| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૨. ઉપાદાનસુત્તવણ્ણના
2. Upādānasuttavaṇṇanā
૫૨. આરમ્મણાદિભાવેન સંવત્તનતો ઉપાદાનાનં હિતાનિ ઉપાદાનિયાનિ, તેસુ ઉપાદાનિયેસુ. તેનાહ ‘‘ચતુન્નં ઉપાદાનાનં પચ્ચયેસૂ’’તિ. અસ્સાદં અનુપસ્સન્તસ્સાતિ અસાદેતબ્બં મિચ્છાઞાણેન અનુપસ્સતો. તદાહારોતિ સોળસ વા વીસં તિંસં ચત્તાલીસં પઞ્ઞાસં વા આહારો પચ્ચયો એતસ્સાતિ તદાહારો. અગ્ગિક્ખન્ધો વિય તયો ભવા એકાદસહિ અગ્ગીહિ આદિત્તભાવતો એતદેવ ભવત્તયં. અગ્ગિ…પે॰… પુથુજ્જનો અગ્ગિક્ખન્ધસદિસસ્સ ભવત્તયસ્સ પરિબન્ધનતો.
52. Ārammaṇādibhāvena saṃvattanato upādānānaṃ hitāni upādāniyāni, tesu upādāniyesu. Tenāha ‘‘catunnaṃ upādānānaṃ paccayesū’’ti. Assādaṃ anupassantassāti asādetabbaṃ micchāñāṇena anupassato. Tadāhāroti soḷasa vā vīsaṃ tiṃsaṃ cattālīsaṃ paññāsaṃ vā āhāro paccayo etassāti tadāhāro. Aggikkhandho viya tayo bhavā ekādasahi aggīhi ādittabhāvato etadeva bhavattayaṃ. Aggi…pe… puthujjano aggikkhandhasadisassa bhavattayassa paribandhanato.
કમ્મટ્ઠાનસ્સાતિ વિપસ્સનાકમ્મટ્ઠાનસ્સ. તેનાહ ‘‘તેભૂમકધમ્મેસૂ’’તિ. ધમ્મપાસાદન્તિ લોકુત્તરધમ્મપાસાદં. સો હિ અચ્ચુગ્ગતટ્ઠેન ‘‘પાસાદો’’તિ વુચ્ચતિ. સતિપટ્ઠાનમહાવીથિયં ફલક્ખણે પવત્તાયાતિ.
Kammaṭṭhānassāti vipassanākammaṭṭhānassa. Tenāha ‘‘tebhūmakadhammesū’’ti. Dhammapāsādanti lokuttaradhammapāsādaṃ. So hi accuggataṭṭhena ‘‘pāsādo’’ti vuccati. Satipaṭṭhānamahāvīthiyaṃ phalakkhaṇe pavattāyāti.
ઉપાદાનસુત્તવણ્ણના નિટ્ઠિતા.
Upādānasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૨. ઉપાદાનસુત્તં • 2. Upādānasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૨. ઉપાદાનસુત્તવણ્ણના • 2. Upādānasuttavaṇṇanā
