| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
3. பட²மஸத்தஸுத்தவண்ணனா
3. Paṭhamasattasuttavaṇṇanā
63. ததியே காமேஸூதி வத்து²காமேஸு. அதிவேலந்தி வேலங் அதிக்கமித்வா. ஸத்தாதி அயோனிஸோமனஸிகாரப³ஹுலதாய விஜ்ஜமானம்பி ஆதீ³னவங் அனோலோகெத்வா அஸ்ஸாத³மேவ ஸரித்வா ஸஜ்ஜனவஸேன ஸத்தா, ஆஸத்தா லக்³கா³தி அத்தோ². ரத்தாதி வத்த²ங் விய ரங்க³ஜாதேன சித்தஸ்ஸ விபரிணாமகரணேன ச²ந்த³ராகே³ன ரத்தா ஸாரத்தா. கி³த்³தா⁴தி அபி⁴கங்க²னஸபா⁴வேன அபி⁴ஜ்ஜ²னேன கி³த்³தா⁴ கே³த⁴ங் ஆபன்னா. க³தி⁴தாதி ராக³முச்சி²தா விய து³ம்மோசனீயபா⁴வேன தத்த² படிப³த்³தா⁴. முச்சி²தாதி கிலேஸவஸேன விஸஞ்ஞீபூ⁴தா விய அனஞ்ஞகிச்சா முச்ச²ங் மோஹங் ஆபன்னா. அஜ்ஜோ²பன்னாதி அனஞ்ஞஸாதா⁴ரணே விய கத்வா கி³லித்வா பரினிட்ட²பெத்வா டி²தா. ஸம்மத்தகஜாதாதி காமேஸு பாதப்³யதங் ஆபஜ்ஜந்தா அப்பஸுக²வேத³னாய ஸம்மத்தகா ஸுட்டு² மத்தகா ஜாதா. ‘‘ஸம்மோத³கஜாதா’’திபி பாடோ², ஜாதஸம்மோத³னா உப்பன்னபஹங்ஸாதி அத்தோ². ஸப்³பே³ஹிபி பதே³ஹி தேஸங் தண்ஹாதி⁴பன்னதங்யேவ வத³தி. எத்த² ச பட²மங் ‘‘காமேஸூ’’தி வத்வா புனபி ‘‘காமேஸூ’’தி வசனங் தேஸங் ஸத்தானங் தத³தி⁴முத்திதீ³பனத்த²ங். தேன ஸப்³பி³ரியாபதே²ஸு காமகு³ணஸமங்கி³னோ ஹுத்வா ததா³ விஹரிங்ஸூதி த³ஸ்ஸேதி.
63. Tatiye kāmesūti vatthukāmesu. Ativelanti velaṃ atikkamitvā. Sattāti ayonisomanasikārabahulatāya vijjamānampi ādīnavaṃ anoloketvā assādameva saritvā sajjanavasena sattā, āsattā laggāti attho. Rattāti vatthaṃ viya raṅgajātena cittassa vipariṇāmakaraṇena chandarāgena rattā sārattā. Giddhāti abhikaṅkhanasabhāvena abhijjhanena giddhā gedhaṃ āpannā. Gadhitāti rāgamucchitā viya dummocanīyabhāvena tattha paṭibaddhā. Mucchitāti kilesavasena visaññībhūtā viya anaññakiccā mucchaṃ mohaṃ āpannā. Ajjhopannāti anaññasādhāraṇe viya katvā gilitvā pariniṭṭhapetvā ṭhitā. Sammattakajātāti kāmesu pātabyataṃ āpajjantā appasukhavedanāya sammattakā suṭṭhu mattakā jātā. ‘‘Sammodakajātā’’tipi pāṭho, jātasammodanā uppannapahaṃsāti attho. Sabbehipi padehi tesaṃ taṇhādhipannataṃyeva vadati. Ettha ca paṭhamaṃ ‘‘kāmesū’’ti vatvā punapi ‘‘kāmesū’’ti vacanaṃ tesaṃ sattānaṃ tadadhimuttidīpanatthaṃ. Tena sabbiriyāpathesu kāmaguṇasamaṅgino hutvā tadā vihariṃsūti dasseti.
தஸ்மிஞ்ஹி ஸமயே ட²பெத்வா அரியஸாவகே ஸப்³பே³ ஸாவத்தி²வாஸினோ உஸ்ஸவங் கோ⁴ஸெத்வா யதா²விப⁴வங் ஆபானபூ⁴மிங் ஸஜ்ஜெத்வா பு⁴ஞ்ஜந்தா பிவந்தா ஆவி சேவ ரஹோ ச காமே பரிபு⁴ஞ்ஜந்தா இந்த்³ரியானி பரிசாரெந்தா காமேஸு பாதப்³யதங் ஆபஜ்ஜிங்ஸு. பி⁴க்கூ² ஸாவத்தி²யங் பிண்டா³ய சரந்தா தத்த² தத்த² கே³ஹே ஆராமுய்யானாதீ³ஸு ச மனுஸ்ஸே உஸ்ஸவங் கோ⁴ஸெத்வா காமனின்னே ததா² படிபஜ்ஜந்தே தி³ஸ்வா ‘‘விஹாரங் க³ந்த்வா ஸண்ஹஸுகு²மங் த⁴ம்மங் லபி⁴ஸ்ஸாமா’’தி ப⁴க³வதோ ஏதமத்த²ங் ஆரோசேஸுங். தேன வுத்தங் – ‘‘அத² கோ² ஸம்ப³ஹுலா பி⁴க்கூ²…பே॰… காமேஸு விஹரந்தீ’’தி.
Tasmiñhi samaye ṭhapetvā ariyasāvake sabbe sāvatthivāsino ussavaṃ ghosetvā yathāvibhavaṃ āpānabhūmiṃ sajjetvā bhuñjantā pivantā āvi ceva raho ca kāme paribhuñjantā indriyāni paricārentā kāmesu pātabyataṃ āpajjiṃsu. Bhikkhū sāvatthiyaṃ piṇḍāya carantā tattha tattha gehe ārāmuyyānādīsu ca manusse ussavaṃ ghosetvā kāmaninne tathā paṭipajjante disvā ‘‘vihāraṃ gantvā saṇhasukhumaṃ dhammaṃ labhissāmā’’ti bhagavato etamatthaṃ ārocesuṃ. Tena vuttaṃ – ‘‘atha kho sambahulā bhikkhū…pe… kāmesu viharantī’’ti.
ஏதமத்த²ங் விதி³த்வாதி ஏதங் தேஸங் மனுஸ்ஸானங் ஆபானபூ⁴மிரமணீயேஸு மஹாபரிளாஹேஸு அனேகானத்தா²னுப³ந்தே⁴ஸு கோ⁴ராஸய்ஹகடுகப²லேஸு காமேஸு அனாதீ³னவத³ஸ்ஸிதங் ஸப்³பா³காரதோ விதி³த்வா காமானஞ்சேவ கிலேஸானஞ்ச ஆதீ³னவவிபா⁴வனங் இமங் உதா³னங் உதா³னேஸி.
Etamatthaṃ viditvāti etaṃ tesaṃ manussānaṃ āpānabhūmiramaṇīyesu mahāpariḷāhesu anekānatthānubandhesu ghorāsayhakaṭukaphalesu kāmesu anādīnavadassitaṃ sabbākārato viditvā kāmānañceva kilesānañca ādīnavavibhāvanaṃ imaṃ udānaṃ udānesi.
தத்த² காமேஸு ஸத்தாதி வத்து²காமேஸு கிலேஸகாமேன ரத்தா மத்தா ஸத்தா விஸத்தா லக்³கா³ லக்³கி³தா ஸங்யுத்தா. காமஸங்க³ஸத்தாதி தாயேவ காமஸத்தியா வத்து²காமேஸு ராக³ஸங்கே³ன சேவ தி³ட்டி²மானதோ³ஸஅவிஜ்ஜாஸங்கே³ஹி ச ஸத்தா ஆஸத்தா. ஸங்யோஜனே வஜ்ஜமபஸ்ஸமானாதி கம்மவட்டங் விபாகவட்டேன, ப⁴வாதி³கே வா ப⁴வந்தராதீ³ஹி, ஸத்தே வா து³க்கே²ஹி ஸங்யோஜனதோ ப³ந்த⁴னதோ ஸங்யோஜனநாமகே காமராகா³தி³கிலேஸஜாதே ஸங்யோஜனீயேஸு த⁴ம்மேஸு அஸ்ஸாதா³னுபஸ்ஸிதாய வட்டது³க்க²மூலபா⁴வாதி³கங் வஜ்ஜங் தோ³ஸங் ஆதீ³னவங் அபஸ்ஸந்தா. ந ஹி ஜாது ஸங்யோஜனஸங்க³ஸத்தா, ஓக⁴ங் தரெய்யுங் விபுலங் மஹந்தந்தி ஏவங் ஆதீ³னவத³ஸ்ஸனாபா⁴வேன ஸங்யோஜனஸபா⁴வேஸு ஸங்கே³ஸு, ஸங்யோஜனஸங்கா²தேஹி வா ஸங்கே³ஹி தேஸங் விஸயேஸு தேபூ⁴மகத⁴ம்மேஸு ஸத்தா விபுலவிஸயதாய அனாதி³காலதாய ச விபுலங் வித்தி²ண்ணங் மஹந்தஞ்ச காமாதி³ஓக⁴ங், ஸங்ஸாரோக⁴மேவ வா ந கதா³சி தரெய்யுங், ஏகங்ஸேனேவ தஸ்ஸ ஓக⁴ஸ்ஸ பாரங் ந க³ச்செ²ய்யுந்தி அத்தோ².
Tattha kāmesu sattāti vatthukāmesu kilesakāmena rattā mattā sattā visattā laggā laggitā saṃyuttā. Kāmasaṅgasattāti tāyeva kāmasattiyā vatthukāmesu rāgasaṅgena ceva diṭṭhimānadosaavijjāsaṅgehi ca sattā āsattā. Saṃyojane vajjamapassamānāti kammavaṭṭaṃ vipākavaṭṭena, bhavādike vā bhavantarādīhi, satte vā dukkhehi saṃyojanato bandhanato saṃyojananāmake kāmarāgādikilesajāte saṃyojanīyesu dhammesu assādānupassitāya vaṭṭadukkhamūlabhāvādikaṃ vajjaṃ dosaṃ ādīnavaṃ apassantā. Na hi jātu saṃyojanasaṅgasattā, oghaṃ tareyyuṃ vipulaṃ mahantanti evaṃ ādīnavadassanābhāvena saṃyojanasabhāvesu saṅgesu, saṃyojanasaṅkhātehi vā saṅgehi tesaṃ visayesu tebhūmakadhammesu sattā vipulavisayatāya anādikālatāya ca vipulaṃ vitthiṇṇaṃ mahantañca kāmādioghaṃ, saṃsāroghameva vā na kadāci tareyyuṃ, ekaṃseneva tassa oghassa pāraṃ na gaccheyyunti attho.
ததியஸுத்தவண்ணனா நிட்டி²தா.
Tatiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 3. பட²மஸத்தஸுத்தங் • 3. Paṭhamasattasuttaṃ
