| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૬. છટ્ઠવગ્ગો
6. Chaṭṭhavaggo
(૬૦) ૮. પથવીધાતુ સનિદસ્સનાતિઆદિકથા
(60) 8. Pathavīdhātu sanidassanātiādikathā
૪૬૫. પથવીધાતુ સનિદસ્સનાતિ? આમન્તા. રૂપં રૂપાયતનં રૂપધાતુ નીલં પીતકં લોહિતકં ઓદાતં ચક્ખુવિઞ્ઞેય્યં ચક્ખુસ્મિં પટિહઞ્ઞતિ ચક્ખુસ્સ આપાથં આગચ્છતીતિ? ન હેવં વત્તબ્બે…પે॰….
465. Pathavīdhātu sanidassanāti? Āmantā. Rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti? Na hevaṃ vattabbe…pe….
પથવીધાતુ સનિદસ્સનાતિ? આમન્તા. ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે…પે॰….
Pathavīdhātu sanidassanāti? Āmantā. Cakkhuñca paṭicca pathavīdhātuñca uppajjati cakkhuviññāṇanti? Na hevaṃ vattabbe…pe….
ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણ’’ન્તિ.
Cakkhuñca paṭicca pathavīdhātuñca uppajjati cakkhuviññāṇanti? Āmantā. ‘‘Cakkhuñca paṭicca pathavīdhātuñca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca pathavīdhātuñca uppajjati cakkhuviññāṇa’’nti.
૪૬૬. ન વત્તબ્બં – ‘‘પથવીધાતુ સનિદસ્સના’’તિ? આમન્તા. નનુ પસ્સતિ ભૂમિં પાસાણં પબ્બતન્તિ? આમન્તા. હઞ્ચિ પસ્સતિ 1 ભૂમિં પાસાણં પબ્બતં, તેન વત રે વત્તબ્બે – ‘‘પથવીધાતુ સનિદસ્સના’’તિ…પે॰….
466. Na vattabbaṃ – ‘‘pathavīdhātu sanidassanā’’ti? Āmantā. Nanu passati bhūmiṃ pāsāṇaṃ pabbatanti? Āmantā. Hañci passati 2 bhūmiṃ pāsāṇaṃ pabbataṃ, tena vata re vattabbe – ‘‘pathavīdhātu sanidassanā’’ti…pe….
ન વત્તબ્બં – ‘‘આપોધાતુ સનિદસ્સના’’તિ? આમન્તા. નનુ પસ્સતિ ઉદકન્તિ? આમન્તા. હઞ્ચિ પસ્સતિ ઉદકં, તેન વત રે વત્તબ્બે – ‘‘આપોધાતુ સનિદસ્સનાતિ…પે॰….
Na vattabbaṃ – ‘‘āpodhātu sanidassanā’’ti? Āmantā. Nanu passati udakanti? Āmantā. Hañci passati udakaṃ, tena vata re vattabbe – ‘‘āpodhātu sanidassanāti…pe….
ન વત્તબ્બં – તેજોધાતુ સનિદસ્સનાતિ? આમન્તા. નનુ પસ્સતિ અગ્ગિં જલન્તન્તિ? આમન્તા. હઞ્ચિ પસ્સતિ અગ્ગિં જલન્તં, તેન વત રે વત્તબ્બે – ‘‘તેજોધાતુ સનિદસ્સના’’તિ…પે॰….
Na vattabbaṃ – tejodhātu sanidassanāti? Āmantā. Nanu passati aggiṃ jalantanti? Āmantā. Hañci passati aggiṃ jalantaṃ, tena vata re vattabbe – ‘‘tejodhātu sanidassanā’’ti…pe….
ન વત્તબ્બં – ‘‘વાયોધાતુ સનિદસ્સના’’તિ? આમન્તા. નનુ પસ્સતિ વાતેન રુક્ખે સઞ્ચાલિયમાનેતિ? આમન્તા. હઞ્ચિ પસ્સતિ વાતેન રુક્ખે સઞ્ચાલિયમાને, તેન વત રે વત્તબ્બે – ‘‘વાયોધાતુ સનિદસ્સના’’તિ…પે॰….
Na vattabbaṃ – ‘‘vāyodhātu sanidassanā’’ti? Āmantā. Nanu passati vātena rukkhe sañcāliyamāneti? Āmantā. Hañci passati vātena rukkhe sañcāliyamāne, tena vata re vattabbe – ‘‘vāyodhātu sanidassanā’’ti…pe….
પથવીધાતુ સનિદસ્સનાતિઆદિકથા નિટ્ઠિતા.
Pathavīdhātu sanidassanātiādikathā niṭṭhitā.
Footnotes:
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૧૦. પથવીધાતુસનિદસ્સનાતિઆદિકથાવણ્ણના • 10. Pathavīdhātusanidassanātiādikathāvaṇṇanā
