| Library / Tipiṭaka / તિપિટક • Tipiṭaka / વિમતિવિનોદની-ટીકા • Vimativinodanī-ṭīkā |
૪. પુરાણચીવરસિક્ખાપદવણ્ણના
4. Purāṇacīvarasikkhāpadavaṇṇanā
૫૦૩-૫. ચતુત્થે પાળિયં ભત્તવિસ્સગ્ગન્તિ ભત્તસ્સ ઉદરે વિસ્સજ્જનં, પવેસનં અજ્ઝોહરણં ભત્તકિચ્ચન્તિ અત્થો, ભોજનપરિયોસાનેન ભત્તસ્સ વિસ્સજ્જનન્તિપિ વદન્તિ. તત્થ નામ ત્વન્તિ સો નામ ત્વં, તાય નામ ત્વન્તિ વા અત્થો. પિતા ચ માતા ચ પિતરો, પિતૂનં પિતા ચ માતા ચ પિતામહા, તે એવ યુગળટ્ઠેન યુગો, તસ્મા યાવ સત્તમા પિતામહયુગા પિતામહાવટ્ટાતિ એવમેત્થ અત્થો દટ્ઠબ્બો. એવઞ્હિ પિતામહગ્ગહણેન માતામહો ચ પિતામહી માતામહી ચ ગહિતાવ હોન્તિ. સત્તમયુગતો પરં ‘‘અઞ્ઞાતકા’’તિ વેદિતબ્બં. યાતિ ભિક્ખુની. પિતુ માતા પિતામહી, માતુ પિતા માતામહો.
503-5. Catutthe pāḷiyaṃ bhattavissagganti bhattassa udare vissajjanaṃ, pavesanaṃ ajjhoharaṇaṃ bhattakiccanti attho, bhojanapariyosānena bhattassa vissajjanantipi vadanti. Tattha nāma tvanti so nāma tvaṃ, tāya nāma tvanti vā attho. Pitā ca mātā ca pitaro, pitūnaṃ pitā ca mātā ca pitāmahā, te eva yugaḷaṭṭhena yugo, tasmā yāva sattamā pitāmahayugā pitāmahāvaṭṭāti evamettha attho daṭṭhabbo. Evañhi pitāmahaggahaṇena mātāmaho ca pitāmahī mātāmahī ca gahitāva honti. Sattamayugato paraṃ ‘‘aññātakā’’ti veditabbaṃ. Yāti bhikkhunī. Pitu mātā pitāmahī, mātu pitā mātāmaho.
પયોગે પયોગે ભિક્ખુસ્સ દુક્કટન્તિ ‘‘ધોવા’’તિ આણાપનવાચાય એકાય એવ તદનુગુણસ્સ સબ્બસ્સાપિ પયોગસ્સ આણત્તત્તા વુત્તં.
Payoge payoge bhikkhussa dukkaṭanti ‘‘dhovā’’ti āṇāpanavācāya ekāya eva tadanuguṇassa sabbassāpi payogassa āṇattattā vuttaṃ.
૫૦૬. તદવિનાભાવતો ધોવનસ્સ ‘‘કાયવિકારં કત્વા’’તિ ચ ‘‘અન્તોદ્વાદસહત્થે’’તિ ચ વુત્તત્તા કાયેન ધોવાપેતુકામતં અપ્પકાસેત્વા દાનખિપનપેસનાદિં કરોન્તસ્સ ચ દ્વાદસહત્થં ઉપચારં મુઞ્ચિત્વા બહિ ઠત્વા કાયવાચાહિ આણાપેત્વા ખિપનપેસનાદિં કરોન્તસ્સ ચ અનાપત્તિ એવ.
506. Tadavinābhāvato dhovanassa ‘‘kāyavikāraṃ katvā’’ti ca ‘‘antodvādasahatthe’’ti ca vuttattā kāyena dhovāpetukāmataṃ appakāsetvā dānakhipanapesanādiṃ karontassa ca dvādasahatthaṃ upacāraṃ muñcitvā bahi ṭhatvā kāyavācāhi āṇāpetvā khipanapesanādiṃ karontassa ca anāpatti eva.
એકેન વત્થુનાતિ પઠમકતેન. પઞ્ચસતાનિ પમાણં એતાસન્તિ પઞ્ચસતા. ભિક્ખુભાવતો પરિવત્તલિઙ્ગાપિ ભિક્ખુની ભિક્ખૂનં સન્તિકે એકતોઉપસમ્પન્ના એવ.
Ekena vatthunāti paṭhamakatena. Pañcasatāni pamāṇaṃ etāsanti pañcasatā. Bhikkhubhāvato parivattaliṅgāpi bhikkhunī bhikkhūnaṃ santike ekatoupasampannā eva.
૫૦૭. તાવકાલિકં ગહેત્વાતિ અત્તના કતિપાહં પારુપનાદિઅત્થાય તાવકાલિકં યાચિત્વા. પુરાણચીવરતા, ઉપચારે ઠત્વા અઞ્ઞાતિકાય ભિક્ખુનિયા આણાપનં, તસ્સા ધોવાપનાદીનિ ચાતિ ઇમાનેત્થ તીણિ અઙ્ગાનિ.
507.Tāvakālikaṃ gahetvāti attanā katipāhaṃ pārupanādiatthāya tāvakālikaṃ yācitvā. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovāpanādīni cāti imānettha tīṇi aṅgāni.
પુરાણચીવરસિક્ખાપદવણ્ણના નિટ્ઠિતા.
Purāṇacīvarasikkhāpadavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૪. પુરાણચીવરસિક્ખાપદં • 4. Purāṇacīvarasikkhāpadaṃ
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવિભઙ્ગ-અટ્ઠકથા • Mahāvibhaṅga-aṭṭhakathā / ૪. પુરાણચીવરસિક્ખાપદવણ્ણના • 4. Purāṇacīvarasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૪. પુરાણચીવરસિક્ખાપદવણ્ણના • 4. Purāṇacīvarasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૪. પુરાણચીવરસિક્ખાપદવણ્ણના • 4. Purāṇacīvarasikkhāpadavaṇṇanā
