| Library / Tipiṭaka / તિપિટક • Tipiṭaka / ઇતિવુત્તકપાળિ • Itivuttakapāḷi |
૯. ધાતુસોસંસન્દનસુત્તં
9. Dhātusosaṃsandanasuttaṃ
૭૮. વુત્તઞ્હેતં ભગવતા, વુત્તમરહતાતિ મે સુતં –
78. Vuttañhetaṃ bhagavatā, vuttamarahatāti me sutaṃ –
‘‘ધાતુસો, ભિક્ખવે, સત્તા સત્તેહિ સદ્ધિં સંસન્દન્તિ સમેન્તિ. હીનાધિમુત્તિકા સત્તા હીનાધિમુત્તિકેહિ સત્તેહિ સદ્ધિં સંસન્દન્તિ સમેન્તિ, કલ્યાણાધિમુત્તિકા સત્તા કલ્યાણાધિમુત્તિકેહિ સત્તેહિ સદ્ધિં સંસન્દન્તિ સમેન્તિ.
‘‘Dhātuso, bhikkhave, sattā sattehi saddhiṃ saṃsandanti samenti. Hīnādhimuttikā sattā hīnādhimuttikehi sattehi saddhiṃ saṃsandanti samenti, kalyāṇādhimuttikā sattā kalyāṇādhimuttikehi sattehi saddhiṃ saṃsandanti samenti.
‘‘અતીતમ્પિ, ભિક્ખવે, અદ્ધાનં ધાતુસોવ સત્તા સત્તેહિ સદ્ધિં સંસન્દિંસુ સમિંસુ. હીનાધિમુત્તિકા સત્તા હીનાધિમુત્તિકેહિ સત્તેહિ સદ્ધિં સંસન્દિંસુ સમિંસુ, કલ્યાણાધિમુત્તિકા સત્તા કલ્યાણાધિમુત્તિકેહિ સત્તેહિ સદ્ધિં સંસન્દિંસુ સમિંસુ.
‘‘Atītampi, bhikkhave, addhānaṃ dhātusova sattā sattehi saddhiṃ saṃsandiṃsu samiṃsu. Hīnādhimuttikā sattā hīnādhimuttikehi sattehi saddhiṃ saṃsandiṃsu samiṃsu, kalyāṇādhimuttikā sattā kalyāṇādhimuttikehi sattehi saddhiṃ saṃsandiṃsu samiṃsu.
‘‘અનાગતમ્પિ , ભિક્ખવે, અદ્ધાનં ધાતુસોવ સત્તા સત્તેહિ સદ્ધિં સંસન્દિસ્સન્તિ સમેસ્સન્તિ. હીનાધિમુત્તિકા સત્તા હીનાધિમુત્તિકેહિ સત્તેહિ સદ્ધિં સંસન્દિસ્સન્તિ સમેસ્સન્તિ, કલ્યાણાધિમુત્તિકા સત્તા કલ્યાણાધિમુત્તિકેહિ સત્તેહિ સદ્ધિં સંસન્દિસ્સન્તિ સમેસ્સન્તિ.
‘‘Anāgatampi , bhikkhave, addhānaṃ dhātusova sattā sattehi saddhiṃ saṃsandissanti samessanti. Hīnādhimuttikā sattā hīnādhimuttikehi sattehi saddhiṃ saṃsandissanti samessanti, kalyāṇādhimuttikā sattā kalyāṇādhimuttikehi sattehi saddhiṃ saṃsandissanti samessanti.
‘‘એતરહિપિ, ભિક્ખવે, પચ્ચુપ્પનં અદ્ધાનં ધાતુસોવ સત્તા સત્તેહિ સદ્ધિં સંસન્દન્તિ સમેન્તિ. હીનાધિમુત્તિકા સત્તા હીનાધિમુત્તિકેહિ સત્તેહિ સદ્ધિં સંસન્દન્તિ સમેન્તિ, કલ્યાણાધિમુત્તિકા સત્તા કલ્યાણાધિમુત્તિકેહિ સત્તેહિ સદ્ધિં સંસન્દન્તિ સમેન્તી’’તિ. એતમત્થં ભગવા અવોચ. તત્થેતં ઇતિ વુચ્ચતિ –
‘‘Etarahipi, bhikkhave, paccuppanaṃ addhānaṃ dhātusova sattā sattehi saddhiṃ saṃsandanti samenti. Hīnādhimuttikā sattā hīnādhimuttikehi sattehi saddhiṃ saṃsandanti samenti, kalyāṇādhimuttikā sattā kalyāṇādhimuttikehi sattehi saddhiṃ saṃsandanti samentī’’ti. Etamatthaṃ bhagavā avoca. Tatthetaṃ iti vuccati –
‘‘સંસગ્ગા વનથો જાતો, અસંસગ્ગેન છિજ્જતિ;
‘‘Saṃsaggā vanatho jāto, asaṃsaggena chijjati;
પરિત્તં દારુમારુય્હ, યથા સીદે મહણ્ણવે.
Parittaṃ dārumāruyha, yathā sīde mahaṇṇave.
‘‘એવં કુસીતમાગમ્મ, સાધુજીવીપિ સીદતિ;
‘‘Evaṃ kusītamāgamma, sādhujīvīpi sīdati;
તસ્મા તં પરિવજ્જેય્ય, કુસીતં હીનવીરિયં.
Tasmā taṃ parivajjeyya, kusītaṃ hīnavīriyaṃ.
‘‘પવિવિત્તેહિ અરિયેહિ, પહિતત્તેહિ ઝાયિભિ;
‘‘Pavivittehi ariyehi, pahitattehi jhāyibhi;
નિચ્ચં આરદ્ધવીરિયેહિ, પણ્ડિતેહિ સહાવસે’’તિ.
Niccaṃ āraddhavīriyehi, paṇḍitehi sahāvase’’ti.
અયમ્પિ અત્થો વુત્તો ભગવતા, ઇતિ મે સુતન્તિ. નવમં.
Ayampi attho vutto bhagavatā, iti me sutanti. Navamaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / ઇતિવુત્તક-અટ્ઠકથા • Itivuttaka-aṭṭhakathā / ૯. ધાતુસોસંસન્દનસુત્તવણ્ણના • 9. Dhātusosaṃsandanasuttavaṇṇanā
