³பாகா, ஸயங் வா காரகாதி³பா⁴வேன அபி⁴யுத்தேஹி லோகியதீதி லோகோதி அதி⁴ப்பேதோ. ஸ்வாயங் ஸஸ்ஸதோ அமரோ நிச்சோ து⁴வோதி யதி³த³ங் அம்ஹாகங் த³ஸ்ஸனங் இத³மேவ ஸச்சங் அவிபரீதங், அஞ்ஞங் பன அஸஸ்ஸதோதிஆதி³ பரேஸங் த³ஸ்ஸனங் மோக⁴ங் மிச்சா²தி அத்தோ². ஏதேன சத்தாரோபி ஸஸ்ஸதவாதா³ த³ஸ்ஸிதா ஹொந்தி. அஸஸ்ஸதோதி ந ஸஸ்ஸதோ, அனிச்சோ அது⁴வோ சவனத⁴ம்மோதி அத்தோ². ‘‘அஸஸ்ஸதோ’’தி ஸஸ்ஸதபா⁴வப்படிக்கே²பேனேவ உச்சே²தோ³ தீ³பிதோதி ஸத்தபி உச்சே²த³வாதா³ தீ³பிதா ஹொந்தி.
Sassato loko, idameva saccaṃ moghamaññanti ettha lokoti attā. So hi diṭṭhigatikehi lokiyanti ettha puññaṃ pāpaṃ tabbipākā, sayaṃ vā kārakādibhāvena abhiyuttehi lokiyatīti lokoti adhippeto. Svāyaṃ sassato amaro nicco dhuvoti yadidaṃ amhākaṃ dassanaṃ idameva saccaṃ aviparītaṃ, aññaṃ pana asassatotiādi paresaṃ dassanaṃ moghaṃ micchāti attho. Etena cattāropi sassatavādā dassitā honti. Asassatoti na sassato, anicco adhuvo cavanadhammoti attho. ‘‘Asassato’’ti sassatabhāvappaṭikkhepeneva ucchedo dīpitoti sattapi ucchedavādā dīpitā honti.
அந்தவாதி ஸபரியந்தோ பரிவடுமோ பரிச்சி²ன்னப்பமாணோ, ந ஸப்³ப³க³தோதி அத்தோ². ஏதேன ஸரீரபரிமாணோ அங்கு³ட்ட²பரிமாணோ அவயவபரிமாணோ பரமாணுபரிமாணோ அத்தாதி ஏவமாதி³வாதா³ த³ஸ்ஸிதா ஹொந்தி. அனந்தவாதி அபரியந்தோ, ஸப்³ப³க³தோதி அத்தோ². ஏதேன கபிலகணாதா³தி³வாதா³ தீ³பிதா ஹொந்தி.
Antavāti sapariyanto parivaṭumo paricchinnappamāṇo, na sabbagatoti attho. Etena sarīraparimāṇo aṅguṭṭhaparimāṇo avayavaparimāṇo paramāṇuparimāṇo attāti evamādivādā dassitā honti. Anantavāti apariyanto, sabbagatoti attho. Etena kapilakaṇādādivādā dīpitā honti.
தங் ஜீவங் தங் ஸரீரந்தி யங் ஸரீரங், ததே³வ ஜீவஸங்கா²தங் வத்து², யஞ்ச ஜீவஸங்கா²தங் வத்து², ததே³வ ஸரீரந்தி ஜீவஞ்ச ஸரீரஞ்ச அத்³வயங் ஸமனுபஸ்ஸதி. ஏதேன ஆஜீவகானங் விய ‘‘ரூபீ அத்தா’’தி அயங் வாதோ³ த³ஸ்ஸிதோ ஹோதி. அஞ்ஞங் ஜீவங் அஞ்ஞங் ஸரீரந்தி இமினா பன ‘‘அரூபீ அத்தா’’தி அயங் வாதோ³ த³ஸ்ஸிதோ.
Taṃ jīvaṃ taṃsarīranti yaṃ sarīraṃ, tadeva jīvasaṅkhātaṃ vatthu, yañca jīvasaṅkhātaṃ vatthu, tadeva sarīranti jīvañca sarīrañca advayaṃ samanupassati. Etena ājīvakānaṃ viya ‘‘rūpī attā’’ti ayaṃ vādo dassito hoti. Aññaṃ jīvaṃ aññaṃ sarīranti iminā pana ‘‘arūpī attā’’ti ayaṃ vādo dassito.
ஹோதி ததா²க³தோ பரங் மரணாதி எத்த² ததா²க³தோதி ஸத்தோ. தஞ்ஹி தி³ட்டி²க³திகோ காரகவேத³காதி³ஸங்கா²தங், நிச்சது⁴வாதி³ஸங்கா²தங் வா ததா²பா⁴வங் க³தோதி ததா²க³தோதி வோஹரதி, ஸோ மரணதோ இத⁴காயஸ்ஸ பே⁴த³தோ பரங் உத்³த⁴ங் ஹோதி, அத்தி² ஸங்விஜ்ஜதீதி அத்தோ². ஏதேன ஸஸ்ஸதக்³கா³ஹமுகே²ன ஸோளஸ ஸஞ்ஞீவாதா³ அட்ட² அஸஞ்ஞீவாதா³ அட்ட² ச நேவஸஞ்ஞீனாஸஞ்ஞீவாதா³ த³ஸ்ஸிதா ஹொந்தி. ந ஹோதீதி நத்தி² ந உபலப்³ப⁴தி. ஏதேன உச்சே²த³வாதோ³ த³ஸ்ஸிதோ. ஹோதி ச ந ச ஹோதீதி அத்தி² ச நத்தி² சாதி. ஏதேன ஏகச்சஸஸ்ஸதவாதா³ ஸத்த ஸஞ்ஞீவாதா³ ச த³ஸ்ஸிதா. நேவ ஹோதி ந ந ஹோதீதி இமினா பன அமராவிக்கே²பவாதோ³ த³ஸ்ஸிதோதி வேதி³தப்³ப³ங்.
Hoti tathāgato paraṃ maraṇāti ettha tathāgatoti satto. Tañhi diṭṭhigatiko kārakavedakādisaṅkhātaṃ, niccadhuvādisaṅkhātaṃ vā tathābhāvaṃ gatoti tathāgatoti voharati, so maraṇato idhakāyassa bhedato paraṃ uddhaṃ hoti, atthi saṃvijjatīti attho. Etena sassataggāhamukhena soḷasa saññīvādā aṭṭha asaññīvādā aṭṭha ca nevasaññīnāsaññīvādā dassitā honti. Na hotīti natthi na upalabbhati. Etena ucchedavādo dassito. Hoti ca na ca hotīti atthi ca natthi cāti. Etena ekaccasassatavādā satta saññīvādā ca dassitā. Neva hoti na na hotīti iminā pana amarāvikkhepavādo dassitoti veditabbaṃ.
இமே கிர தி³ட்டி²க³திகா நானாதே³ஸதோ ஆக³ந்த்வா ஸாவத்தி²யங் படிவஸந்தா ஏகதா³ ஸமயப்பவாத³கே ஸன்னிபதித்வா அத்தனோ அத்தனோ வாத³ங் பக்³க³ய்ஹ அஞ்ஞவாதே³ கு²ங்ஸெந்தா விவாதா³பன்னா அஹேஸுங். தேன வுத்தங் ‘‘தே ப⁴ண்ட³னஜாதா’’திஆதி³.
Ime kira diṭṭhigatikā nānādesato āgantvā sāvatthiyaṃ paṭivasantā ekadā samayappavādake sannipatitvā attano attano vādaṃ paggayha aññavāde khuṃsentā vivādāpannā ahesuṃ. Tena vuttaṃ ‘‘te bhaṇḍanajātā’’tiādi.
தத்த² ப⁴ண்ட³னங் நாம கலஹஸ்ஸ புப்³ப³பா⁴கோ³. ப⁴ண்ட³னஜாதாதி ஜாதப⁴ண்ட³னா. கலஹோதி கலஹோ ஏவ, கலஸ்ஸ வா ஹனநதோ கலஹோ த³ட்ட²ப்³போ³. அஞ்ஞமஞ்ஞஸ்ஸ விருத்³த⁴வாத³ங் ஆபன்னாதி விவாதா³பன்னா. மம்மக⁴ட்டனதோ முக²மேவ ஸத்தீதி முக²ஸத்தி, ப²ருஸவாசா. ப²லூபசாரேன விய ஹி காரணங் காரணூபசாரேன ப²லம்பி வோஹரியதி யதா² தங் ‘‘ஸுகோ² பு³த்³து⁴ப்பாதோ³, பாபகம்மங் பச்சனுபோ⁴தீ’’தி ச. தாஹி முக²ஸத்தீஹி விதுத³ந்தா விஜ்ஜ²ந்தா விஹரந்தி. ஏதி³ஸோ த⁴ம்மோதி த⁴ம்மோ அவிபரீதஸபா⁴வோ ஏதி³ஸோ ஏவரூபோ, யதா² மயா வுத்தங் ‘‘ஸஸ்ஸதோ லோகோ’’தி. நேதி³ஸோ த⁴ம்மோதி ந ஏதி³ஸோ த⁴ம்மோ , யதா² தயா வுத்தங் ‘‘அஸஸ்ஸதோ லோகோ’’தி, ஏவங் ஸேஸபதே³ஹிபி யோஜேதப்³ப³ங். ஸோ ச தித்தி²யானங் விவாதோ³ ஸகலனக³ரே பாகடோ ஜாதோ. அத² பி⁴க்கூ² ஸாவத்தி²ங் பிண்டா³ய பவிட்டா² தங் ஸுத்வா ‘‘அத்தி² நோ இத³ங் கதா²பாப⁴தங், யங் நூன மயங் இமங் பவத்திங் ப⁴க³வதோ ஆரோசெய்யாம, அப்பேவ நாம தங் நிஸ்ஸாய ஸத்து² ஸண்ஹஸுகு²மங் த⁴ம்மதே³ஸனங் லபெ⁴ய்யாமா’’தி தே பச்சா²ப⁴த்தங் த⁴ம்மதே³ஸனாகாலே ப⁴க³வதோ ஏதமத்த²ங் ஆரோசேஸுங். தேன வுத்தங் – ‘‘அத² கோ² ஸம்ப³ஹுலா பி⁴க்கூ²’’திஆதி³.
Tattha bhaṇḍanaṃ nāma kalahassa pubbabhāgo. Bhaṇḍanajātāti jātabhaṇḍanā. Kalahoti kalaho eva, kalassa vā hananato kalaho daṭṭhabbo. Aññamaññassa viruddhavādaṃ āpannāti vivādāpannā. Mammaghaṭṭanato mukhameva sattīti mukhasatti, pharusavācā. Phalūpacārena viya hi kāraṇaṃ kāraṇūpacārena phalampi vohariyati yathā taṃ ‘‘sukho buddhuppādo, pāpakammaṃ paccanubhotī’’ti ca. Tāhi mukhasattīhi vitudantā vijjhantā viharanti. Ediso dhammoti dhammo aviparītasabhāvo ediso evarūpo, yathā mayā vuttaṃ ‘‘sassato loko’’ti. Nediso dhammoti na ediso dhammo , yathā tayā vuttaṃ ‘‘asassato loko’’ti, evaṃ sesapadehipi yojetabbaṃ. So ca titthiyānaṃ vivādo sakalanagare pākaṭo jāto. Atha bhikkhū sāvatthiṃ piṇḍāya paviṭṭhā taṃ sutvā ‘‘atthi no idaṃ kathāpābhataṃ, yaṃ nūna mayaṃ imaṃ pavattiṃ bhagavato āroceyyāma, appeva nāma taṃ nissāya satthu saṇhasukhumaṃ dhammadesanaṃ labheyyāmā’’ti te pacchābhattaṃ dhammadesanākāle bhagavato etamatthaṃ ārocesuṃ. Tena vuttaṃ – ‘‘atha kho sambahulā bhikkhū’’tiādi.
தங் ஸுத்வா ப⁴க³வா அஞ்ஞதித்தி²யானங் த⁴ம்மஸ்ஸ அயதா²பூ⁴தபஜானநங் பகாஸெந்தோ ‘‘அஞ்ஞதித்தி²யா, பி⁴க்க²வே’’திஆதி³மாஹ. தத்த² அந்தா⁴தி பஞ்ஞாசக்கு²விரஹேன அந்தா⁴. தேனாஹ ‘‘அசக்கு²கா’’தி. பஞ்ஞா ஹி இத⁴ ‘‘சக்கூ²’’தி அதி⁴ப்பேதா. ததா² ஹி வுத்தங் ‘‘அத்த²ங் ந ஜானந்தீ’’திஆதி³. தத்த² அத்த²ங் ந ஜானந்தீதி இத⁴லோகத்த²ங் பரலோகத்த²ங் ந ஜானந்தி, இத⁴லோகபரலோகேஸு வுத்³தி⁴ங் அப்³பு⁴த³யங் நாவபு³ஜ்ஜ²ந்தி, பரமத்தே² பன நிப்³பா³னே கதா²வகா. யே ஹி நாம பவத்திமத்தேபி ஸம்மூள்ஹா, தே கத²ங் நிவத்திங் ஜானிஸ்ஸந்தீதி. அனத்த²ங் ந ஜானந்தீதி யத³க்³கே³ன தே அத்த²ங் ந ஜானந்தி, தத³க்³கே³ன அனத்த²ம்பி ந ஜானந்தி. யஸ்மா த⁴ம்மங் ந ஜானந்தி, தஸ்மா அத⁴ம்மம்பி ந ஜானந்தி. தே ஹி விபரியேஸக்³கா³ஹிதாய த⁴ம்மங் குஸலம்பி அகுஸலங் கரொந்தி, அத⁴ம்மம்பி அகுஸலங் குஸலங் கரொந்தி. ந கேவலஞ்ச த⁴ம்மாத⁴ம்மேஸு ஏவ, அத² கோ² தஸ்ஸ விபாகேஸுபி ஸம்மூள்ஹா. ததா² ஹி தே கம்மம்பி விபாகங் கத்வா வோஹரந்தி, விபாகம்பி கம்மங் கத்வா. ததா² த⁴ம்மங் ஸபா⁴வத⁴ம்மம்பி ந ஜானந்தி, அத⁴ம்மங் அஸபா⁴வத⁴ம்மம்பி ந ஜானந்தி. ஏவங்பூ⁴தா ச ஸபா⁴வத⁴ம்மங் அஸபா⁴வத⁴ம்மஞ்ச, அஸபா⁴வத⁴ம்மங் ஸபா⁴வத⁴ம்மஞ்ச கத்வா பவேதெ³ந்தி.
Taṃ sutvā bhagavā aññatitthiyānaṃ dhammassa ayathābhūtapajānanaṃ pakāsento ‘‘aññatitthiyā, bhikkhave’’tiādimāha. Tattha andhāti paññācakkhuvirahena andhā. Tenāha ‘‘acakkhukā’’ti. Paññā hi idha ‘‘cakkhū’’ti adhippetā. Tathā hi vuttaṃ ‘‘atthaṃ na jānantī’’tiādi. Tattha atthaṃ na jānantīti idhalokatthaṃ paralokatthaṃ na jānanti, idhalokaparalokesu vuddhiṃ abbhudayaṃ nāvabujjhanti, paramatthe pana nibbāne kathāvakā. Ye hi nāma pavattimattepi sammūḷhā, te kathaṃ nivattiṃ jānissantīti. Anatthaṃ na jānantīti yadaggena te atthaṃ na jānanti, tadaggena anatthampi na jānanti. Yasmā dhammaṃ na jānanti, tasmā adhammampi na jānanti. Te hi vipariyesaggāhitāya dhammaṃ kusalampi akusalaṃ karonti, adhammampi akusalaṃ kusalaṃ karonti. Na kevalañca dhammādhammesu eva, atha kho tassa vipākesupi sammūḷhā. Tathā hi te kammampi vipākaṃ katvā voharanti, vipākampi kammaṃ katvā. Tathā dhammaṃ sabhāvadhammampi na jānanti, adhammaṃ asabhāvadhammampi na jānanti. Evaṃbhūtā ca sabhāvadhammaṃ asabhāvadhammañca, asabhāvadhammaṃ sabhāvadhammañca katvā pavedenti.
இதி ப⁴க³வா தித்தி²யானங் மோஹதி³ட்டி²படிலாப⁴பா⁴வேன பஞ்ஞாசக்கு²வேகல்லதோ அந்த⁴பா⁴வங் த³ஸ்ஸெத்வா இதா³னி தமத்த²ங் ஜச்சந்தூ⁴பமாய பகாஸேதுங் ‘‘பூ⁴தபுப்³ப³ங், பி⁴க்க²வே’’திஆதி³மாஹ. தத்த² பூ⁴தபுப்³ப³ந்தி புப்³பே³ பூ⁴தங், அதீதகாலே நிப்³ப³த்தங். அஞ்ஞதரோ ராஜா அஹோஸீதி புராதனோ நாமகொ³த்தேஹி லோகே அபாகடோ ஏகோ ராஜா அஹோஸி. ஸோ ராஜா அஞ்ஞதரங் புரிஸங் ஆமந்தேஸீதி தஸ்ஸ கிர ரஞ்ஞோ ஸோப⁴க்³க³ப்பத்தங் ஸப்³ப³ங்க³ஸம்பன்னங் அத்தனோ ஓபவய்ஹங் ஹத்தி²ங் உபட்டா²னங் ஆக³தங் தி³ஸ்வா ஏதத³ஹோஸி – ‘‘ப⁴த்³த³கங் வத, போ⁴, ஹத்தி²யானங் த³ஸ்ஸனீய’’ந்தி. தேன ச ஸமயேன ஏகோ ஜச்சந்தோ⁴ ராஜங்க³ணேன க³ச்ச²தி. தங் தி³ஸ்வா ராஜா சிந்தேஸி – ‘‘மஹாஜானியா கோ² இமே அந்தா⁴ யே ஏவரூபங் த³ஸ்ஸனீயங் ந லப⁴ந்தி த³ட்டு²ங். யங்னூனாஹங் இமிஸ்ஸா ஸாவத்தி²யா யத்தகா ஜச்சந்தா⁴ ஸப்³பே³ தே ஸன்னிபாதாபெத்வா ஏகதே³ஸங் ஏகதே³ஸங் ஹத்தே²ன பு²ஸாபெத்வா தேஸங் வசனங் ஸுணெய்ய’’ந்தி. கேளிஸீலோ ராஜா ஏகேன புரிஸேன ஸாவத்தி²யா ஸப்³பே³ ஜச்சந்தே⁴ ஸன்னிபாதாபெத்வா தஸ்ஸ புரிஸஸ்ஸ ஸஞ்ஞங் அதா³ஸி ‘‘யதா² ஏகேகோ ஜச்சந்தோ⁴ ஸீஸாதி³கங் ஏகேகங்யேவ ஹத்தி²ஸ்ஸ அங்க³ங் பு²ஸித்வா ‘ஹத்தீ² மயா தி³ட்டோ²’தி ஸஞ்ஞங் உப்பாதே³ஸி, ததா² கரோஹீ’’தி. ஸோ புரிஸோ ததா² அகாஸி. அத² ராஜா தே ஜச்சந்தே⁴ பச்சேகங் புச்சி² ‘‘கீதி³ஸோ, ப⁴ணே, ஹத்தீ²’’தி. தே அத்தனா தி³ட்ட²தி³ட்டா²வயவமேவ ஹத்தி²ங் கத்வா வத³ந்தா ‘‘ஏதி³ஸோ ஹத்தீ², நேதி³ஸோ ஹத்தீ²’’தி அஞ்ஞமஞ்ஞங் கலஹங் கரொந்தா ஹத்தா²தீ³ஹி உபக்கமித்வா ராஜங்க³ணே மஹந்தங் கோலாஹலங் அகங்ஸு. ராஜா ஸபரிஜனோ தேஸங் தங் விப்பகாரங் தி³ஸ்வா பா²ஸுகேஹி பி⁴ஜ்ஜமானேஹி ஹத³யேன உக்³க³தேன மஹாஹஸிதங் ஹஸி. தேன வுத்தங் – ‘‘அத² கோ², பி⁴க்க²வே, ஸோ ராஜா…பே॰… அத்தமனோ அஹோஸீ’’தி.
Iti bhagavā titthiyānaṃ mohadiṭṭhipaṭilābhabhāvena paññācakkhuvekallato andhabhāvaṃ dassetvā idāni tamatthaṃ jaccandhūpamāya pakāsetuṃ ‘‘bhūtapubbaṃ, bhikkhave’’tiādimāha. Tattha bhūtapubbanti pubbe bhūtaṃ, atītakāle nibbattaṃ. Aññataro rājā ahosīti purātano nāmagottehi loke apākaṭo eko rājā ahosi. So rājā aññataraṃ purisaṃ āmantesīti tassa kira rañño sobhaggappattaṃ sabbaṅgasampannaṃ attano opavayhaṃ hatthiṃ upaṭṭhānaṃ āgataṃ disvā etadahosi – ‘‘bhaddakaṃ vata, bho, hatthiyānaṃ dassanīya’’nti. Tena ca samayena eko jaccandho rājaṅgaṇena gacchati. Taṃ disvā rājā cintesi – ‘‘mahājāniyā kho ime andhā ye evarūpaṃ dassanīyaṃ na labhanti daṭṭhuṃ. Yaṃnūnāhaṃ imissā sāvatthiyā yattakā jaccandhā sabbe te sannipātāpetvā ekadesaṃ ekadesaṃ hatthena phusāpetvā tesaṃ vacanaṃ suṇeyya’’nti. Keḷisīlo rājā ekena purisena sāvatthiyā sabbe jaccandhe sannipātāpetvā tassa purisassa saññaṃ adāsi ‘‘yathā ekeko jaccandho sīsādikaṃ ekekaṃyeva hatthissa aṅgaṃ phusitvā ‘hatthī mayā diṭṭho’ti saññaṃ uppādesi, tathā karohī’’ti. So puriso tathā akāsi. Atha rājā te jaccandhe paccekaṃ pucchi ‘‘kīdiso, bhaṇe, hatthī’’ti. Te attanā diṭṭhadiṭṭhāvayavameva hatthiṃ katvā vadantā ‘‘ediso hatthī, nediso hatthī’’ti aññamaññaṃ kalahaṃ karontā hatthādīhi upakkamitvā rājaṅgaṇe mahantaṃ kolāhalaṃ akaṃsu. Rājā saparijano tesaṃ taṃ vippakāraṃ disvā phāsukehi bhijjamānehi hadayena uggatena mahāhasitaṃ hasi. Tena vuttaṃ – ‘‘atha kho, bhikkhave, so rājā…pe… attamano ahosī’’ti.
தத்த² அம்போ⁴தி ஆலபனங். யாவதகாதி யத்தகா. ஜச்சந்தா⁴தி ஜாதியா அந்தா⁴, ஜாதிதோ பட்டா²ய அசக்கு²கா. ஏகஜ்ஜ²ந்தி ஏகதோ. ப⁴ணேதி அப³ஹுமானாலாபோ. ஹத்தி²ங் த³ஸ்ஸேஹீதி யதா²வுத்தங் ஹத்தி²ங் ஸயாபெத்வா த³ஸ்ஸேஹி. ஸோ ச ஸுஸிக்கி²தத்தா அபரிப்ப²ந்த³ந்தோ நிபஜ்ஜி. தி³ட்டோ² நோ ஹத்தீ²தி ஹத்தே²ன பராமஸனங் த³ஸ்ஸனங் கத்வா ஆஹங்ஸு. தேன புரிஸேன ஸீஸங் பராமஸாபெத்வா ‘‘ஏதி³ஸோ ஹத்தீ²’’தி ஸஞ்ஞாபிதத்தா தாதி³ஸங்யேவ நங் ஹத்தி²ங் ஸஞ்ஜானந்தா ஜச்சந்தா⁴ ‘‘ஏதி³ஸோ தே³வ ஹத்தீ² ஸெய்யதா²பி கும்போ⁴’’தி வதி³ங்ஸு. கும்போ⁴தி ச க⁴டோதி அத்தோ². கீ²லோதி நாக³த³ந்தகீ²லோ. ஸொண்டோ³தி ஹத்தோ². நங்க³லீஸாதி நங்க³லஸ்ஸ ஸிரஸ்ஸ ஈஸா. காயோதி ஸரீரங். கொட்டோ²தி குஸூலோ. பாதோ³தி ஜங்கோ⁴. தூ²ணோதி த²ம்போ⁴. நங்கு³ட்ட²ந்தி வாளஸ்ஸ உரிமப்பதே³ஸோ. வாலதீ⁴தி வாலஸ்ஸ அக்³க³ப்பதே³ஸோ. முட்டீ²ஹி ஸங்ஸும்பி⁴ங்ஸூதி முட்டி²யோ ப³ந்தி⁴த்வா பஹரிங்ஸு, முட்டி²கா⁴தங் அகங்ஸு. அத்தமனோ அஹோஸீதி கேளிஸீலத்தா ஸோ ராஜா தேன ஜச்சந்தா⁴னங் கலஹேன அத்தமனோ பஹாஸேன க³ஹிதமனோ அஹோஸி.
Tattha ambhoti ālapanaṃ. Yāvatakāti yattakā. Jaccandhāti jātiyā andhā, jātito paṭṭhāya acakkhukā. Ekajjhanti ekato. Bhaṇeti abahumānālāpo. Hatthiṃ dassehīti yathāvuttaṃ hatthiṃ sayāpetvā dassehi. So ca susikkhitattā aparipphandanto nipajji. Diṭṭho no hatthīti hatthena parāmasanaṃ dassanaṃ katvā āhaṃsu. Tena purisena sīsaṃ parāmasāpetvā ‘‘ediso hatthī’’ti saññāpitattā tādisaṃyeva naṃ hatthiṃ sañjānantā jaccandhā ‘‘ediso deva hatthī seyyathāpi kumbho’’ti vadiṃsu. Kumbhoti ca ghaṭoti attho. Khīloti nāgadantakhīlo. Soṇḍoti hattho. Naṅgalīsāti naṅgalassa sirassa īsā. Kāyoti sarīraṃ. Koṭṭhoti kusūlo. Pādoti jaṅgho. Thūṇoti thambho. Naṅguṭṭhanti vāḷassa urimappadeso. Vāladhīti vālassa aggappadeso. Muṭṭhīhi saṃsumbhiṃsūti muṭṭhiyo bandhitvā pahariṃsu, muṭṭhighātaṃ akaṃsu. Attamano ahosīti keḷisīlattā so rājā tena jaccandhānaṃ kalahena attamano pahāsena gahitamano ahosi.
ஏவமேவ கோ²தி உபமாஸங்ஸந்த³னங். தஸ்ஸத்தோ² – பி⁴க்க²வே, யதா² தே ஜச்சந்தா⁴ அசக்கு²கா ஏகங்க³த³ஸ்ஸினோ அனவஸேஸதோ ஹத்தி²ங் அபஸ்ஸித்வா அத்தனா தி³ட்டா²வயவமத்தங் ஹத்தி²ஸஞ்ஞாய இதரேஹி தி³ட்ட²ங் அனநுஜானந்தா அஞ்ஞமஞ்ஞங் விவாத³ங் ஆபன்னா கலஹங் அகங்ஸு, ஏவமேவ இமே அஞ்ஞதித்தி²யா ஸக்காயஸ்ஸ ஏகதே³ஸங் ரூபவேத³னாதி³ங் அத்தனோ தி³ட்டி²த³ஸ்ஸனேன யதா²தி³ட்ட²ங் ‘‘அத்தா’’தி மஞ்ஞமானா தஸ்ஸ ஸஸ்ஸதாதி³பா⁴வங் ஆரோபெத்வா ‘‘இத³மேவ ஸச்சங் மோக⁴மஞ்ஞ’’ந்தி அபி⁴னிவிஸித்வா அஞ்ஞமஞ்ஞங் விவத³ந்தி, யதா²பூ⁴தங் பன அத்தா²னத்த²ங் த⁴ம்மாத⁴ம்மஞ்ச ந ஜானந்தி. தஸ்மா அந்தா⁴ அசக்கு²கா ஜச்சந்த⁴படிபா⁴கா³தி.
Evameva khoti upamāsaṃsandanaṃ. Tassattho – bhikkhave, yathā te jaccandhā acakkhukā ekaṅgadassino anavasesato hatthiṃ apassitvā attanā diṭṭhāvayavamattaṃ hatthisaññāya itarehi diṭṭhaṃ ananujānantā aññamaññaṃ vivādaṃ āpannā kalahaṃ akaṃsu, evameva ime aññatitthiyā sakkāyassa ekadesaṃ rūpavedanādiṃ attano diṭṭhidassanena yathādiṭṭhaṃ ‘‘attā’’ti maññamānā tassa sassatādibhāvaṃ āropetvā ‘‘idameva saccaṃ moghamañña’’nti abhinivisitvā aññamaññaṃ vivadanti, yathābhūtaṃ pana atthānatthaṃ dhammādhammañca na jānanti. Tasmā andhā acakkhukā jaccandhapaṭibhāgāti.
ஏதமத்த²ங் விதி³த்வாதி ஏதங் தித்தி²யானங் த⁴ம்மஸபா⁴வங் யதா²பூ⁴தங் அஜானந்தானங் அபஸ்ஸந்தானங் ஜச்சந்தா⁴னங் விய ஹத்தி²ம்ஹி யதா²த³ஸ்ஸனங் மிச்சா²பி⁴னிவேஸங், தத்த² ச விவாதா³பத்திங் ஸப்³பா³காரதோ விதி³த்வா தத³த்த²தீ³பகங் இமங் உதா³னங் உதா³னேஸி.
Etamatthaṃ viditvāti etaṃ titthiyānaṃ dhammasabhāvaṃ yathābhūtaṃ ajānantānaṃ apassantānaṃ jaccandhānaṃ viya hatthimhi yathādassanaṃ micchābhinivesaṃ, tattha ca vivādāpattiṃ sabbākārato viditvā tadatthadīpakaṃ imaṃ udānaṃ udānesi.
தத்த² இமேஸு கிர ஸஜ்ஜந்தி, ஏகே ஸமணப்³ராஹ்மணாதி இதே⁴கச்சே பப்³ப³ஜ்ஜூபக³மனேன ஸமணா, ஜாதிமத்தேன ப்³ராஹ்மணா ‘‘ஸஸ்ஸதோ லோகோ’’திஆதி³னயப்பவத்தேஸு இமேஸு ஏவ அஸாரேஸு தி³ட்டி²க³தேஸு தி³ட்டா²பி⁴னந்த³னவஸேன, இமேஸு வா ரூபாதீ³ஸு உபாதா³னக்க²ந்தே⁴ஸு ஏவங் அனிச்சேஸு து³க்கே²ஸு விபரிணாமத⁴ம்மேஸு தண்ஹாபி⁴னந்த³னதி³ட்டா²பி⁴னந்த³னானங் வஸேன ‘‘ஏதங் மமா’’திஆதி³னா ஸஜ்ஜந்தி கிர. அஹோ நேஸங் ஸம்மோஹோதி த³ஸ்ஸேதி. கிரஸத்³தோ³ செத்த² அருசிஸூசனத்தோ². தேன தத்த² ஸங்க³காரணாபா⁴வமேவ தீ³பேதி. ந கேவலங் ஸஜ்ஜந்தி ஏவ, அத² கோ² விக்³க³ய்ஹ நங் விவத³ந்தி ‘‘ந த்வங் இமங் த⁴ம்மவினயங் ஆஜானாஸி, அஹங் இமங் த⁴ம்மவினயங் ஆஜானாமீ’’திஆதி³னா விக்³கா³ஹிககதா²னுயோக³வஸேன விக்³க³ய்ஹ விவத³ந்தி விவாத³ங் ஆபஜ்ஜந்தி. நந்தி செத்த² நிபாதமத்தங். அத² வா விக்³க³ய்ஹ நந்தி நங் தி³ட்டி²னிஸ்ஸயங் ஸக்காயதி³ட்டி²மேவ வா விபரீதத³ஸ்ஸனத்தா ஸஸ்ஸதாதி³வஸேன அஞ்ஞமஞ்ஞங் விருத்³த⁴ங் க³ஹெத்வா விவத³ந்தி விஸேஸதோ வத³ந்தி, அத்தனோ ஏவ வாத³ங் விஸிட்ட²ங் அவிபரீதங் கத்வா அபி⁴னிவிஸ்ஸ வோஹரந்தி. யதா² கிங்? ஜனா ஏகங்க³த³ஸ்ஸினோ யதே²வ ஜச்சந்த⁴ஜனா ஹத்தி²ஸ்ஸ ஏகேகங்க³த³ஸ்ஸினோ ‘‘யங் யங் அத்தனா பு²ஸித்வா ஞாதங், தங் ததே³வ ஹத்தீ²’’தி க³ஹெத்வா அஞ்ஞமஞ்ஞங் விக்³க³ய்ஹ விவதி³ங்ஸு, ஏவங்ஸம்பத³மித³ந்தி அத்தோ². இவஸத்³தோ³ செத்த² லுத்தனித்³தி³ட்டோ²தி வேதி³தப்³போ³.
Tattha imesu kira sajjanti, eke samaṇabrāhmaṇāti idhekacce pabbajjūpagamanena samaṇā, jātimattena brāhmaṇā ‘‘sassato loko’’tiādinayappavattesu imesu eva asāresu diṭṭhigatesu diṭṭhābhinandanavasena, imesu vā rūpādīsu upādānakkhandhesu evaṃ aniccesu dukkhesu vipariṇāmadhammesu taṇhābhinandanadiṭṭhābhinandanānaṃ vasena ‘‘etaṃ mamā’’tiādinā sajjanti kira. Aho nesaṃ sammohoti dasseti. Kirasaddo cettha arucisūcanattho. Tena tattha saṅgakāraṇābhāvameva dīpeti. Na kevalaṃ sajjanti eva, atha kho viggayha naṃ vivadanti ‘‘na tvaṃ imaṃ dhammavinayaṃ ājānāsi, ahaṃ imaṃ dhammavinayaṃ ājānāmī’’tiādinā viggāhikakathānuyogavasena viggayha vivadanti vivādaṃ āpajjanti. Nanti cettha nipātamattaṃ. Atha vā viggayha nanti naṃ diṭṭhinissayaṃ sakkāyadiṭṭhimeva vā viparītadassanattā sassatādivasena aññamaññaṃ viruddhaṃ gahetvā vivadanti visesato vadanti, attano eva vādaṃ visiṭṭhaṃ aviparītaṃ katvā abhinivissa voharanti. Yathā kiṃ? Janā ekaṅgadassino yatheva jaccandhajanā hatthissa ekekaṅgadassino ‘‘yaṃ yaṃ attanā phusitvā ñātaṃ, taṃ tadeva hatthī’’ti gahetvā aññamaññaṃ viggayha vivadiṃsu, evaṃsampadamidanti attho. Ivasaddo cettha luttaniddiṭṭhoti veditabbo.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 4. பட²மனானாதித்தி²யஸுத்தங் • 4. Paṭhamanānātitthiyasuttaṃ
