| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૧૬. સોળસમવગ્ગો
16. Soḷasamavaggo
(૧૬૪) ૯. રૂપં રૂપાવચરારૂપાવચરન્તિકથા
(164) 9. Rūpaṃ rūpāvacarārūpāvacarantikathā
૭૬૮. અત્થિ રૂપં રૂપાવચરન્તિ? આમન્તા. સમાપત્તેસિયં ઉપપત્તેસિયં દિટ્ઠધમ્મસુખવિહારં, સમાપત્તેસિયેન ચિત્તેન ઉપપત્તેસિયેન ચિત્તેન દિટ્ઠધમ્મસુખવિહારેન ચિત્તેન સહગતં સહજાતં સંસટ્ઠં સમ્પયુત્તં એકુપ્પાદં એકનિરોધં એકવત્થુકં એકારમ્મણન્તિ? ન હેવં વત્તબ્બે…પે॰… નનુ ન સમાપત્તેસિયં ન ઉપપત્તેસિયં ન દિટ્ઠધમ્મસુખવિહારં, ન સમાપત્તેસિયેન ચિત્તેન ન ઉપપત્તેસિયેન ચિત્તેન ન દિટ્ઠધમ્મસુખવિહારેન ચિત્તેન સહગતં સહજાતં સંસટ્ઠં સમ્પયુત્તં એકુપ્પાદં એકનિરોધં એકવત્થુકં એકારમ્મણન્તિ? આમન્તા. હઞ્ચિ ન સમાપત્તેસિયં ન ઉપપત્તેસિયં ન દિટ્ઠધમ્મસુખવિહારં, ન સમાપત્તેસિયેન ચિત્તેન…પે॰… એકારમ્મણં, નો ચ વત રે વત્તબ્બે – ‘‘અત્થિ રૂપં રૂપાવચર’’ન્તિ.
768. Atthi rūpaṃ rūpāvacaranti? Āmantā. Samāpattesiyaṃ upapattesiyaṃ diṭṭhadhammasukhavihāraṃ, samāpattesiyena cittena upapattesiyena cittena diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Na hevaṃ vattabbe…pe… nanu na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena na upapattesiyena cittena na diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Āmantā. Hañci na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena…pe… ekārammaṇaṃ, no ca vata re vattabbe – ‘‘atthi rūpaṃ rūpāvacara’’nti.
૭૬૯. અત્થિ રૂપં અરૂપાવચરન્તિ? આમન્તા. સમાપત્તેસિયં ઉપપત્તેસિયં દિટ્ઠધમ્મસુખવિહારં, સમાપત્તેસિયેન ચિત્તેન ઉપપત્તેસિયેન ચિત્તેન દિટ્ઠધમ્મસુખવિહારેન ચિત્તેન સહગતં સહજાતં સંસટ્ઠં સમ્પયુત્તં એકુપ્પાદં એકનિરોધં એકવત્થુકં એકારમ્મણન્તિ? ન હેવં વત્તબ્બે…પે॰… નનુ ન સમાપત્તેસિયં ન ઉપપત્તેસિયં ન દિટ્ઠધમ્મસુખવિહારં, ન સમાપત્તેસિયેન ચિત્તેન …પે॰… એકારમ્મણન્તિ? આમન્તા. હઞ્ચિ ન સમાપત્તેસિયં ન ઉપપત્તેસિયં…પે॰… એકવત્થુકં એકારમ્મણં, નો ચ વત રે વત્તબ્બે – ‘‘અત્થિ રૂપં અરૂપાવચર’’ન્તિ.
769. Atthi rūpaṃ arūpāvacaranti? Āmantā. Samāpattesiyaṃ upapattesiyaṃ diṭṭhadhammasukhavihāraṃ, samāpattesiyena cittena upapattesiyena cittena diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Na hevaṃ vattabbe…pe… nanu na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena …pe… ekārammaṇanti? Āmantā. Hañci na samāpattesiyaṃ na upapattesiyaṃ…pe… ekavatthukaṃ ekārammaṇaṃ, no ca vata re vattabbe – ‘‘atthi rūpaṃ arūpāvacara’’nti.
૭૭૦. ન વત્તબ્બં – ‘‘અત્થિ રૂપં રૂપાવચરં, અત્થિ રૂપં અરૂપાવચર’’ન્તિ? આમન્તા. નનુ કામાવચરકમ્મસ્સ કતત્તા રૂપં કામાવચરન્તિ? આમન્તા. હઞ્ચિ કામાવચરકમ્મસ્સ કતત્તા રૂપં કામાવચરં , તેન વત રે વત્તબ્બે – ‘‘રૂપાવચરકમ્મસ્સ કતત્તા રૂપં રૂપાવચરં, અરૂપાવચરકમ્મસ્સ કતત્તા રૂપં અરૂપાવચર’’ન્તિ.
770. Na vattabbaṃ – ‘‘atthi rūpaṃ rūpāvacaraṃ, atthi rūpaṃ arūpāvacara’’nti? Āmantā. Nanu kāmāvacarakammassa katattā rūpaṃ kāmāvacaranti? Āmantā. Hañci kāmāvacarakammassa katattā rūpaṃ kāmāvacaraṃ , tena vata re vattabbe – ‘‘rūpāvacarakammassa katattā rūpaṃ rūpāvacaraṃ, arūpāvacarakammassa katattā rūpaṃ arūpāvacara’’nti.
રૂપં રૂપાવચરારૂપાવચરન્તિકથા નિટ્ઠિતા.
Rūpaṃ rūpāvacarārūpāvacarantikathā niṭṭhitā.
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૯. રૂપં રૂપાવચરારૂપાવચરન્તિકથાવણ્ણના • 9. Rūpaṃ rūpāvacarārūpāvacarantikathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૯. રૂપંરૂપાવચરારૂપાવચરન્તિકથાવણ્ણના • 9. Rūpaṃrūpāvacarārūpāvacarantikathāvaṇṇanā
