| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
6. ததியனானாதித்தி²யஸுத்தவண்ணனா
6. Tatiyanānātitthiyasuttavaṇṇanā
56. ச²ட்டே² ஸப்³ப³ங் ஹெட்டா² வுத்தனயமேவ. இமங் உதா³னந்தி எத்த² பன தி³ட்டி²தண்ஹாமானேஸு தோ³ஸங் தி³ஸ்வா தே தூ³ரதோ வஜ்ஜெத்வா ஸங்கா²ரே யதா²பூ⁴தங் பஸ்ஸதோ ச தத்த² அனாதீ³னவத³ஸ்ஸிதாய மிச்சா²பி⁴னிவிட்ட²ஸ்ஸ யதா²பூ⁴தங் அபஸ்ஸதோ ச யதா²க்கமங் ஸங்ஸாரதோ அதிவத்தனானதிவத்தனதீ³பகங் இமங் உதா³னங் உதா³னேஸீதி அத்தோ² யோஜேதப்³போ³.
56. Chaṭṭhe sabbaṃ heṭṭhā vuttanayameva. Imaṃ udānanti ettha pana diṭṭhitaṇhāmānesu dosaṃ disvā te dūrato vajjetvā saṅkhāre yathābhūtaṃ passato ca tattha anādīnavadassitāya micchābhiniviṭṭhassa yathābhūtaṃ apassato ca yathākkamaṃ saṃsārato ativattanānativattanadīpakaṃ imaṃ udānaṃ udānesīti attho yojetabbo.
தத்த² அஹங்காரபஸுதாயங் பஜாதி ‘‘ஸயங்கதோ அத்தா ச லோகோ சா’’தி ஏவங் வுத்தஸயங்காரஸங்கா²தங் அஹங்காரங் ததா²பவத்தங் தி³ட்டி²ங் பஸுதா அனுயுத்தா அயங் பஜா மிச்சா²பி⁴னிவிட்டோ² ஸத்தகாயோ. பரங்காரூபஸங்ஹிதாதி பரோ அஞ்ஞோ இஸ்ஸராதி³கோ ஸப்³ப³ங் கரோதீதி ஏவங் பவத்தபரங்காரதி³ட்டி²ஸன்னிஸ்ஸிதா தாய உபஸங்ஹிதாதி பரங்காரூபஸங்ஹிதா. ஏததே³கே நாப்³ப⁴ஞ்ஞங்ஸூதி ஏதங் தி³ட்டி²த்³வயங் ஏகே ஸமணப்³ராஹ்மணா தத்த² தோ³ஸத³ஸ்ஸினோ ஹுத்வா நானுஜானிங்ஸு. கத²ங்? ஸதி ஹி ஸயங்காரே காமகாரதோ ஸத்தானங் இட்டே²னேவ ப⁴விதப்³ப³ங், ந அனிட்டே²ன. ந ஹி கோசி அத்தனோ து³க்க²ங் இச்ச²தி, ப⁴வதி ச அனிட்ட²ங், தஸ்மா ந ஸயங்காரோ. பரங்காரோபி யதி³ இஸ்ஸரஹேதுகோ, ஸ்வாயங் இஸ்ஸரோ அத்தத்த²ங் வா கரெய்ய பரத்த²ங் வா. தத்த² யதி³ அத்தத்த²ங், அத்தனா அகதகிச்சோ ஸியா அஸித்³த⁴ஸ்ஸ ஸாத⁴னதோ. அத² வா பரத்த²ங் ஸப்³பே³ஸங் ஹிதஸுக²மேவ நிப்ப²ஜ்ஜெய்ய, ந அஹிதங் து³க்க²ங் நிப்ப²ஜ்ஜதி, தஸ்மா இஸ்ஸரவஸேன ந பரங்காரோ ஸிஜ்ஜ²தி. யதி³ ச இஸ்ஸரஸங்கா²தங் அஞ்ஞனிரபெக்க²ங் நிச்சமேககாரணங் பவத்தியா ஸியா, கம்மேன உப்பத்தி ந ஸியா, ஸப்³பே³ஹேவ ஏகஜ்ஜ²ங் உப்பஜ்ஜிதப்³ப³ங் காரணஸ்ஸ ஸன்னிஹிதத்தா. அத²ஸ்ஸ அஞ்ஞம்பி ஸஹகாரீகாரணங் இச்சி²தங், தஞ்ஞேவ ஹேது, கிங் இஸ்ஸரேன அபரினிட்டி²தஸாமத்தி²யேன பரிகப்பிதேன. யதா² ச இஸ்ஸரஹேதுகோ பரங்காரோ ந ஸிஜ்ஜ²தி, ஏவங் பஜாபதிபுரிஸபகதிப்³ரஹ்மகாலாதி³ஹேதுதோபி ந ஸிஜ்ஜ²தேவ தேஸம்பி அஸித்³த⁴த்தா வுத்ததோ³ஸானதிவத்தனதோ ச. தேன வுத்தங் ‘‘ஏததே³கே நாப்³ப⁴ஞ்ஞங்ஸூ’’தி. யே பன யதா²வுத்தே ஸயங்காரபரங்காரே நானுஜானந்தாபி அதி⁴ச்சஸமுப்பன்னங் அத்தானஞ்ச லோகஞ்ச பஞ்ஞபெந்தி, தேபி ந நங் ஸல்லந்தி அத்³த³ஸுங் அதி⁴ச்சஸமுப்பன்னந்திவாதி³னோபி மிச்சா²பி⁴னிவேஸங் அனதிக்கமனதோ யதா²பூ⁴தங் அஜானந்தானங் தி³ட்டி²க³தங் தத்த² தத்த² து³க்கு²ப்பாத³னதோ விஜ்ஜ²னட்டே²ன ‘‘ஸல்ல’’ந்தி ந பஸ்ஸிங்ஸு.
Tattha ahaṅkārapasutāyaṃ pajāti ‘‘sayaṃkato attā ca loko cā’’ti evaṃ vuttasayaṃkārasaṅkhātaṃ ahaṅkāraṃ tathāpavattaṃ diṭṭhiṃ pasutā anuyuttā ayaṃ pajā micchābhiniviṭṭho sattakāyo. Paraṃkārūpasaṃhitāti paro añño issarādiko sabbaṃ karotīti evaṃ pavattaparaṃkāradiṭṭhisannissitā tāya upasaṃhitāti paraṃkārūpasaṃhitā. Etadeke nābbhaññaṃsūti etaṃ diṭṭhidvayaṃ eke samaṇabrāhmaṇā tattha dosadassino hutvā nānujāniṃsu. Kathaṃ? Sati hi sayaṃkāre kāmakārato sattānaṃ iṭṭheneva bhavitabbaṃ, na aniṭṭhena. Na hi koci attano dukkhaṃ icchati, bhavati ca aniṭṭhaṃ, tasmā na sayaṃkāro. Paraṃkāropi yadi issarahetuko, svāyaṃ issaro attatthaṃ vā kareyya paratthaṃ vā. Tattha yadi attatthaṃ, attanā akatakicco siyā asiddhassa sādhanato. Atha vā paratthaṃ sabbesaṃ hitasukhameva nipphajjeyya, na ahitaṃ dukkhaṃ nipphajjati, tasmā issaravasena na paraṃkāro sijjhati. Yadi ca issarasaṅkhātaṃ aññanirapekkhaṃ niccamekakāraṇaṃ pavattiyā siyā, kammena uppatti na siyā, sabbeheva ekajjhaṃ uppajjitabbaṃ kāraṇassa sannihitattā. Athassa aññampi sahakārīkāraṇaṃ icchitaṃ, taññeva hetu, kiṃ issarena apariniṭṭhitasāmatthiyena parikappitena. Yathā ca issarahetuko paraṃkāro na sijjhati, evaṃ pajāpatipurisapakatibrahmakālādihetutopi na sijjhateva tesampi asiddhattā vuttadosānativattanato ca. Tena vuttaṃ ‘‘etadeke nābbhaññaṃsū’’ti. Ye pana yathāvutte sayaṃkāraparaṃkāre nānujānantāpi adhiccasamuppannaṃ attānañca lokañca paññapenti, tepi na naṃ sallanti addasuṃ adhiccasamuppannantivādinopi micchābhinivesaṃ anatikkamanato yathābhūtaṃ ajānantānaṃ diṭṭhigataṃ tattha tattha dukkhuppādanato vijjhanaṭṭhena ‘‘salla’’nti na passiṃsu.
ஏதஞ்ச ஸல்லங் படிகச்ச பஸ்ஸதோதி யோ பன ஆரத்³த⁴விபஸ்ஸகோ பஞ்சபி உபாதா³னக்க²ந்தே⁴ அனிச்சதோ து³க்க²தோ அனத்ததோ ஸமனுபஸ்ஸதி, ஸோ ஏதஞ்ச திவித⁴ங் விபரீதத³ஸ்ஸனங் அஞ்ஞஞ்ச ஸகலங் மிச்சா²பி⁴னிவேஸங் தேஸஞ்ச நிஸ்ஸயபூ⁴தே பஞ்சுபாதா³னக்க²ந்தே⁴பி துஜ்ஜனதோ து³ருத்³தா⁴ரதோ ச ‘‘ஸல்ல’’ந்தி படிகச்ச புப்³பே³யேவ விபஸ்ஸனாபஞ்ஞாய பஸ்ஸதி. ஏவங் பஸ்ஸதோ அரியமக்³க³க்க²ணே ஏகந்தேனேவ அஹங் கரோமீதி ந தஸ்ஸ ஹோதி. யதா² ச அத்தனோ காரகபா⁴வோ தஸ்ஸ ந உபட்டா²தி, ஏவங் பரோ கரோதீதி ந தஸ்ஸ ஹோதி, கேவலங் பன அனிச்சஸங்கா²தங் படிச்சஸமுப்பன்னத⁴ம்மமத்தமேவ ஹோதி. எத்தாவதா ஸம்மாபடிபன்னஸ்ஸ ஸப்³ப³தா²பி தி³ட்டி²மானாபா⁴வோவ த³ஸ்ஸிதோ. தேன ச அரஹத்தப்பத்தியா ஸங்ஸாரஸமதிக்கமோ பகாஸிதோ ஹோதி.
Etañca sallaṃ paṭikacca passatoti yo pana āraddhavipassako pañcapi upādānakkhandhe aniccato dukkhato anattato samanupassati, so etañca tividhaṃ viparītadassanaṃ aññañca sakalaṃ micchābhinivesaṃ tesañca nissayabhūte pañcupādānakkhandhepi tujjanato duruddhārato ca ‘‘salla’’nti paṭikacca pubbeyeva vipassanāpaññāya passati. Evaṃ passato ariyamaggakkhaṇe ekanteneva ahaṃ karomīti na tassa hoti. Yathā ca attano kārakabhāvo tassa na upaṭṭhāti, evaṃ paro karotīti na tassa hoti, kevalaṃ pana aniccasaṅkhātaṃ paṭiccasamuppannadhammamattameva hoti. Ettāvatā sammāpaṭipannassa sabbathāpi diṭṭhimānābhāvova dassito. Tena ca arahattappattiyā saṃsārasamatikkamo pakāsito hoti.
இதா³னி யோ தி³ட்டி²க³தே அல்லீனோ, ந ஸோ ஸங்ஸாரதோ ஸீஸங் உக்கி²பிதுங் ஸக்கோதி, தங் த³ஸ்ஸேதுங் ‘‘மானுபேதா’’தி கா³த²மாஹ. தத்த² மானுபேதா அயங் பஜாதி அயங் ஸப்³பா³பி தி³ட்டி²க³திகஸங்கா²தா பஜா ஸத்தகாயோ ‘‘மய்ஹங் தி³ட்டி² ஸுந்த³ரா, மய்ஹங் ஆதா³னோ ஸுந்த³ரோ’’தி அத்தனோ கா³ஹஸ்ஸ ஸங்பக்³க³ஹலக்க²ணேன மானேன உபேதா ஸமன்னாக³தா. மானக³ந்தா² மானவினிப³த்³தா⁴தி ததோ ஏவ தேன அபராபரங் உப்பஜ்ஜமானேன யதா² தங் தி³ட்டி²ங் ந படினிஸ்ஸஜ்ஜதி, ஏவங் அத்தனோ ஸந்தானஸ்ஸ க³ந்தி²தத்தா வினிப³த்³த⁴த்தா ச மானக³ந்தா² மானவினிப³த்³தா⁴. தி³ட்டீ²ஸு ஸாரம்ப⁴கதா², ஸங்ஸாரங் நாதிவத்ததீதி ‘‘இத³மேவ ஸச்சங் மோக⁴மஞ்ஞ’’ந்தி அத்துக்கங்ஸனபரவம்ப⁴னவஸேன அத்தனோ தி³ட்டா²பி⁴னிவேஸேன பரேஸங் தி³ட்டீ²ஸு ஸாரம்ப⁴கதா² விரோத⁴கதா² ஸங்ஸாரனாயிகானங் அவிஜ்ஜாதண்ஹானங் அப்பஹானதோ ஸங்ஸாரங் நாதிவத்ததி, ந அதிக்கமதீதி அத்தோ².
Idāni yo diṭṭhigate allīno, na so saṃsārato sīsaṃ ukkhipituṃ sakkoti, taṃ dassetuṃ ‘‘mānupetā’’ti gāthamāha. Tattha mānupetā ayaṃ pajāti ayaṃ sabbāpi diṭṭhigatikasaṅkhātā pajā sattakāyo ‘‘mayhaṃ diṭṭhi sundarā, mayhaṃ ādāno sundaro’’ti attano gāhassa saṃpaggahalakkhaṇena mānena upetā samannāgatā. Mānaganthā mānavinibaddhāti tato eva tena aparāparaṃ uppajjamānena yathā taṃ diṭṭhiṃ na paṭinissajjati, evaṃ attano santānassa ganthitattā vinibaddhattā ca mānaganthā mānavinibaddhā. Diṭṭhīsu sārambhakathā, saṃsāraṃ nātivattatīti ‘‘idameva saccaṃ moghamañña’’nti attukkaṃsanaparavambhanavasena attano diṭṭhābhinivesena paresaṃ diṭṭhīsu sārambhakathā virodhakathā saṃsāranāyikānaṃ avijjātaṇhānaṃ appahānato saṃsāraṃ nātivattati, na atikkamatīti attho.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 6. ததியனானாதித்தி²யஸுத்தங் • 6. Tatiyanānātitthiyasuttaṃ
