Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā)

    ૭. મલ્લિકાદેવીસુત્તવણ્ણના

    7. Mallikādevīsuttavaṇṇanā

    ૧૯૭. સત્તમે મલ્લિકા દેવીતિ પસેનદિરઞ્ઞો દેવી. યેન મિધેકચ્ચો માતુગામોતિ યેન ઇધેકચ્ચા ઇત્થી. દુબ્બણ્ણાતિ બીભચ્છવણ્ણા. દુરૂપાતિ દુસ્સણ્ઠિતા. સુપાપિકાતિ સુટ્ઠુ પાપિકા સુટ્ઠુ લામિકા. દસ્સનાયાતિ પસ્સિતું. દલિદ્દાતિ ધનદલિદ્દા. અપ્પસ્સકાતિ સકેન ધનેન રહિતા. અપ્પભોગાતિ ઉપભોગપરિભોગભણ્ડકરહિતા. અપ્પેસક્ખાતિ અપ્પપરિવારા. અડ્ઢાતિ ઇસ્સરા. મહદ્ધનાતિ વળઞ્જનકધનેન મહદ્ધના. મહાભોગાતિ ઉપભોગપરિભોગભણ્ડભોગેન મહાભોગા. મહેસક્ખાતિ મહાપરિવારા. અભિરૂપાતિ ઉત્તમરૂપા. દસ્સનીયાતિ દસ્સનયુત્તા. પાસાદિકાતિ દસ્સનેન પાસાદિકા. વણ્ણપોક્ખરતાયાતિ વણ્ણેન ચેવ સરીરસણ્ઠાનેન ચ.

    197. Sattame mallikā devīti pasenadirañño devī. Yena midhekacco mātugāmoti yena idhekaccā itthī. Dubbaṇṇāti bībhacchavaṇṇā. Durūpāti dussaṇṭhitā. Supāpikāti suṭṭhu pāpikā suṭṭhu lāmikā. Dassanāyāti passituṃ. Daliddāti dhanadaliddā. Appassakāti sakena dhanena rahitā. Appabhogāti upabhogaparibhogabhaṇḍakarahitā. Appesakkhāti appaparivārā. Aḍḍhāti issarā. Mahaddhanāti vaḷañjanakadhanena mahaddhanā. Mahābhogāti upabhogaparibhogabhaṇḍabhogena mahābhogā. Mahesakkhāti mahāparivārā. Abhirūpāti uttamarūpā. Dassanīyāti dassanayuttā. Pāsādikāti dassanena pāsādikā. Vaṇṇapokkharatāyāti vaṇṇena ceva sarīrasaṇṭhānena ca.

    અભિસજ્જતીતિ લગ્ગતિ. બ્યાપજ્જતીતિ પકતિં પજહતિ. પતિત્થીયતીતિ કોધવસેન થિનભાવં થદ્ધભાવં આપજ્જતિ. દાતા હોતીતિ ન દાયિકા હોતિ. સેય્યાવસથપદીપેય્યન્તિ એત્થ સેય્યાતિ મઞ્ચપલ્લઙ્કાદિસયનં. આવસથોતિ આવસથાગારં. પદીપેય્યં વુચ્ચતિ વટ્ટિતેલાદિપદીપૂપકરણં. ઇસ્સામનિકાતિ ઇસ્સાય સમ્પયુત્તચિત્તા. ઇમિના નયેન સબ્બત્થ અત્થો વેદિતબ્બો . કોધના અહોસિન્તિ કોધમના અહોસિં. અનિસ્સામનિકા અહોસિન્તિ ઇસ્સાવિરહિતચિત્તા અહોસિં. સેસમેત્થ ઉત્તાનત્થમેવાતિ.

    Abhisajjatīti laggati. Byāpajjatīti pakatiṃ pajahati. Patitthīyatīti kodhavasena thinabhāvaṃ thaddhabhāvaṃ āpajjati. Nadātā hotīti na dāyikā hoti. Seyyāvasathapadīpeyyanti ettha seyyāti mañcapallaṅkādisayanaṃ. Āvasathoti āvasathāgāraṃ. Padīpeyyaṃ vuccati vaṭṭitelādipadīpūpakaraṇaṃ. Issāmanikāti issāya sampayuttacittā. Iminā nayena sabbattha attho veditabbo . Kodhanā ahosinti kodhamanā ahosiṃ. Anissāmanikā ahosinti issāvirahitacittā ahosiṃ. Sesamettha uttānatthamevāti.







    Related texts:



    તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૭. મલ્લિકાદેવીસુત્તં • 7. Mallikādevīsuttaṃ

    ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૭. મલ્લિકાદેવીસુત્તવણ્ણના • 7. Mallikādevīsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact