| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૧૦. ભદ્દજિસુત્તવણ્ણના
10. Bhaddajisuttavaṇṇanā
૧૭૦. દસમે અભિભૂતિ અભિભવિત્વા ઠિતો જેટ્ઠકો. અનભિભૂતોતિ અઞ્ઞેહિ અનભિભૂતો. અઞ્ઞદત્થૂતિ એકંસવચને નિપાતો. દસ્સનવસેન દસો, સબ્બં પસ્સતીતિ અધિપ્પાયો. વસવત્તીતિ સબ્બં જનં વસે વત્તેતિ. યથા પસ્સતોતિ ઇટ્ઠારમ્મણં વા હોતુ અનિટ્ઠારમ્મણં વા , યેનાકારેન તં પસ્સન્તસ્સ. અનન્તરા આસવાનં ખયો હોતીતિ અનન્તરાયેવ અરહત્તં ઉપ્પજ્જતિ. યથા સુણતોતિ એત્થાપિ એસેવ નયો. અથ વા યં ચક્ખુના રૂપં દિસ્વા નિરન્તરમેવ વિપસ્સનં પટ્ઠપેત્વા અરહત્તં પાપુણાતિ, તં તસ્સ અરહત્તં ચક્ખુવિઞ્ઞાણાનન્તરં નામ હોતિ. તં સન્ધાય વુત્તં – ઇદં દસ્સનાનં અગ્ગન્તિ. દુતિયપદેપિ એસેવ નયો.
170. Dasame abhibhūti abhibhavitvā ṭhito jeṭṭhako. Anabhibhūtoti aññehi anabhibhūto. Aññadatthūti ekaṃsavacane nipāto. Dassanavasena daso, sabbaṃ passatīti adhippāyo. Vasavattīti sabbaṃ janaṃ vase vatteti. Yathā passatoti iṭṭhārammaṇaṃ vā hotu aniṭṭhārammaṇaṃ vā , yenākārena taṃ passantassa. Anantarā āsavānaṃ khayo hotīti anantarāyeva arahattaṃ uppajjati. Yathā suṇatoti etthāpi eseva nayo. Atha vā yaṃ cakkhunā rūpaṃ disvā nirantarameva vipassanaṃ paṭṭhapetvā arahattaṃ pāpuṇāti, taṃ tassa arahattaṃ cakkhuviññāṇānantaraṃ nāma hoti. Taṃ sandhāya vuttaṃ – idaṃ dassanānaṃ agganti. Dutiyapadepi eseva nayo.
યથા સુખિતસ્સાતિ યેન મગ્ગસુખેન સુખિતસ્સ. અનન્તરા આસવાનં ખયો હોતીતિ સમનન્તરમેવ અરહત્તં ઉપ્પજ્જતિ. ઇદં સુખાનં અગ્ગન્તિ ઇદં મગ્ગસુખં સુખાનં ઉત્તમં. યથા સઞ્ઞિસ્સાતિ ઇધાપિ મગ્ગસઞ્ઞાવ અધિપ્પેતા. યથા ભૂતસ્સાતિ યસ્મિં ભવે યસ્મિં અત્તભાવે ઠિતસ્સ. અનન્તરાતિ અનન્તરાયેન અરહત્તં ઉપ્પજ્જતિ. ઇદં ભવાનં અગ્ગન્તિ અયં પચ્છિમો અત્તભાવો ભવાનં અગ્ગં નામ. અથ વા યથા ભૂતસ્સાતિ યેહિ ખન્ધેહિ મગ્ગક્ખણે ભૂતસ્સ વિજ્જમાનસ્સ. અનન્તરા આસવાનં ખયો હોતીતિ મગ્ગાનન્તરમેવ ફલં ઉપ્પજ્જતિ. ઇદં ભવાનં અગ્ગન્તિ ઇદં મગ્ગક્ખણે ખન્ધપઞ્ચકં ભવાનં અગ્ગં નામાતિ.
Yathā sukhitassāti yena maggasukhena sukhitassa. Anantarā āsavānaṃ khayo hotīti samanantarameva arahattaṃ uppajjati. Idaṃ sukhānaṃ agganti idaṃ maggasukhaṃ sukhānaṃ uttamaṃ. Yathā saññissāti idhāpi maggasaññāva adhippetā. Yathā bhūtassāti yasmiṃ bhave yasmiṃ attabhāve ṭhitassa. Anantarāti anantarāyena arahattaṃ uppajjati. idaṃ bhavānaṃ agganti ayaṃ pacchimo attabhāvo bhavānaṃ aggaṃ nāma. Atha vā yathā bhūtassāti yehi khandhehi maggakkhaṇe bhūtassa vijjamānassa. Anantarā āsavānaṃ khayo hotīti maggānantarameva phalaṃ uppajjati. Idaṃ bhavānaṃ agganti idaṃ maggakkhaṇe khandhapañcakaṃ bhavānaṃ aggaṃ nāmāti.
આઘાતવગ્ગો દુતિયો.
Āghātavaggo dutiyo.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧૦. ભદ્દજિસુત્તં • 10. Bhaddajisuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧૦. ભદ્દજિસુત્તવણ્ણના • 10. Bhaddajisuttavaṇṇanā
