| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
9. விஸாகா²ஸுத்தவண்ணனா
9. Visākhāsuttavaṇṇanā
19. நவமே புப்³பா³ராமேதி ஸாவத்தி²யா பாசீனதி³ஸாபா⁴கே³ அனுராத⁴புரஸ்ஸ உத்தமதே³வீவிஹாரஸதி³ஸே டா²னே காரிதே ஆராமே. மிகா³ரமாதுபாஸாதே³தி மிகா³ரமாதுயா பாஸாதே³.
19. Navame pubbārāmeti sāvatthiyā pācīnadisābhāge anurādhapurassa uttamadevīvihārasadise ṭhāne kārite ārāme. Migāramātupāsādeti migāramātuyā pāsāde.
தத்ராயங் அனுபுப்³பி³கதா² – அதீதே ஸதஸஹஸ்ஸகப்பமத்த²கே பது³முத்தரத³ஸப³லங் ஏகா உபாஸிகா அஞ்ஞதரங் உபாஸிகங் அத்தனோ அக்³கு³பட்டா²யிகட்டா²னே ட²பெந்தங் தி³ஸ்வா ப⁴க³வந்தங் நிமந்தெத்வா பு³த்³த⁴ப்பமுக²ஸ்ஸ பி⁴க்கு²ஸதஸஹஸ்ஸஸ்ஸ தா³னங் த³த்வா ப⁴க³வதோ நிபச்சகாரங் கத்வா ‘‘அனாக³தே தும்ஹாதி³ஸஸ்ஸ பு³த்³த⁴ஸ்ஸ அக்³கு³பட்டா²யிகா ப⁴வெய்ய’’ந்தி பத்த²னங் அகாஸி. ஸா கப்பஸதஸஹஸ்ஸங் தே³வேஸு ச மனுஸ்ஸேஸு ச ஸங்ஸரித்வா அம்ஹாகங் ப⁴க³வதோ காலே ப⁴த்³தி³யனக³ரே மெண்ட³கஸெட்டி²புத்தஸ்ஸ த⁴னஞ்ஜயஸெட்டி²னோ கே³ஹே ஸுமனதே³வியா குச்சி²ஸ்மிங் படிஸந்தி⁴ங் க³ண்ஹி. ஜாதகாலே சஸ்ஸா விஸாகா²தி நாமங் அகங்ஸு. ஸா யதா³ ப⁴க³வா ப⁴த்³தி³யனக³ரங் அக³மாஸி, ததா³ பஞ்சஹி தா³ரிகாஸதேஹி ஸத்³தி⁴ங் ப⁴க³வதோ பச்சுக்³க³மனங் கத்வா பட²மத³ஸ்ஸனேனேவ ஸோதாபன்னா அஹோஸி.
Tatrāyaṃ anupubbikathā – atīte satasahassakappamatthake padumuttaradasabalaṃ ekā upāsikā aññataraṃ upāsikaṃ attano aggupaṭṭhāyikaṭṭhāne ṭhapentaṃ disvā bhagavantaṃ nimantetvā buddhappamukhassa bhikkhusatasahassassa dānaṃ datvā bhagavato nipaccakāraṃ katvā ‘‘anāgate tumhādisassa buddhassa aggupaṭṭhāyikā bhaveyya’’nti patthanaṃ akāsi. Sā kappasatasahassaṃ devesu ca manussesu ca saṃsaritvā amhākaṃ bhagavato kāle bhaddiyanagare meṇḍakaseṭṭhiputtassa dhanañjayaseṭṭhino gehe sumanadeviyā kucchismiṃ paṭisandhiṃ gaṇhi. Jātakāle cassā visākhāti nāmaṃ akaṃsu. Sā yadā bhagavā bhaddiyanagaraṃ agamāsi, tadā pañcahi dārikāsatehi saddhiṃ bhagavato paccuggamanaṃ katvā paṭhamadassaneneva sotāpannā ahosi.
அபரபா⁴கே³ ஸாவத்தி²யங் மிகா³ரஸெட்டி²புத்தஸ்ஸ புண்ணவட்³ட⁴னகுமாரஸ்ஸ கே³ஹங் க³தா, தத்த² நங் ஸஸுரோ மிகா³ரஸெட்டி² உபகாரவஸேன மாதுட்டா²னே ட²பேஸி. தஸ்மா மிகா³ரமாதாதி வுச்சதி. ஸா அத்தனோ மஹல்லதாபஸாத⁴னங் விஸ்ஸஜ்ஜெத்வா நவகோடீஹி ப⁴க³வதோ பி⁴க்கு²ஸங்க⁴ஸ்ஸ ச வஸனத்தா²ய கரீஸமத்தே பூ⁴மிபா⁴கே³ உபரிபூ⁴மியங் பஞ்சக³ப்³ப⁴ஸதானி ஹெட்டா²பூ⁴மியங் பஞ்சக³ப்³ப⁴ஸதானீதி க³ப்³ப⁴ஸஹஸ்ஸேஹி படிமண்டி³தங் பாஸாத³ங் காரேஸி. தேன வுத்தங் ‘‘மிகா³ரமாதுபாஸாதே³’’தி.
Aparabhāge sāvatthiyaṃ migāraseṭṭhiputtassa puṇṇavaḍḍhanakumārassa gehaṃ gatā, tattha naṃ sasuro migāraseṭṭhi upakāravasena mātuṭṭhāne ṭhapesi. Tasmā migāramātāti vuccati. Sā attano mahallatāpasādhanaṃ vissajjetvā navakoṭīhi bhagavato bhikkhusaṅghassa ca vasanatthāya karīsamatte bhūmibhāge uparibhūmiyaṃ pañcagabbhasatāni heṭṭhābhūmiyaṃ pañcagabbhasatānīti gabbhasahassehi paṭimaṇḍitaṃ pāsādaṃ kāresi. Tena vuttaṃ ‘‘migāramātupāsāde’’ti.
கோசிதே³வ அத்தோ²தி கிஞ்சிதே³வ பயோஜனங். ரஞ்ஞேதி ராஜினி. படிப³த்³தோ⁴தி ஆயத்தோ. விஸாகா²ய ஞாதிகுலதோ மணிமுத்தாதி³ரசிதங் தாதி³ஸங் ப⁴ண்ட³ஜாதங் தஸ்ஸா பண்ணாகாரத்தா²ய பேஸிதங், தங் நக³ரத்³வாரப்பத்தங் ஸுங்கிகா தத்த² ஸுங்கங் க³ண்ஹந்தா தத³னுரூபங் அக்³க³ஹெத்வா அதிரேகங் க³ண்ஹிங்ஸு. தங் ஸுத்வா விஸாகா² ரஞ்ஞோ தமத்த²ங் நிவேதே³துகாமா பதிரூபபரிவாரேன ராஜனிவேஸனங் அக³மாஸி, தஸ்மிங் க²ணே ராஜா மல்லிகாய தே³வியா ஸத்³தி⁴ங் அந்தேபுரங் க³தோ ஹோதி. விஸாகா² ஓகாஸங் அலப⁴மானா ‘‘இதா³னி லபி⁴ஸ்ஸாமி, இதா³னி லபி⁴ஸ்ஸாமீ’’தி போ⁴ஜனவேலங் அதிக்கமித்வா சி²ன்னப⁴த்தா ஹுத்வா பக்காமி. ஏவங் த்³வீஹதீஹங் க³ந்த்வாபி ஓகாஸங் ந லபி⁴யேவ. இதி ராஜா அனிவேதி³தோபி தஸ்ஸ அத்த²வினிச்ச²யஸ்ஸ ஓகாஸாகரணேன ‘‘யதா²தி⁴ப்பாயங் ந தீரேதீ’’தி வுத்தோ. தத்த² யதா²தி⁴ப்பாயந்தி அதி⁴ப்பாயானுரூபங். ந தீரேதீதி ந நிட்டா²பேதி. மஹாஉபாஸிகாய ஹி ராஜாயத்தஸுங்கமேவ ரஞ்ஞோ த³த்வா இதரங் விஸ்ஸஜ்ஜாபேதுங் அதி⁴ப்பாயோ, ஸோ ரஞ்ஞா ந தி³ட்ட²த்தா ஏவ ந தீரிதோ. ஹந்தா³தி வொஸ்ஸக்³க³த்தே² நிபாதோ. தி³வா தி³வஸ்ஸாதி தி³வஸஸ்ஸ தி³வா, மஜ்ஜ²ன்ஹிகே காலேதி அத்தோ². கேனசிதே³வ கரணீயேன த்³வீஹதீஹங் ராஜனிவேஸனத்³வாரங் க³ச்ச²ந்தீ தஸ்ஸ அத்த²ஸ்ஸ அனிட்டி²தத்தா நிரத்த²கமேவ உபஸங்கமிங் , ப⁴க³வதி உபஸங்கமனமேவ பன த³ஸ்ஸனானுத்தரியாதி³ப்படிலாப⁴காரணத்தா ஸாத்த²கந்தி ஏவாஹங், ப⁴ந்தே, இமாய வேலாய இதா⁴க³தாதி இமமத்த²ங் த³ஸ்ஸெந்தீ மஹாஉபாஸிகா ‘‘இத⁴ மே, ப⁴ந்தே’’திஆதி³மாஹ.
Kocideva atthoti kiñcideva payojanaṃ. Raññeti rājini. Paṭibaddhoti āyatto. Visākhāya ñātikulato maṇimuttādiracitaṃ tādisaṃ bhaṇḍajātaṃ tassā paṇṇākāratthāya pesitaṃ, taṃ nagaradvārappattaṃ suṅkikā tattha suṅkaṃ gaṇhantā tadanurūpaṃ aggahetvā atirekaṃ gaṇhiṃsu. Taṃ sutvā visākhā rañño tamatthaṃ nivedetukāmā patirūpaparivārena rājanivesanaṃ agamāsi, tasmiṃ khaṇe rājā mallikāya deviyā saddhiṃ antepuraṃ gato hoti. Visākhā okāsaṃ alabhamānā ‘‘idāni labhissāmi, idāni labhissāmī’’ti bhojanavelaṃ atikkamitvā chinnabhattā hutvā pakkāmi. Evaṃ dvīhatīhaṃ gantvāpi okāsaṃ na labhiyeva. Iti rājā aniveditopi tassa atthavinicchayassa okāsākaraṇena ‘‘yathādhippāyaṃ na tīretī’’ti vutto. Tattha yathādhippāyanti adhippāyānurūpaṃ. Na tīretīti na niṭṭhāpeti. Mahāupāsikāya hi rājāyattasuṅkameva rañño datvā itaraṃ vissajjāpetuṃ adhippāyo, so raññā na diṭṭhattā eva na tīrito. Handāti vossaggatthe nipāto. Divā divassāti divasassa divā, majjhanhike kāleti attho. Kenacideva karaṇīyena dvīhatīhaṃ rājanivesanadvāraṃ gacchantī tassa atthassa aniṭṭhitattā niratthakameva upasaṅkamiṃ , bhagavati upasaṅkamanameva pana dassanānuttariyādippaṭilābhakāraṇattā sātthakanti evāhaṃ, bhante, imāya velāya idhāgatāti imamatthaṃ dassentī mahāupāsikā ‘‘idha me, bhante’’tiādimāha.
ஏதமத்த²ந்தி ஏதங் பராயத்ததாய அதி⁴ப்பாயாஸமிஜ்ஜ²னஸங்கா²தங் அத்த²ங் விதி³த்வா. இமங் உதா³னந்தி இமங் பராதீ⁴னாபராதீ⁴னவுத்தீஸு ஆதீ³னவானிஸங்ஸபரிதீ³பகங் உதா³னங் உதா³னேஸி.
Etamatthanti etaṃ parāyattatāya adhippāyāsamijjhanasaṅkhātaṃ atthaṃ viditvā. Imaṃ udānanti imaṃ parādhīnāparādhīnavuttīsu ādīnavānisaṃsaparidīpakaṃ udānaṃ udānesi.
தத்த² ஸப்³ப³ங் பரவஸங் து³க்க²ந்தி யங் கிஞ்சி அத்த²ஜாதங் பயோஜனங் பரவஸங் பராயத்தங் அத்தனோ இச்சா²ய நிப்பா²தே³துங் அஸக்குணெய்யதாய து³க்க²ங் து³க்கா²வஹங் ஹோதீதி அத்தோ². ஸப்³ப³ங் இஸ்ஸரியங் ஸுக²ந்தி து³வித⁴ங் இஸ்ஸரியங் லோகியங் லோகுத்தரஞ்ச. தத்த² லோகியங் ராஜிஸ்ஸரியாதி³ சேவ லோகியஜ்ஜா²னாபி⁴ஞ்ஞானிப்³ப³த்தங் சித்திஸ்ஸரியஞ்ச, லோகுத்தரங் மக்³க³ப²லாதி⁴க³மனிமித்தங் நிரோதி⁴ஸ்ஸரியங். தேஸு யங் சக்கவத்திபா⁴வபரியோஸானங் மனுஸ்ஸேஸு இஸ்ஸரியங், யஞ்ச ஸக்காதீ³னங் தஸ்மிங் தஸ்மிங் தே³வனிகாயே ஆதி⁴பச்சபூ⁴தங் இஸ்ஸரியங், தது³ப⁴யங் யதி³பி கம்மானுபா⁴வேன யதி²ச்சி²தனிப்ப²த்தியா ஸுக²னிமித்ததாய ஸுக²ங், விபரிணாமது³க்க²தாய பன ஸப்³ப³தா² து³க்க²மேவ. ததா² அனிச்சந்திகதாய லோகியஜ்ஜா²னநிப்³ப³த்தங் சித்திஸ்ஸரியங், நிரோதி⁴ஸ்ஸரியமேவ பன லோகத⁴ம்மேஹி அகம்பனீயதோ அனிவத்திஸபா⁴வத்தா ச ஏகந்தஸுக²ங் நாம. யங் பனெத்த² ஸப்³ப³த்தே²வ அபராதீ⁴னதாய லப⁴தி சித்தஸுக²ங், தங் ஸந்தா⁴ய ஸத்தா² ‘‘ஸப்³ப³ங் இஸ்ஸரியங் ஸுக²’’ந்தி ஆஹ.
Tattha sabbaṃ paravasaṃ dukkhanti yaṃ kiñci atthajātaṃ payojanaṃ paravasaṃ parāyattaṃ attano icchāya nipphādetuṃ asakkuṇeyyatāya dukkhaṃ dukkhāvahaṃ hotīti attho. Sabbaṃ issariyaṃ sukhanti duvidhaṃ issariyaṃ lokiyaṃ lokuttarañca. Tattha lokiyaṃ rājissariyādi ceva lokiyajjhānābhiññānibbattaṃ cittissariyañca, lokuttaraṃ maggaphalādhigamanimittaṃ nirodhissariyaṃ. Tesu yaṃ cakkavattibhāvapariyosānaṃ manussesu issariyaṃ, yañca sakkādīnaṃ tasmiṃ tasmiṃ devanikāye ādhipaccabhūtaṃ issariyaṃ, tadubhayaṃ yadipi kammānubhāvena yathicchitanipphattiyā sukhanimittatāya sukhaṃ, vipariṇāmadukkhatāya pana sabbathā dukkhameva. Tathā aniccantikatāya lokiyajjhānanibbattaṃ cittissariyaṃ, nirodhissariyameva pana lokadhammehi akampanīyato anivattisabhāvattā ca ekantasukhaṃ nāma. Yaṃ panettha sabbattheva aparādhīnatāya labhati cittasukhaṃ, taṃ sandhāya satthā ‘‘sabbaṃ issariyaṃ sukha’’nti āha.
ஸாதா⁴ரணே விஹஞ்ஞந்தீதி இத³ங் ‘‘ஸப்³ப³ங் பரவஸங் து³க்க²’’ந்தி இமஸ்ஸ பத³ஸ்ஸ அத்த²விவரணங். அயஞ்ஹெத்த² அத்தோ² – ஸாதா⁴ரணே பயோஜனே ஸாதே⁴தப்³பே³ ஸதி தஸ்ஸ பராதீ⁴னதாய யதா²தி⁴ப்பாயங் அனிப்பா²த³னதோ இமே ஸத்தா விஹஞ்ஞந்தி விகா⁴தங் ஆபஜ்ஜந்தி கிலமந்தி. கஸ்மா? யோகா³ ஹி து³ரதிக்கமாதி யஸ்மா காமயோக³ப⁴வயோக³தி³ட்டி²யோக³அவிஜ்ஜாயோகா³ அனாதி³காலபா⁴விதா அனுபசிதகுஸலஸம்பா⁴ரேஹி பஜஹிதுங் அஸக்குணெய்யதாய து³ரதிக்கமா. ஏதேஸு தி³ட்டி²யோகோ³ பட²மமக்³கே³ன அதிக்கமிதப்³போ³, காமயோகோ³ ததியமக்³கே³ன. இதரே அக்³க³மக்³கே³ன. இதி அரியமக்³கா³னங் து³ரதி⁴க³மனீயத்தா இமே யோகா³ து³ரதிக்கமா. தஸ்மா காமயோகா³தி³வஸேன இச்சி²தாலாப⁴ஹேது ஸத்தா விஹஞ்ஞந்தி, அஸாதா⁴ரணே பன சித்திஸ்ஸரியே நிரோதி⁴ஸ்ஸரியே ச ஸதி ந கதா³சிபி விகா⁴தஸ்ஸ ஸம்ப⁴வோதி அதி⁴ப்பாயோ.
Sādhāraṇe vihaññantīti idaṃ ‘‘sabbaṃ paravasaṃ dukkha’’nti imassa padassa atthavivaraṇaṃ. Ayañhettha attho – sādhāraṇe payojane sādhetabbe sati tassa parādhīnatāya yathādhippāyaṃ anipphādanato ime sattā vihaññanti vighātaṃ āpajjanti kilamanti. Kasmā? Yogā hi duratikkamāti yasmā kāmayogabhavayogadiṭṭhiyogaavijjāyogā anādikālabhāvitā anupacitakusalasambhārehi pajahituṃ asakkuṇeyyatāya duratikkamā. Etesu diṭṭhiyogo paṭhamamaggena atikkamitabbo, kāmayogo tatiyamaggena. Itare aggamaggena. Iti ariyamaggānaṃ duradhigamanīyattā ime yogā duratikkamā. Tasmā kāmayogādivasena icchitālābhahetu sattā vihaññanti, asādhāraṇe pana cittissariye nirodhissariye ca sati na kadācipi vighātassa sambhavoti adhippāyo.
அத² வா ஸப்³ப³ங் பரவஸந்தி யங் அத்தனோ அஞ்ஞப்படிப³த்³த⁴வுத்திஸங்கா²தங், தங் ஸப்³ப³ங் அனிச்சஸபா⁴வதாய து³க்க²ங். ‘‘யத³னிச்சங் தங் து³க்க²’’ந்தி ஹி வுத்தங். ஸப்³ப³ங் இஸ்ஸரியந்தி யங் ஸப்³ப³ஸங்க²தனிஸ்ஸடங் இஸ்ஸரியட்டா²னதாய இஸ்ஸரியந்தி லத்³த⁴னாமங் நிப்³பா³னங், தங் உபாதி³ஸேஸாதி³விபா⁴க³ங் ஸப்³ப³ங் ஸுக²ங். ‘‘நிப்³பா³னங் பரமங் ஸுக²’’ந்தி (த⁴॰ ப॰ 203-204) ஹி வுத்தங். ஸாதா⁴ரணேதி ஏவங் து³க்க²ஸுகே² வவத்தி²தே இமே ஸத்தா ப³ஹுஸாதா⁴ரணே து³க்க²காரணே நிமுக்³கா³ ஹுத்வா விஹஞ்ஞந்தி. கஸ்மா? யோகா³ ஹி து³ரதிக்கமாதி யஸ்மா தே ஸப்³ப³த்த² நிமுஜ்ஜனஸ்ஸ ஹேதுபூ⁴தா காமயோகா³த³யோ து³ரதிக்கமா, தஸ்மா த்வம்பி விஸாகே² பராயத்தமத்த²ங் பத்தெ²த்வா அலப⁴மானா விஹஞ்ஞஸீதி அதி⁴ப்பாயோ.
Atha vā sabbaṃ paravasanti yaṃ attano aññappaṭibaddhavuttisaṅkhātaṃ, taṃ sabbaṃ aniccasabhāvatāya dukkhaṃ. ‘‘Yadaniccaṃ taṃ dukkha’’nti hi vuttaṃ. Sabbaṃ issariyanti yaṃ sabbasaṅkhatanissaṭaṃ issariyaṭṭhānatāya issariyanti laddhanāmaṃ nibbānaṃ, taṃ upādisesādivibhāgaṃ sabbaṃ sukhaṃ. ‘‘Nibbānaṃ paramaṃ sukha’’nti (dha. pa. 203-204) hi vuttaṃ. Sādhāraṇeti evaṃ dukkhasukhe vavatthite ime sattā bahusādhāraṇe dukkhakāraṇe nimuggā hutvā vihaññanti. Kasmā? Yogā hi duratikkamāti yasmā te sabbattha nimujjanassa hetubhūtā kāmayogādayo duratikkamā, tasmā tvampi visākhe parāyattamatthaṃ patthetvā alabhamānā vihaññasīti adhippāyo.
நவமஸுத்தவண்ணனா நிட்டி²தா.
Navamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 9. விஸாகா²ஸுத்தங் • 9. Visākhāsuttaṃ
