Library / Tipiṭaka / તિપિટક • Tipiṭaka / વિમતિવિનોદની-ટીકા • Vimativinodanī-ṭīkā |
ઉપનન્દવત્થુકથાવણ્ણના
Upanandavatthukathāvaṇṇanā
૩૧૯. પાળિયં ઉભયત્થ પરિબાહિરોતિ કમેન ઉભયસ્સપિ મુત્તત્તા વુત્તં, ન સબ્બથા ઉભયતો પરિબાહિરત્તા. તેનાહ ‘‘પચ્છિમે…પે॰… તિટ્ઠતી’’તિ.
319. Pāḷiyaṃ ubhayattha paribāhiroti kamena ubhayassapi muttattā vuttaṃ, na sabbathā ubhayato paribāhirattā. Tenāha ‘‘pacchime…pe… tiṭṭhatī’’ti.
૩૨૦. યં તિણ્ણં પહોતીતિ મઞ્ચપીઠવિનિમુત્તં યં આસનં તિણ્ણં સુખં નિસીદિતું પહોતિ, ઇદં પચ્છિમદીઘાસનં. એત્થ મઞ્ચપીઠરહિતેસુ અસમાનાસનિકાપિ તયો નિસીદિતું લભન્તિ. મઞ્ચપીઠેસુ પન દ્વે. અદીઘાસનેસુ મઞ્ચપીઠેસુ સમાનાસનિકા એવ દ્વે નિસીદિતું લભન્તિ દુવગ્ગસ્સેવ અનુઞ્ઞાતત્તા.
320.Yaṃ tiṇṇaṃ pahotīti mañcapīṭhavinimuttaṃ yaṃ āsanaṃ tiṇṇaṃ sukhaṃ nisīdituṃ pahoti, idaṃ pacchimadīghāsanaṃ. Ettha mañcapīṭharahitesu asamānāsanikāpi tayo nisīdituṃ labhanti. Mañcapīṭhesu pana dve. Adīghāsanesu mañcapīṭhesu samānāsanikā eva dve nisīdituṃ labhanti duvaggasseva anuññātattā.
હત્થિનખો હેટ્ઠાભાગે એતસ્સ અત્થીતિ હત્થિનખો, પાસાદો. પાસાદસ્સ નખો નામ હેટ્ઠિમભાગો પાદનખસદિસત્તા, સો સબ્બદિસાસુ અનેકેહિ હત્થિરૂપેહિ સમલઙ્કતો ઠિતો. તસ્સૂપરિ કતો પાસાદો હત્થિકુમ્ભે પતિટ્ઠિતો વિય હોતીતિ આહ ‘‘હત્થિકુમ્ભે પતિટ્ઠિત’’ન્તિ. સુવણ્ણરજતાદિવિચિત્રાનીતિ સઙ્ઘિકસેનાસનં સન્ધાય વુત્તં. પુગ્ગલિકં પન સુવણ્ણાદિવિચિત્રં ભિક્ખુસ્સ સમ્પટિચ્છિતુમેવ ન વટ્ટતિ ‘‘ન કેનચિ પરિયાયેન જાતરૂપરજતં સાદિતબ્બ’’ન્તિ (મહાવ॰ ૨૯૯) વુત્તત્તા. તેનેવેત્થ અટ્ઠકથાયં ‘‘સઙ્ઘિકવિહારે વા પુગ્ગલિકવિહારે વા’’તિ ન વુત્તં, ગોનકાદિઅકપ્પિયભણ્ડવિસયે એવ વુત્તં એકભિક્ખુસ્સાપિ તેસં ગહણે દોસાભાવા. ગિહિવિકટનીહારેનાતિ ગિહીહિ કતનીહારેન, ગિહીહિ અત્તનો સન્તકં અત્થરિત્વા દિન્નનિયામેનાતિ અત્થો. લબ્ભન્તીતિ નિસીદિતું લબ્ભન્તિ.
Hatthinakho heṭṭhābhāge etassa atthīti hatthinakho, pāsādo. Pāsādassa nakho nāma heṭṭhimabhāgo pādanakhasadisattā, so sabbadisāsu anekehi hatthirūpehi samalaṅkato ṭhito. Tassūpari kato pāsādo hatthikumbhe patiṭṭhito viya hotīti āha ‘‘hatthikumbhe patiṭṭhita’’nti. Suvaṇṇarajatādivicitrānīti saṅghikasenāsanaṃ sandhāya vuttaṃ. Puggalikaṃ pana suvaṇṇādivicitraṃ bhikkhussa sampaṭicchitumeva na vaṭṭati ‘‘na kenaci pariyāyena jātarūparajataṃ sāditabba’’nti (mahāva. 299) vuttattā. Tenevettha aṭṭhakathāyaṃ ‘‘saṅghikavihāre vā puggalikavihāre vā’’ti na vuttaṃ, gonakādiakappiyabhaṇḍavisaye eva vuttaṃ ekabhikkhussāpi tesaṃ gahaṇe dosābhāvā. Gihivikaṭanīhārenāti gihīhi katanīhārena, gihīhi attano santakaṃ attharitvā dinnaniyāmenāti attho. Labbhantīti nisīdituṃ labbhanti.
ઉપનન્દવત્થુકથાવણ્ણના નિટ્ઠિતા.
Upanandavatthukathāvaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / ચૂળવગ્ગપાળિ • Cūḷavaggapāḷi / ૩. તતિયભાણવારો • 3. Tatiyabhāṇavāro
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / ચૂળવગ્ગ-અટ્ઠકથા • Cūḷavagga-aṭṭhakathā / ઉપનન્દવત્થુકથા • Upanandavatthukathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ઉપનન્દવત્થુકથાવણ્ણના • Upanandavatthukathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ઉપનન્દવત્થુકથાવણ્ણના • Upanandavatthukathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ઉપનન્દવત્થુકથા • Upanandavatthukathā