| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
9. ஸதா⁴யமானஸுத்தவண்ணனா
9. Sadhāyamānasuttavaṇṇanā
49. நவமே மாணவகாதி தருணா. பட²மே யொப்³ப³னே டி²தா ப்³ராஹ்மணகுமாரகா இதா⁴தி⁴ப்பேதா.
49. Navame māṇavakāti taruṇā. Paṭhame yobbane ṭhitā brāhmaṇakumārakā idhādhippetā.
ஸதா⁴யமானரூபாதி உப்பண்ட³னஜாதிகங் வசனங் ஸந்தா⁴ய வுத்தங். அஞ்ஞேஸங் உப்பண்டெ³ந்தா ஸத⁴ந்தி, தத³த்த²வசனஸீலாதி அத்தோ². தஸ்ஸாயங் வசனத்தோ² – ஸத⁴னங் ஸதோ⁴, தங் ஆசிக்க²ந்தீதி ஸத⁴யமானாதி வத்தப்³பே³ தீ³க⁴ங் கத்வா ‘‘ஸதா⁴யமானா’’தி வுத்தங். அத² வா விஸேஸதோ ஸஸேதே⁴ விய அத்தானங் ஆவத³ந்தீதி ஸதா⁴யமானா. தே ஏவங் ஸபா⁴வதாய ‘‘ஸதா⁴யமானரூபா’’தி வுத்தங். ‘‘ஸத்³தா³யமானரூபா’’திபி பாடோ², உச்சாஸத்³த³மஹாஸத்³த³ங் கரொந்தாதி அத்தோ². ப⁴க³வதோ அவிதூ³ரே அதிக்கமந்தீதி ப⁴க³வதோ ஸவனவிஸயே தங் தங் முகா²ருள்ஹங் வத³ந்தா அதியந்தி.
Sadhāyamānarūpāti uppaṇḍanajātikaṃ vacanaṃ sandhāya vuttaṃ. Aññesaṃ uppaṇḍentā sadhanti, tadatthavacanasīlāti attho. Tassāyaṃ vacanattho – sadhanaṃ sadho, taṃ ācikkhantīti sadhayamānāti vattabbe dīghaṃ katvā ‘‘sadhāyamānā’’ti vuttaṃ. Atha vā visesato sasedhe viya attānaṃ āvadantīti sadhāyamānā. Te evaṃ sabhāvatāya ‘‘sadhāyamānarūpā’’ti vuttaṃ. ‘‘Saddāyamānarūpā’’tipi pāṭho, uccāsaddamahāsaddaṃ karontāti attho. Bhagavato avidūre atikkamantīti bhagavato savanavisaye taṃ taṃ mukhāruḷhaṃ vadantā atiyanti.
ஏதமத்த²ங் விதி³த்வாதி ஏதங் தேஸங் வாசாய அஸஞ்ஞதபா⁴வங் ஜானித்வா தத³த்த²தீ³பகங் த⁴ம்மஸங்வேக³வஸேன இமங் உதா³னங் உதா³னேஸி.
Etamatthaṃviditvāti etaṃ tesaṃ vācāya asaññatabhāvaṃ jānitvā tadatthadīpakaṃ dhammasaṃvegavasena imaṃ udānaṃ udānesi.
தத்த² பரிமுட்டா²தி த³ந்தா⁴ முட்ட²ஸ்ஸதினோ. பண்டி³தாபா⁴ஸாதி பண்டி³தபதிரூபகா ‘‘கே அஞ்ஞே ஜானந்தி, மயமேவெத்த² ஜானாமா’’தி தஸ்மிங் தஸ்மிங் அத்தே² அத்தானமேவ ஜானந்தங் கத்வா ஸமுதா³சரணதோ. வாசாகோ³சரபா⁴ணினோதி யேஸங் வாசா ஏவ கோ³சரோ விஸயோ, தே வாசாகோ³சரபா⁴ணினோ, வாசாவத்து²மத்தஸ்ஸேவ பா⁴ணினோ அத்த²ஸ்ஸ அபரிஞ்ஞாதத்தா. அத² வா வாசாய அகோ³சரங் அரியானங் கதா²ய அவிஸயங் முஸாவாத³ங் ப⁴ணந்தீதி வாசாகோ³சரபா⁴ணினோ. அத² வா ‘‘கோ³சரபா⁴ணினோ’’தி எத்த² ஆகாரஸ்ஸ ரஸ்ஸபா⁴வோ கதோ. வாசாகோ³சரா, ந ஸதிபட்டா²னாதி³கோ³சரா பா⁴ணினோவ. கத²ங் பா⁴ணினோ? யாவிச்ச²ந்தி முகா²யாமங் அத்தனோ யாவ முகா²யாமங் யாவ முக²ப்பஸாரணங் இச்ச²ந்தி, தாவ பஸாரெத்வா பா⁴ணினோ, பரேஸு கா³ரவேன, அத்தனோ அவிஸயதாய ச முக²ஸங்கோசங் ந கரொந்தீதி அத்தோ². அத² வா வாசாகோ³சரா ஏவ ஹுத்வா பா⁴ணினோ, ஸயங் அஜானித்வா பரபத்திகா ஏவ ஹுத்வா வத்தாரோதி அத்தோ². ததோ ஏவ யாவிச்ச²ந்தி முகா²யாமங் யேன வசனேன ஸாவேதப்³பா³, தங் அசிந்தெத்வா யாவதே³வ அத்தனோ முக²ப்பஸாரணமத்தங் இச்ச²ந்தீதி அத்தோ². யேன நீதா ந தங் விதூ³தி யேன முட்ட²ஸ்ஸச்சாதி³னா நில்லஜ்ஜபா⁴வங் பண்டி³தமானீபா⁴வஞ்ச நீதா ‘‘மயமேவங் ப⁴ணாமா’’தி, தங் ததா² அத்தனோ ப⁴ணந்தஸ்ஸ காரணங் ந விதூ³, அவித்³த³ஸுனோ அஸூரா ந ஜானந்தீதி அத்தோ².
Tattha parimuṭṭhāti dandhā muṭṭhassatino. Paṇḍitābhāsāti paṇḍitapatirūpakā ‘‘ke aññe jānanti, mayamevettha jānāmā’’ti tasmiṃ tasmiṃ atthe attānameva jānantaṃ katvā samudācaraṇato. Vācāgocarabhāṇinoti yesaṃ vācā eva gocaro visayo, te vācāgocarabhāṇino, vācāvatthumattasseva bhāṇino atthassa apariññātattā. Atha vā vācāya agocaraṃ ariyānaṃ kathāya avisayaṃ musāvādaṃ bhaṇantīti vācāgocarabhāṇino. Atha vā ‘‘gocarabhāṇino’’ti ettha ākārassa rassabhāvo kato. Vācāgocarā, na satipaṭṭhānādigocarā bhāṇinova. Kathaṃ bhāṇino? Yāvicchanti mukhāyāmaṃ attano yāva mukhāyāmaṃ yāva mukhappasāraṇaṃ icchanti, tāva pasāretvā bhāṇino, paresu gāravena, attano avisayatāya ca mukhasaṅkocaṃ na karontīti attho. Atha vā vācāgocarā eva hutvā bhāṇino, sayaṃ ajānitvā parapattikā eva hutvā vattāroti attho. Tato eva yāvicchanti mukhāyāmaṃ yena vacanena sāvetabbā, taṃ acintetvā yāvadeva attano mukhappasāraṇamattaṃ icchantīti attho. Yena nītā na taṃ vidūti yena muṭṭhassaccādinā nillajjabhāvaṃ paṇḍitamānībhāvañca nītā ‘‘mayamevaṃ bhaṇāmā’’ti, taṃ tathā attano bhaṇantassa kāraṇaṃ na vidū, aviddasuno asūrā na jānantīti attho.
நவமஸுத்தவண்ணனா நிட்டி²தா.
Navamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 9. ஸதா⁴யமானஸுத்தங் • 9. Sadhāyamānasuttaṃ
