| Library / Tipiṭaka / તિપિટક • Tipiṭaka / પરિવાર-અટ્ઠકથા • Parivāra-aṭṭhakathā |
સમનુભાસનાસમુટ્ઠાનવણ્ણના
Samanubhāsanāsamuṭṭhānavaṇṇanā
૨૬૧. ભેદાનુવત્તદુબ્બચદૂસદુટ્ઠુલ્લદિટ્ઠિ ચાતિ સઙ્ઘભેદાનુવત્તકદુબ્બચકુલદૂસકદુટ્ઠુલ્લપ્પટિચ્છાદનદિટ્ઠિઅપ્પટિનિસ્સજ્જનસિક્ખાપદાનિ. છન્દં ઉજ્જગ્ઘિકા દ્વે ચાતિ છન્દં અદત્વા ગમનસિક્ખાપદં ઉજ્જગ્ઘિકાય અન્તરઘરે ગમનનિસીદનસિક્ખાપદદ્વયઞ્ચ. દ્વે ચ સદ્દાતિ ‘‘અપ્પસદ્દો અન્તરઘરે ગમિસ્સામિ, નિસીદિસ્સામી’’તિ સિક્ખાપદદ્વયઞ્ચ. ન બ્યાહરેતિ ‘‘ન સકબળેન મુખેન બ્યાહરિસ્સામી’’તિ સિક્ખાપદં.
261.Bhedānuvattadubbacadūsaduṭṭhulladiṭṭhicāti saṅghabhedānuvattakadubbacakuladūsakaduṭṭhullappaṭicchādanadiṭṭhiappaṭinissajjanasikkhāpadāni. Chandaṃ ujjagghikā dve cāti chandaṃ adatvā gamanasikkhāpadaṃ ujjagghikāya antaraghare gamananisīdanasikkhāpadadvayañca. Dve ca saddāti ‘‘appasaddo antaraghare gamissāmi, nisīdissāmī’’ti sikkhāpadadvayañca. Na byāhareti ‘‘na sakabaḷena mukhena byāharissāmī’’ti sikkhāpadaṃ.
છમા નીચાસને ઠાનં, પચ્છતો ઉપ્પથેન ચાતિ છમાયં નિસીદિત્વા, નીચે આસને નિસીદિત્વા; ઠિતેન નિસિન્નસ્સ, પચ્છતો ગચ્છન્તેન પુરતો ગચ્છન્તસ્સ, ઉપ્પથેન ગચ્છન્તેન પથેન ગચ્છન્તસ્સ ધમ્મદેસનાસિક્ખાપદાનિ. વજ્જાનુવત્તિગહણાતિ વજ્જપ્પટિચ્છાદનઉઅખત્તાનુવત્તકહત્થગ્ગહણાદિસઙ્ખાતાનિ તીણિ પારાજિકાનિ. ઓસારે પચ્ચાચિક્ખનાતિ ‘‘અનપલોકેત્વા કારકસઙ્ઘં અનઞ્ઞાય ગણસ્સ છન્દં ઓસારેય્યા’’તિ ચ ‘‘બુદ્ધં પચ્ચક્ખામી’’તિ ચ વુત્તસિક્ખાપદદ્વયં.
Chamā nīcāsane ṭhānaṃ, pacchato uppathena cāti chamāyaṃ nisīditvā, nīce āsane nisīditvā; ṭhitena nisinnassa, pacchato gacchantena purato gacchantassa, uppathena gacchantena pathena gacchantassa dhammadesanāsikkhāpadāni. Vajjānuvattigahaṇāti vajjappaṭicchādanauakhattānuvattakahatthaggahaṇādisaṅkhātāni tīṇi pārājikāni. Osāre paccācikkhanāti ‘‘anapaloketvā kārakasaṅghaṃ anaññāya gaṇassa chandaṃ osāreyyā’’ti ca ‘‘buddhaṃ paccakkhāmī’’ti ca vuttasikkhāpadadvayaṃ.
કિસ્મિં સંસટ્ઠા દ્વે વધીતિ ‘‘કિસ્મિઞ્ચિદેવ અધિકરણે પચ્ચાકતા’’તિ ચ ‘‘ભિક્ખુનિયો પનેવ સંસટ્ઠા વિહરન્તી’’તિ ચ ‘‘યા પન ભિક્ખુની એવં વદેય્ય સંસટ્ઠાવ અય્યે તુમ્હે વિહરથા’’તિ ચ ‘‘અત્તાનં વધિત્વા વધિત્વા રોદેય્યા’’તિ ચ વુત્તસિક્ખાપદાનિ. વિસિબ્બે દુક્ખિતાય ચાતિ ‘‘ભિક્ખુનિયા ચીવરં વિસિબ્બેત્વા વા વિસિબ્બાપેત્વા વા’’તિ ચ ‘‘દુક્ખિતં સહજીવિનિ’’ન્તિ ચ વુત્તસિક્ખાપદદ્વયં. પુન સંસટ્ઠા ન વૂપસમેતિ ‘‘સંસટ્ઠા વિહરેય્ય ગહપતિના વા ગહપતિપુત્તેન વા’’તિ એવં પુન વુત્તસંસટ્ઠસિક્ખાપદઞ્ચ ‘‘એહય્યે, ઇમં અધિકરણં વૂપસમેહી’’તિ વુચ્ચમાના, ‘‘સાધૂ’’તિ પટિસ્સુણિત્વા ‘‘સા પચ્છા અનન્તરાયિકિની નેવ વૂપસમ્મેય્યા’’તિ વુત્તસિક્ખાપદઞ્ચ. આરામઞ્ચ પવારણાતિ ‘‘જાનં સભિક્ખુકં આરામં અનાપુચ્છા પવિસેય્યા’’તિ ચ ‘‘ઉભતોસઙ્ઘે તીહિ ઠાનેહિ ન પવારેય્યા’’તિ ચ વુત્તસિક્ખાપદદ્વયં.
Kismiṃ saṃsaṭṭhā dve vadhīti ‘‘kismiñcideva adhikaraṇe paccākatā’’ti ca ‘‘bhikkhuniyo paneva saṃsaṭṭhā viharantī’’ti ca ‘‘yā pana bhikkhunī evaṃ vadeyya saṃsaṭṭhāva ayye tumhe viharathā’’ti ca ‘‘attānaṃ vadhitvā vadhitvā rodeyyā’’ti ca vuttasikkhāpadāni. Visibbe dukkhitāya cāti ‘‘bhikkhuniyā cīvaraṃ visibbetvā vā visibbāpetvā vā’’ti ca ‘‘dukkhitaṃ sahajīvini’’nti ca vuttasikkhāpadadvayaṃ. Puna saṃsaṭṭhā na vūpasameti ‘‘saṃsaṭṭhā vihareyya gahapatinā vā gahapatiputtena vā’’ti evaṃ puna vuttasaṃsaṭṭhasikkhāpadañca ‘‘ehayye, imaṃ adhikaraṇaṃ vūpasamehī’’ti vuccamānā, ‘‘sādhū’’ti paṭissuṇitvā ‘‘sā pacchā anantarāyikinī neva vūpasammeyyā’’ti vuttasikkhāpadañca. Ārāmañca pavāraṇāti ‘‘jānaṃ sabhikkhukaṃ ārāmaṃ anāpucchā paviseyyā’’ti ca ‘‘ubhatosaṅghe tīhi ṭhānehi na pavāreyyā’’ti ca vuttasikkhāpadadvayaṃ.
અન્વદ્ધં સહજીવિનિં દ્વેતિ ‘‘અન્વદ્ધમાસં ભિક્ખુનિયા ભિક્ખુસઙ્ઘતો દ્વે ધમ્મા પચ્ચાસીસિતબ્બા’’તિ વુત્તસિક્ખાપદઞ્ચ, ‘‘સહજીવિનિં વુટ્ઠાપેત્વા દ્વે વસ્સાનિ નેવ અનુગ્ગણ્હેય્ય, સહજીવિનિં વુટ્ઠાપેત્વા નેવ વૂપકાસેય્યા’’તિ વુત્તસિક્ખાપદદ્વયઞ્ચ. ચીવરં અનુબન્ધનાતિ ‘‘સચે મે ત્વં, અય્યે, ચીવરં દસ્સસિ, એવાહં તં વુટ્ઠાપેસ્સામી’’તિ ચ ‘‘સચે મં ત્વં, અય્યે, દ્વે વસ્સાનિ અનુબન્ધિસ્સસિ, એવાહં તં વુટ્ઠાપેસ્સામી’’તિ ચ વુત્તસિક્ખાપદદ્વયં.
Anvaddhaṃ sahajīviniṃ dveti ‘‘anvaddhamāsaṃ bhikkhuniyā bhikkhusaṅghato dve dhammā paccāsīsitabbā’’ti vuttasikkhāpadañca, ‘‘sahajīviniṃ vuṭṭhāpetvā dve vassāni neva anuggaṇheyya, sahajīviniṃ vuṭṭhāpetvā neva vūpakāseyyā’’ti vuttasikkhāpadadvayañca. Cīvaraṃ anubandhanāti ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti ca ‘‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’ti ca vuttasikkhāpadadvayaṃ.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / ૪. સમનુભાસનાસમુટ્ઠાનં • 4. Samanubhāsanāsamuṭṭhānaṃ
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / સમનુભાસનાસમુટ્ઠાનવણ્ણના • Samanubhāsanāsamuṭṭhānavaṇṇanā
