| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૪. કમ્મનાનાકરણપઞ્હો
4. Kammanānākaraṇapañho
૪. રાજા આહ ‘‘ભન્તે નાગસેન, કેન કારણેન મનુસ્સા ન સબ્બે સમકા, અઞ્ઞે અપ્પાયુકા, અઞ્ઞે દીઘાયુકા, અઞ્ઞે બહ્વાબાધા અઞ્ઞે અપ્પાબાધા, અઞ્ઞે દુબ્બણ્ણા, અઞ્ઞે વણ્ણવન્તો, અઞ્ઞે અપ્પેસક્ખા, અઞ્ઞે મહેસક્ખા, અઞ્ઞે અપ્પભોગા, અઞ્ઞે મહાભોગા, અઞ્ઞે નીચકુલીના, અઞ્ઞે મહાકુલીના, અઞ્ઞે દુપ્પઞ્ઞા, અઞ્ઞે પઞ્ઞવન્તો’’તિ?
4. Rājā āha ‘‘bhante nāgasena, kena kāraṇena manussā na sabbe samakā, aññe appāyukā, aññe dīghāyukā, aññe bahvābādhā aññe appābādhā, aññe dubbaṇṇā, aññe vaṇṇavanto, aññe appesakkhā, aññe mahesakkhā, aññe appabhogā, aññe mahābhogā, aññe nīcakulīnā, aññe mahākulīnā, aññe duppaññā, aññe paññavanto’’ti?
થેરો આહ ‘‘કિસ્સ પન, મહારાજ, રુક્ખા ન સબ્બે સમકા, અઞ્ઞે અમ્બિલા, અઞ્ઞે લવણા, અઞ્ઞે તિત્તકા, અઞ્ઞે કટુકા, અઞ્ઞે કસાવા, અઞ્ઞે મધુરા’’તિ? ‘‘મઞ્ઞામિ, ભન્તે, બીજાનં નાનાકરણેના’’તિ. ‘‘એવમેવ ખો, મહારાજ, કમ્માનં નાનાકરણેન મનુસ્સા ન સબ્બે સમકા, અઞ્ઞે અપ્પાયુકા, અઞ્ઞે દીઘાયુકા, અઞ્ઞે બહ્વાબાધા, અઞ્ઞે અપ્પાબાધા, અઞ્ઞે દુબ્બણ્ણા, અઞ્ઞે વણ્ણવન્તો, અઞ્ઞે અપ્પેસક્ખા, અઞ્ઞે મહેસક્ખા, અઞ્ઞે અપ્પભોગા, અઞ્ઞે મહાભોગા, અઞ્ઞે નીચકુલીના, અઞ્ઞે મહાકુલીના, અઞ્ઞે દુપ્પઞ્ઞા, અઞ્ઞે પઞ્ઞવન્તો. ભાસિતમ્પેતં મહારાજ ભગવતા – ‘કમ્મસ્સકા, માણવ, સત્તા કમ્મદાયાદા કમ્મયોની કમ્મબન્ધૂ કમ્મપ્પટિસરણા, કમ્મં સત્તે વિભજતિ યદિદં હીનપ્પણીતતાયા’’’તિ.
Thero āha ‘‘kissa pana, mahārāja, rukkhā na sabbe samakā, aññe ambilā, aññe lavaṇā, aññe tittakā, aññe kaṭukā, aññe kasāvā, aññe madhurā’’ti? ‘‘Maññāmi, bhante, bījānaṃ nānākaraṇenā’’ti. ‘‘Evameva kho, mahārāja, kammānaṃ nānākaraṇena manussā na sabbe samakā, aññe appāyukā, aññe dīghāyukā, aññe bahvābādhā, aññe appābādhā, aññe dubbaṇṇā, aññe vaṇṇavanto, aññe appesakkhā, aññe mahesakkhā, aññe appabhogā, aññe mahābhogā, aññe nīcakulīnā, aññe mahākulīnā, aññe duppaññā, aññe paññavanto. Bhāsitampetaṃ mahārāja bhagavatā – ‘kammassakā, māṇava, sattā kammadāyādā kammayonī kammabandhū kammappaṭisaraṇā, kammaṃ satte vibhajati yadidaṃ hīnappaṇītatāyā’’’ti.
‘‘કલ્લોસિ, ભન્તે નાગસેના’’તિ.
‘‘Kallosi, bhante nāgasenā’’ti.
કમ્મનાનાકરણપઞ્હો ચતુત્થો.
Kammanānākaraṇapañho catuttho.
