| Library / Tipiṭaka / તિપિટક • Tipiṭaka / પટિસમ્ભિદામગ્ગ-અટ્ઠકથા • Paṭisambhidāmagga-aṭṭhakathā |
૩૯. અત્થસન્દસ્સનઞાણનિદ્દેસવણ્ણના
39. Atthasandassanañāṇaniddesavaṇṇanā
૯૦. અત્થસન્દસ્સનઞાણનિદ્દેસે પઞ્ચક્ખન્ધાતિઆદીનિ વુત્તત્થાનેવ. પકાસેતીતિ પાકટં કરોતિ, સોતૂનં ઞાણચક્ખુના દસ્સનં સમ્પાદેતીતિ અત્થો. નાનાધમ્માતિ લોકિયલોકુત્તરા સબ્બધમ્મા વુત્તા. કસ્મા પકાસનાનિદ્દેસે લોકિયા એવ વુત્તાતિ ચે? અનિચ્ચાદિવસેન પકાસનાય આરદ્ધત્તા. લોકુત્તરાનઞ્ચ અસમ્મસનૂપગત્તા લોકુત્તરા ન વુત્તા. નાનાધમ્મનિદ્દેસેન પન અત્થસન્દસ્સનનિદ્દેસેન ચ તેસં સઙ્ગહિતત્તા યથા તે પકાસેતબ્બા, તથા પકાસના પકાસનાયેવ. પજહન્તોતિ સોતારં પજહાપેન્તોતિ અત્થો. સન્દસ્સેતીતિ સોતૂનં સમ્મા દસ્સેતિ. કેચિ પન ‘‘કામચ્છન્દસ્સ પહીનત્તા નેક્ખમ્મત્થં સન્દસ્સેતી’’તિઆદિના નયેન પઠન્તિ. તેસં ઉજુકમેવ સોતૂનં દોસપ્પહાને ગુણપટિલાભે ચ કતે સિખાપ્પત્તં દેસનાઞાણં હોતીતિ દસ્સનત્થં અયં નયો વુત્તોતિ વેદિતબ્બો.
90. Atthasandassanañāṇaniddese pañcakkhandhātiādīni vuttatthāneva. Pakāsetīti pākaṭaṃ karoti, sotūnaṃ ñāṇacakkhunā dassanaṃ sampādetīti attho. Nānādhammāti lokiyalokuttarā sabbadhammā vuttā. Kasmā pakāsanāniddese lokiyā eva vuttāti ce? Aniccādivasena pakāsanāya āraddhattā. Lokuttarānañca asammasanūpagattā lokuttarā na vuttā. Nānādhammaniddesena pana atthasandassananiddesena ca tesaṃ saṅgahitattā yathā te pakāsetabbā, tathā pakāsanā pakāsanāyeva. Pajahantoti sotāraṃ pajahāpentoti attho. Sandassetīti sotūnaṃ sammā dasseti. Keci pana ‘‘kāmacchandassa pahīnattā nekkhammatthaṃ sandassetī’’tiādinā nayena paṭhanti. Tesaṃ ujukameva sotūnaṃ dosappahāne guṇapaṭilābhe ca kate sikhāppattaṃ desanāñāṇaṃ hotīti dassanatthaṃ ayaṃ nayo vuttoti veditabbo.
અત્થસન્દસ્સનઞાણનિદ્દેસવણ્ણના નિટ્ઠિતા.
Atthasandassanañāṇaniddesavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / પટિસમ્ભિદામગ્ગપાળિ • Paṭisambhidāmaggapāḷi / ૩૯. અત્થસન્દસ્સનઞાણનિદ્દેસો • 39. Atthasandassanañāṇaniddeso
