| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૩. છત્તઙ્ગપઞ્હો
3. Chattaṅgapañho
૩. ‘‘ભન્તે નાગસેન, ‘છત્તસ્સ તીણિ અઙ્ગાનિ ગહેતબ્બાની’તિ યં વદેસિ, કતમાનિ તાનિ તીણિ અઙ્ગાનિ ગહેતબ્બાની’’તિ? ‘‘યથા, મહારાજ, છત્તં ઉપરિ મુદ્ધનિ ચરતિ, એવમેવ ખો, મહારાજ, યોગિના યોગાવચરેન કિલેસાનં ઉપરિ મુદ્ધનિ ચરેન ભવિતબ્બં. ઇદં, મહારાજ, છત્તસ્સ પઠમં અઙ્ગં ગહેતબ્બં.
3. ‘‘Bhante nāgasena, ‘chattassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, chattaṃ upari muddhani carati, evameva kho, mahārāja, yoginā yogāvacarena kilesānaṃ upari muddhani carena bhavitabbaṃ. Idaṃ, mahārāja, chattassa paṭhamaṃ aṅgaṃ gahetabbaṃ.
‘‘પુન ચપરં, મહારાજ, છત્તં મુદ્ધનુપત્થમ્ભં હોતિ, એવમેવ ખો, મહારાજ, યોગિના યોગાવચરેન યોનિસો મનસિકારુપત્થમ્ભેન ભવિતબ્બં. ઇદં, મહારાજ, છત્તસ્સ દુતિયં અઙ્ગં ગહેતબ્બં.
‘‘Puna caparaṃ, mahārāja, chattaṃ muddhanupatthambhaṃ hoti, evameva kho, mahārāja, yoginā yogāvacarena yoniso manasikārupatthambhena bhavitabbaṃ. Idaṃ, mahārāja, chattassa dutiyaṃ aṅgaṃ gahetabbaṃ.
‘‘પુન ચપરં, મહારાજ, છત્તં વાતાતપમેઘવુટ્ઠિયો પટિહનતિ, એવમેવ ખો, મહારાજ, યોગિના યોગાવચરેન નાનાવિધદિટ્ઠિપુથુસમણબ્રાહ્મણાનં 1 મતવાતતિવિધગ્ગિસન્તાપકિલેસવુટ્ઠિયો પટિહન્તબ્બા . ઇદં, મહારાજ, છત્તસ્સ તતિયં અઙ્ગં ગહેતબ્બં. ભાસિતમ્પેતં, મહારાજ, થેરેન સારિપુત્તેન ધમ્મસેનાપતિના –
‘‘Puna caparaṃ, mahārāja, chattaṃ vātātapameghavuṭṭhiyo paṭihanati, evameva kho, mahārāja, yoginā yogāvacarena nānāvidhadiṭṭhiputhusamaṇabrāhmaṇānaṃ 2 matavātatividhaggisantāpakilesavuṭṭhiyo paṭihantabbā . Idaṃ, mahārāja, chattassa tatiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘યથાપિ છત્તં વિપુલં, અચ્છિદ્દં થિરસંહિતં;
‘‘‘Yathāpi chattaṃ vipulaṃ, acchiddaṃ thirasaṃhitaṃ;
વાતાતપં નિવારેતિ, મહતી મેઘવુટ્ઠિયો.
Vātātapaṃ nivāreti, mahatī meghavuṭṭhiyo.
‘‘‘તથેવ બુદ્ધપુત્તોપિ, સીલછત્તધરો સુચિ;
‘‘‘Tatheva buddhaputtopi, sīlachattadharo suci;
કિલેસવુટ્ઠિં વારેતિ, સન્તાપતિવિધગ્ગયો’’’તિ.
Kilesavuṭṭhiṃ vāreti, santāpatividhaggayo’’’ti.
છત્તઙ્ગપઞ્હો તતિયો.
Chattaṅgapañho tatiyo.
Footnotes:
