| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
7. ஸாரிபுத்தஸுத்தவண்ணனா
7. Sāriputtasuttavaṇṇanā
37. ஸத்தமே அபுப்³ப³ங் நத்தி². கா³தா²ய அதி⁴சேதஸோதி அதி⁴சித்தவதோ, ஸப்³ப³சித்தானங் அதி⁴கேன அரஹத்தப²லசித்தேன ஸமன்னாக³தஸ்ஸாதி அத்தோ². அப்பமஜ்ஜதோதி ந பமஜ்ஜதோ, அப்பமாதே³ன அனவஜ்ஜத⁴ம்மேஸு ஸாதச்சகிரியாய ஸமன்னாக³தஸ்ஸாதி வுத்தங் ஹோதி. முனினோதி ‘‘யோ முனாதி உபோ⁴ லோகே, முனி தேன பவுச்சதீ’’தி (த⁴॰ ப॰ 269; சூளனி॰ மெத்தகூ³மாணவபுச்சா²னித்³தே³ஸ 21) ஏவங் உப⁴யலோகமுனநேன மோனங் வுச்சதி ஞாணங், தேன அரஹத்தப²லஞாணஸங்கா²தேன ஞாணேன ஸமன்னாக³தத்தா வா கீ²ணாஸவோ முனி நாம, தஸ்ஸ முனினோ. மோனபதே²ஸு ஸிக்க²தோதி அரஹத்தஞாணஸங்கா²தஸ்ஸ மோனஸ்ஸ பதே²ஸு ஸத்ததிங்ஸபோ³தி⁴பக்கி²யத⁴ம்மேஸு தீஸு வா ஸிக்கா²ஸு ஸிக்க²தோ. இத³ஞ்ச புப்³ப³பா⁴க³ப்படிபத³ங் க³ஹெத்வா வுத்தங். பரினிட்டி²தஸிக்கோ² ஹி அரஹா, தஸ்மா ஏவங் ஸிக்க²தோ, இமாய ஸிக்கா²ய முனிபா⁴வங் பத்தஸ்ஸ முனினோதி ஏவமெத்த² அத்தோ² த³ட்ட²ப்³போ³. யஸ்மா ச ஏததே³வ, தஸ்மா ஹெட்டி²மமக்³க³ப²லசித்தானங் வஸேன அதி⁴சேதஸோ, சதுஸச்சஸம்போ³த⁴படிபத்தியங் அப்பமாத³வஸேன அப்பமஜ்ஜதோ, மக்³க³ஞாணஸமன்னாக³மேன முனினோதி ஏவமேதேஸங் திண்ணங் பதா³னங் அத்தோ² யுஜ்ஜதியேவ. அத² வா ‘‘அப்பமஜ்ஜதோ ஸிக்க²தோ’’தி பதா³னங் ஹேதுஅத்த²தா த³ட்ட²ப்³பா³ அப்பமஜ்ஜனஹேது ஸிக்க²னஹேது ச அதி⁴சேதஸோதி.
37. Sattame apubbaṃ natthi. Gāthāya adhicetasoti adhicittavato, sabbacittānaṃ adhikena arahattaphalacittena samannāgatassāti attho. Appamajjatoti na pamajjato, appamādena anavajjadhammesu sātaccakiriyāya samannāgatassāti vuttaṃ hoti. Muninoti ‘‘yo munāti ubho loke, muni tena pavuccatī’’ti (dha. pa. 269; cūḷani. mettagūmāṇavapucchāniddesa 21) evaṃ ubhayalokamunanena monaṃ vuccati ñāṇaṃ, tena arahattaphalañāṇasaṅkhātena ñāṇena samannāgatattā vā khīṇāsavo muni nāma, tassa munino. Monapathesu sikkhatoti arahattañāṇasaṅkhātassa monassa pathesu sattatiṃsabodhipakkhiyadhammesu tīsu vā sikkhāsu sikkhato. Idañca pubbabhāgappaṭipadaṃ gahetvā vuttaṃ. Pariniṭṭhitasikkho hi arahā, tasmā evaṃ sikkhato, imāya sikkhāya munibhāvaṃ pattassa muninoti evamettha attho daṭṭhabbo. Yasmā ca etadeva, tasmā heṭṭhimamaggaphalacittānaṃ vasena adhicetaso, catusaccasambodhapaṭipattiyaṃ appamādavasena appamajjato, maggañāṇasamannāgamena muninoti evametesaṃ tiṇṇaṃ padānaṃ attho yujjatiyeva. Atha vā ‘‘appamajjato sikkhato’’ti padānaṃ hetuatthatā daṭṭhabbā appamajjanahetu sikkhanahetu ca adhicetasoti.
ஸோகா ந ப⁴வந்தி தாதி³னோதி தாதி³ஸஸ்ஸ கீ²ணாஸவமுனினோ அப்³ப⁴ந்தரே இட்ட²வியோகா³தி³வத்து²கா ஸோகா சித்தஸந்தாபா ந ஹொந்தி. அத² வா தாதி³னோதி தாதி³லக்க²ணஸமன்னாக³தஸ்ஸ ஏவரூபஸ்ஸ முனினோ ஸோகா ந ப⁴வந்தீதி அயமெத்த² அத்தோ². உபஸந்தஸ்ஸாதி ராகா³தீ³னங் அச்சந்தூபஸமேன உபஸந்தஸ்ஸ. ஸதா³ ஸதீமதோதி ஸதிவேபுல்லப்பத்தியா நிச்சகாலங் ஸதியா அவிரஹிதஸ்ஸ.
Sokā na bhavanti tādinoti tādisassa khīṇāsavamunino abbhantare iṭṭhaviyogādivatthukā sokā cittasantāpā na honti. Atha vā tādinoti tādilakkhaṇasamannāgatassa evarūpassa munino sokā na bhavantīti ayamettha attho. Upasantassāti rāgādīnaṃ accantūpasamena upasantassa. Sadā satīmatoti sativepullappattiyā niccakālaṃ satiyā avirahitassa.
எத்த² ச ‘‘அதி⁴சேதஸோ’’தி இமினா அதி⁴சித்தஸிக்கா², ‘‘அப்பமஜ்ஜதோ’’தி ஏதேன அதி⁴ஸீலஸிக்கா², ‘‘முனினோ மோனபதே²ஸு ஸிக்க²தோ’’தி ஏதேஹி அதி⁴பஞ்ஞாஸிக்கா². ‘‘முனினோ’’தி வா ஏதேன அதி⁴பஞ்ஞாஸிக்கா², ‘‘மோனபதே²ஸு ஸிக்க²தோ’’தி ஏதேன தாஸங் லோகுத்தரஸிக்கா²னங் புப்³ப³பா⁴க³படிபதா³, ‘‘ஸோகா ந ப⁴வந்தீ’’திஆதீ³ஹி ஸிக்கா²பாரிபூரியா ஆனிஸங்ஸோ பகாஸிதோதி வேதி³தப்³ப³ங். ஸேஸங் வுத்தனயமேவ.
Ettha ca ‘‘adhicetaso’’ti iminā adhicittasikkhā, ‘‘appamajjato’’ti etena adhisīlasikkhā, ‘‘munino monapathesu sikkhato’’ti etehi adhipaññāsikkhā. ‘‘Munino’’ti vā etena adhipaññāsikkhā, ‘‘monapathesu sikkhato’’ti etena tāsaṃ lokuttarasikkhānaṃ pubbabhāgapaṭipadā, ‘‘sokā na bhavantī’’tiādīhi sikkhāpāripūriyā ānisaṃso pakāsitoti veditabbaṃ. Sesaṃ vuttanayameva.
ஸத்தமஸுத்தவண்ணனா நிட்டி²தா.
Sattamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 7. ஸாரிபுத்தஸுத்தங் • 7. Sāriputtasuttaṃ
