| Library / Tipiṭaka / તિપિટક • Tipiṭaka / મહાવગ્ગપાળિ • Mahāvaggapāḷi |
૨૧. બાલઅબ્યત્તવત્થુ
21. Bālaabyattavatthu
૮૨. તેન ખો પન સમયેન ભિક્ખૂ, દસવસ્સમ્હા દસવસ્સમ્હાતિ, બાલા અબ્યત્તા નિસ્સયં દેન્તિ. દિસ્સન્તિ આચરિયા બાલા, અન્તેવાસિકા પણ્ડિતા . દિસ્સન્તિ આચરિયા અબ્યત્તા, અન્તેવાસિકા બ્યત્તા. દિસ્સન્તિ આચરિયા અપ્પસ્સુતા, અન્તેવાસિકા બહુસ્સુતા. દિસ્સન્તિ આચરિયા દુપ્પઞ્ઞા, અન્તેવાસિકા પઞ્ઞવન્તો. યે તે ભિક્ખૂ અપ્પિચ્છા…પે॰… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખૂ, દસવસ્સમ્હા દસવસ્સમ્હાતિ, બાલા અબ્યત્તા નિસ્સયં દસ્સન્તિ. દિસ્સન્તિ આચરિયા બાલા અન્તેવાસિકા પણ્ડિતા, દિસ્સન્તિ આચરિયા અબ્યત્તા અન્તેવાસિકા બ્યત્તા, દિસ્સન્તિ આચરિયા અપ્પસ્સુતા અન્તેવાસિકા બહુસ્સુતા, દિસ્સન્તિ આચરિયા દુપ્પઞ્ઞા અન્તેવાસિકા પઞ્ઞવન્તો’’તિ. અથ ખો તે ભિક્ખૂ ભગવતો એતમત્થં આરોચેસું…પે॰… સચ્ચં કિર, ભિક્ખવે, ભિક્ખૂ, દસવસ્સમ્હા દસવસ્સમ્હાતિ, બાલા અબ્યત્તા નિસ્સયં દેન્તિ…પે॰… સચ્ચં, ભગવાતિ. વિગરહિ બુદ્ધો ભગવા…પે॰… વિગરહિત્વા…પે॰… ધમ્મિં કથં કત્વા ભિક્ખૂ આમન્તેસિ – ‘‘ન, ભિક્ખવે, બાલેન અબ્યત્તેન નિસ્સયો દાતબ્બો. યો દદેય્ય, આપત્તિ દુક્કટસ્સ. અનુજાનામિ, ભિક્ખવે, બ્યત્તેન ભિક્ખુના પટિબલેન દસવસ્સેન વા અતિરેકદસવસ્સેન વા નિસ્સયં દાતુ’’ન્તિ.
82. Tena kho pana samayena bhikkhū, dasavassamhā dasavassamhāti, bālā abyattā nissayaṃ denti. Dissanti ācariyā bālā, antevāsikā paṇḍitā . Dissanti ācariyā abyattā, antevāsikā byattā. Dissanti ācariyā appassutā, antevāsikā bahussutā. Dissanti ācariyā duppaññā, antevāsikā paññavanto. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū, dasavassamhā dasavassamhāti, bālā abyattā nissayaṃ dassanti. Dissanti ācariyā bālā antevāsikā paṇḍitā, dissanti ācariyā abyattā antevāsikā byattā, dissanti ācariyā appassutā antevāsikā bahussutā, dissanti ācariyā duppaññā antevāsikā paññavanto’’ti. Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave, bhikkhū, dasavassamhā dasavassamhāti, bālā abyattā nissayaṃ denti…pe… saccaṃ, bhagavāti. Vigarahi buddho bhagavā…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, bālena abyattena nissayo dātabbo. Yo dadeyya, āpatti dukkaṭassa. Anujānāmi, bhikkhave, byattena bhikkhunā paṭibalena dasavassena vā atirekadasavassena vā nissayaṃ dātu’’nti.
બાલઅબ્યત્તવત્થુ નિટ્ઠિતં.
Bālaabyattavatthu niṭṭhitaṃ.
