| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
(૧૩) ૩. ભયવગ્ગો
(13) 3. Bhayavaggo
૧. અત્તાનુવાદસુત્તવણ્ણના
1. Attānuvādasuttavaṇṇanā
૧૨૧. તતિયસ્સ પઠમે અત્તાનુવાદભયન્તિ અત્તાનં અનુવદન્તસ્સ ઉપ્પજ્જનકભયં. પરાનુવાદભયન્તિ પરસ્સ અનુવાદતો ઉપ્પજ્જનકભયં. દણ્ડભયન્તિ દ્વત્તિંસ કમ્મકારણા પટિચ્ચ ઉપ્પજ્જનકભયં. દુગ્ગતિભયન્તિ ચત્તારો અપાયે પટિચ્ચ ઉપ્પજ્જનકભયં. ઇદં વુચ્ચતિ, ભિક્ખવે, અત્તાનુવાદભયન્તિઆદીસુ અત્તાનુવાદભયં તાવ પચ્ચવેક્ખન્તસ્સ અજ્ઝત્તં હિરી સમુટ્ઠાતિ, સાસ્સ તીસુ દ્વારેસુ સંવરં જનેતિ, તીસુ દ્વારેસુ સંવરો ચતુપારિસુદ્ધિસીલં હોતિ. સો તસ્મિં સીલે પતિટ્ઠાય વિપસ્સનં વડ્ઢેત્વા અગ્ગફલે પતિટ્ઠાતિ. પરાનુવાદભયં પન પચ્ચવેક્ખન્તસ્સ બહિદ્ધા ઓત્તપ્પં સમુટ્ઠાતિ, તદસ્સ તીસુ દ્વારેસુ સંવરં જનેતિ, તીસુ દ્વારેસુ સંવરો ચતુપારિસુદ્ધિસીલં હોતિ. સો તસ્મિં સીલે પતિટ્ઠાય વિપસ્સનં વડ્ઢેત્વા અગ્ગફલે પતિટ્ઠાતિ. દુગ્ગતિભયં પચ્ચવેક્ખન્તસ્સ અજ્ઝત્તં હિરી સમુટ્ઠાતિ, સાસ્સ તીસુ દ્વારેસુ સંવરં જનેતિ, તીસુ દ્વારેસુ સંવરો ચતુપારિસુદ્ધિસીલં હોતિ. સો તસ્મિં સીલે પતિટ્ઠાય વિપસ્સનં વડ્ઢેત્વા અગ્ગફલે પતિટ્ઠાતિ.
121. Tatiyassa paṭhame attānuvādabhayanti attānaṃ anuvadantassa uppajjanakabhayaṃ. Parānuvādabhayanti parassa anuvādato uppajjanakabhayaṃ. Daṇḍabhayanti dvattiṃsa kammakāraṇā paṭicca uppajjanakabhayaṃ. Duggatibhayanti cattāro apāye paṭicca uppajjanakabhayaṃ. Idaṃ vuccati, bhikkhave, attānuvādabhayantiādīsu attānuvādabhayaṃ tāva paccavekkhantassa ajjhattaṃ hirī samuṭṭhāti, sāssa tīsu dvāresu saṃvaraṃ janeti, tīsu dvāresu saṃvaro catupārisuddhisīlaṃ hoti. So tasmiṃ sīle patiṭṭhāya vipassanaṃ vaḍḍhetvā aggaphale patiṭṭhāti. Parānuvādabhayaṃ pana paccavekkhantassa bahiddhā ottappaṃ samuṭṭhāti, tadassa tīsu dvāresu saṃvaraṃ janeti, tīsu dvāresu saṃvaro catupārisuddhisīlaṃ hoti. So tasmiṃ sīle patiṭṭhāya vipassanaṃ vaḍḍhetvā aggaphale patiṭṭhāti. Duggatibhayaṃ paccavekkhantassa ajjhattaṃ hirī samuṭṭhāti, sāssa tīsu dvāresu saṃvaraṃ janeti, tīsu dvāresu saṃvaro catupārisuddhisīlaṃ hoti. So tasmiṃ sīle patiṭṭhāya vipassanaṃ vaḍḍhetvā aggaphale patiṭṭhāti.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧. અત્તાનુવાદસુત્તં • 1. Attānuvādasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧. અત્તાનુવાદસુત્તવણ્ણના • 1. Attānuvādasuttavaṇṇanā
