| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૧૦. અધમ્મિકસુત્તવણ્ણના
10. Adhammikasuttavaṇṇanā
૭૦. દસમે અધમ્મિકા હોન્તીતિ પોરાણકરાજૂહિ ઠપિતં દસભાગબલિઞ્ચેવ અપરાધાનુરૂપઞ્ચ દણ્ડં અગ્ગહેત્વા અતિરેકબલિનો ચેવ અતિરેકદણ્ડસ્સ ચ ગહણેન અધમ્મિકા. રાજાયુત્તાતિ રઞ્ઞો જનપદેસુ કિચ્ચસંવિધાયકા આયુત્તકપુરિસા. બ્રાહ્મણગહપતિકાતિ અન્તોનગરવાસિનો બ્રાહ્મણગહપતયો. નેગમજાનપદાતિ નિગમવાસિનો ચેવ જનપદવાસિનો ચ. વિસમન્તિ વિસમા હુત્વા, અસમયેન વાયન્તીતિ અત્થો. વિસમાતિ ન સમા, અતિથદ્ધા વા અતિમુદુકા વાતિ અત્થો. અપઞ્જસાતિ મગ્ગતો અપગતા, ઉમ્મગ્ગગામિનો હુત્વા વાયન્તીતિ અત્થો. દેવતા પરિકુપિતા ભવન્તીતિ વાતેસુ હિ વિસમેસુ અપઞ્જસેસુ વાયન્તેસુ રુક્ખા ભિજ્જન્તિ, વિમાનાનિ ભિજ્જન્તિ. તસ્મા દેવતા પરિકુપિતા ભવન્તિ, તા દેવસ્સ સમ્મા વસ્સિતું ન દેન્તિ. તેન વુત્તં દેવો ન સમ્મા ધારં અનુપ્પવેચ્છતીતિ. વિસમપાકાનિ સસ્સાનિ ભવન્તીતિ એકસ્મિં ઠાને ગબ્ભીનિ હોન્તિ, એકસ્મિં સઞ્જાતખીરાનિ, એકં ઠાનં પચ્ચતીતિ એવં વિસમં પાકાનિ સસ્સાનિ ભવન્તિ.
70. Dasame adhammikā hontīti porāṇakarājūhi ṭhapitaṃ dasabhāgabaliñceva aparādhānurūpañca daṇḍaṃ aggahetvā atirekabalino ceva atirekadaṇḍassa ca gahaṇena adhammikā. Rājāyuttāti rañño janapadesu kiccasaṃvidhāyakā āyuttakapurisā. Brāhmaṇagahapatikāti antonagaravāsino brāhmaṇagahapatayo. Negamajānapadāti nigamavāsino ceva janapadavāsino ca. Visamanti visamā hutvā, asamayena vāyantīti attho. Visamāti na samā, atithaddhā vā atimudukā vāti attho. Apañjasāti maggato apagatā, ummaggagāmino hutvā vāyantīti attho. Devatā parikupitā bhavantīti vātesu hi visamesu apañjasesu vāyantesu rukkhā bhijjanti, vimānāni bhijjanti. Tasmā devatā parikupitā bhavanti, tā devassa sammā vassituṃ na denti. Tena vuttaṃ devo na sammā dhāraṃ anuppavecchatīti. Visamapākāni sassāni bhavantīti ekasmiṃ ṭhāne gabbhīni honti, ekasmiṃ sañjātakhīrāni, ekaṃ ṭhānaṃ paccatīti evaṃ visamaṃ pākāni sassāni bhavanti.
સમં નક્ખત્તાનિ તારકરૂપાનિ પરિવત્તન્તીતિ યથા કત્તિકપુણ્ણમા કત્તિકનક્ખત્તમેવ લભતિ, મિગસિરપુણ્ણમા મિગસિરનક્ખત્તમેવાતિ એવં તસ્મિં તસ્મિં માસે સા સા પુણ્ણમા તં તં નક્ખત્તમેવ લભતિ, તથા સમ્મા પરિવત્તન્તિ. સમં વાતા વાયન્તીતિ અવિસમા હુત્વા સમયસ્મિંયેવ વાયન્તિ, છ માસે ઉત્તરા વાતા, છ માસેદક્ખિણાતિ એવં તેસં તેસં જનપદાનં અનુરૂપે સમયે વાયન્તિ. સમાતિ સમપ્પવત્તિનો નાતિથદ્ધા નાતિમુદૂ. પઞ્જસાતિ મગ્ગપ્પટિપન્ના, મગ્ગેનેવ વાયન્તિ, નો અમગ્ગેનાતિ અત્થો.
Samaṃnakkhattāni tārakarūpāni parivattantīti yathā kattikapuṇṇamā kattikanakkhattameva labhati, migasirapuṇṇamā migasiranakkhattamevāti evaṃ tasmiṃ tasmiṃ māse sā sā puṇṇamā taṃ taṃ nakkhattameva labhati, tathā sammā parivattanti. Samaṃ vātā vāyantīti avisamā hutvā samayasmiṃyeva vāyanti, cha māse uttarā vātā, cha māsedakkhiṇāti evaṃ tesaṃ tesaṃ janapadānaṃ anurūpe samaye vāyanti. Samāti samappavattino nātithaddhā nātimudū. Pañjasāti maggappaṭipannā, maggeneva vāyanti, no amaggenāti attho.
જિમ્હં ગચ્છતીતિ કુટિલં ગચ્છતિ, અતિત્થં ગણ્હાતિ. નેત્તે જિમ્હં ગતે સતીતિ નયતીતિ નેત્તા. તસ્મિં નેત્તે જિમ્હં ગતે કુટિલં ગન્ત્વા અતિત્થં ગણ્હન્તે ઇતરાપિ અતિત્થમેવ ગણ્હન્તીતિ અત્થો. નેતેતિપિ પાઠો. દુક્ખં સેતીતિ દુક્ખં સયતિ, દુક્ખિતં હોતીતિ અત્થો.
Jimhaṃgacchatīti kuṭilaṃ gacchati, atitthaṃ gaṇhāti. Nette jimhaṃ gate satīti nayatīti nettā. Tasmiṃ nette jimhaṃ gate kuṭilaṃ gantvā atitthaṃ gaṇhante itarāpi atitthameva gaṇhantīti attho. Netetipi pāṭho. Dukkhaṃ setīti dukkhaṃ sayati, dukkhitaṃ hotīti attho.
પત્તકમ્મવગ્ગો દુતિયો.
Pattakammavaggo dutiyo.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧૦. અધમ્મિકસુત્તં • 10. Adhammikasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧૦. અધમ્મિકસુત્તવણ્ણના • 10. Adhammikasuttavaṇṇanā
