| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૩. બીજઙ્ગપઞ્હો
3. Bījaṅgapañho
૩. ‘‘ભન્તે નાગસેન, ‘બીજસ્સ દ્વે અઙ્ગાનિ ગહેતબ્બાની’તિ યં વદેસિ, કતમાનિ તાનિ દ્વે અઙ્ગાનિ ગહેતબ્બાની’’તિ? ‘‘યથા, મહારાજ, બીજં અપ્પકમ્પિ સમાનં ભદ્દકે ખેત્તે વુત્તં દેવે સમ્મા ધારં પવેચ્છન્તે સુબહૂનિ ફલાનિ અનુદસ્સતિ, એવમેવ ખો, મહારાજ, યોગિના યોગાવચરેન યથા પટિપાદિતં સીલં કેવલં સામઞ્ઞફલમનુદસ્સતિ. એવં સમ્મા પટિપજ્જિતબ્બં. ઇદં, મહારાજ, બીજસ્સ પઠમં અઙ્ગં ગહેતબ્બં.
3. ‘‘Bhante nāgasena, ‘bījassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bījaṃ appakampi samānaṃ bhaddake khette vuttaṃ deve sammā dhāraṃ pavecchante subahūni phalāni anudassati, evameva kho, mahārāja, yoginā yogāvacarena yathā paṭipāditaṃ sīlaṃ kevalaṃ sāmaññaphalamanudassati. Evaṃ sammā paṭipajjitabbaṃ. Idaṃ, mahārāja, bījassa paṭhamaṃ aṅgaṃ gahetabbaṃ.
‘‘પુન ચપરં, મહારાજ, બીજં સુપરિસોધિતે ખેત્તે રોપિતં ખિપ્પમેવ સંવિરૂહતિ, એવમેવ ખો, મહારાજ, યોગિના યોગાવચરેન માનસં સુપરિગ્ગહિતં સુઞ્ઞાગારે પરિસોધિતં સતિપટ્ઠાનખેત્તવરે ખિત્તં ખિપ્પમેવ વિરૂહતિ. ઇદં, મહારાજ, બીજસ્સ દુતિયં અઙ્ગં ગહેતબ્બં . ભાસિતમ્પેતં, મહારાજ, થેરેન અનુરુદ્ધેન –
‘‘Puna caparaṃ, mahārāja, bījaṃ suparisodhite khette ropitaṃ khippameva saṃvirūhati, evameva kho, mahārāja, yoginā yogāvacarena mānasaṃ supariggahitaṃ suññāgāre parisodhitaṃ satipaṭṭhānakhettavare khittaṃ khippameva virūhati. Idaṃ, mahārāja, bījassa dutiyaṃ aṅgaṃ gahetabbaṃ . Bhāsitampetaṃ, mahārāja, therena anuruddhena –
‘‘‘યથાપિ ખેત્તે 1 પરિસુદ્ધે, બીજઞ્ચસ્સ પતિટ્ઠિતં;
‘‘‘Yathāpi khette 2 parisuddhe, bījañcassa patiṭṭhitaṃ;
વિપુલં તસ્સ ફલં હોતિ, અપિ તોસેતિ કસ્સકં.
Vipulaṃ tassa phalaṃ hoti, api toseti kassakaṃ.
‘‘‘તથેવ યોગિનો ચિત્તં, સુઞ્ઞાગારે વિસોધિતં;
‘‘‘Tatheva yogino cittaṃ, suññāgāre visodhitaṃ;
સતિપટ્ઠાનખેત્તમ્હિ, ખિપ્પમેવ વિરૂહતી’’’તિ.
Satipaṭṭhānakhettamhi, khippameva virūhatī’’’ti.
બીજઙ્ગપઞ્હો તતિયો.
Bījaṅgapañho tatiyo.
Footnotes:
