| Library / Tipiṭaka / તિપિટક • Tipiṭaka / પટિસમ્ભિદામગ્ગપાળિ • Paṭisambhidāmaggapāḷi |
૪૩. પદેસવિહારઞાણનિદ્દેસો
43. Padesavihārañāṇaniddeso
૯૪. કથં સમોદહને પઞ્ઞા પદેસવિહારે ઞાણં? મિચ્છાદિટ્ઠિપચ્ચયાપિ વેદયિતં, મિચ્છાદિટ્ઠિવૂપસમપચ્ચયાપિ વેદયિતં. સમ્માદિટ્ઠિપચ્ચયાપિ વેદયિતં, સમ્માદિટ્ઠિવૂપસમપચ્ચયાપિ વેદયિતં. મિચ્છાસઙ્કપ્પપચ્ચયાપિ વેદયિતં, મિચ્છાસઙ્કપ્પવૂપસમપચ્ચયાપિ વેદયિતં. સમ્માસઙ્કપ્પપચ્ચયાપિ વેદયિતં, સમ્માસઙ્કપ્પવૂપસમપચ્ચયાપિ વેદયિતં…પે॰… મિચ્છાવિમુત્તિપચ્ચયાપિ વેદયિતં, મિચ્છાવિમુત્તિવૂપસમપચ્ચયાપિ વેદયિતં. સમ્માવિમુત્તિપચ્ચયાપિ વેદયિતં, સમ્માવિમુત્તિવૂપસમપચ્ચયાપિ વેદયિતં. છન્દપચ્ચયાપિ વેદયિતં, છન્દવૂપસમપચ્ચયાપિ વેદયિતં. વિતક્કપચ્ચયાપિ વેદયિતં, વિતક્કવૂપસમપચ્ચયાપિ વેદયિતં. સઞ્ઞાપચ્ચયાપિ વેદયિતં, સઞ્ઞાવૂપસમપચ્ચયાપિ વેદયિતં.
94. Kathaṃ samodahane paññā padesavihāre ñāṇaṃ? Micchādiṭṭhipaccayāpi vedayitaṃ, micchādiṭṭhivūpasamapaccayāpi vedayitaṃ. Sammādiṭṭhipaccayāpi vedayitaṃ, sammādiṭṭhivūpasamapaccayāpi vedayitaṃ. Micchāsaṅkappapaccayāpi vedayitaṃ, micchāsaṅkappavūpasamapaccayāpi vedayitaṃ. Sammāsaṅkappapaccayāpi vedayitaṃ, sammāsaṅkappavūpasamapaccayāpi vedayitaṃ…pe… micchāvimuttipaccayāpi vedayitaṃ, micchāvimuttivūpasamapaccayāpi vedayitaṃ. Sammāvimuttipaccayāpi vedayitaṃ, sammāvimuttivūpasamapaccayāpi vedayitaṃ. Chandapaccayāpi vedayitaṃ, chandavūpasamapaccayāpi vedayitaṃ. Vitakkapaccayāpi vedayitaṃ, vitakkavūpasamapaccayāpi vedayitaṃ. Saññāpaccayāpi vedayitaṃ, saññāvūpasamapaccayāpi vedayitaṃ.
છન્દો ચ અવૂપસન્તો હોતિ, વિતક્કો ચ અવૂપસન્તો હોતિ, સઞ્ઞા ચ અવૂપસન્તા હોતિ, તપ્પચ્ચયાપિ વેદયિતં. છન્દો ચ વૂપસન્તો હોતિ, વિતક્કો ચ અવૂપસન્તો હોતિ, સઞ્ઞા ચ અવૂપસન્તા હોતિ, તપ્પચ્ચયાપિ વેદયિતં. છન્દો ચ વૂપસન્તો હોતિ, વિતક્કો ચ વૂપસન્તો હોતિ, સઞ્ઞા ચ અવૂપસન્તા હોતિ, તપ્પચ્ચયાપિ વેદયિતં. છન્દો ચ વૂપસન્તો હોતિ, વિતક્કો ચ વૂપસન્તો હોતિ, સઞ્ઞા ચ વૂપસન્તા હોતિ, તપ્પચ્ચયાપિ વેદયિતં. અપ્પત્તસ્સ પત્તિયા અત્થિ આસવં, તસ્મિમ્પિ ઠાને અનુપ્પત્તે તપ્પચ્ચયાપિ વેદયિતં. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘સમોદહને પઞ્ઞા પદેસવિહારે ઞાણં’’.
Chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca vūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca vūpasanto hoti, saññā ca vūpasantā hoti, tappaccayāpi vedayitaṃ. Appattassa pattiyā atthi āsavaṃ, tasmimpi ṭhāne anuppatte tappaccayāpi vedayitaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘samodahane paññā padesavihāre ñāṇaṃ’’.
પદેસવિહારઞાણનિદ્દેસો તેચત્તાલીસમો.
Padesavihārañāṇaniddeso tecattālīsamo.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / પટિસમ્ભિદામગ્ગ-અટ્ઠકથા • Paṭisambhidāmagga-aṭṭhakathā / ૪૩. પદેસવિહારઞાણનિદ્દેસવણ્ણના • 43. Padesavihārañāṇaniddesavaṇṇanā
