| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૨. પદુમઙ્ગપઞ્હો
2. Padumaṅgapañho
૨. ‘‘ભન્તે નાગસેન, ‘પદુમસ્સ તીણિ અઙ્ગાનિ ગહેતબ્બાની’તિ યં વદેસિ, કતમાનિ તાનિ તીણિ અઙ્ગાનિ ગહેતબ્બાની’’તિ ? ‘‘યથા, મહારાજ, પદુમં ઉદકે જાતં ઉદકે સંવદ્ધં અનુપલિત્તં ઉદકેન, એવમેવ ખો, મહારાજ, યોગિના યોગાવચરેન કુલે ગણે લાભે યસે સક્કારે સમ્માનનાય પરિભોગપચ્ચયેસુ ચ સબ્બત્થ અનુપલિત્તેન ભવિતબ્બં. ઇદં, મહારાજ, પદુમસ્સ પઠમં અઙ્ગં ગહેતબ્બં.
2. ‘‘Bhante nāgasena, ‘padumassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti ? ‘‘Yathā, mahārāja, padumaṃ udake jātaṃ udake saṃvaddhaṃ anupalittaṃ udakena, evameva kho, mahārāja, yoginā yogāvacarena kule gaṇe lābhe yase sakkāre sammānanāya paribhogapaccayesu ca sabbattha anupalittena bhavitabbaṃ. Idaṃ, mahārāja, padumassa paṭhamaṃ aṅgaṃ gahetabbaṃ.
‘‘પુન ચપરં, મહારાજ, પદુમં ઉદકા અચ્ચુગ્ગમ્મ ઠાતિ. એવમેવ ખો, મહારાજ, યોગિના યોગાવચરેન સબ્બલોકં અભિભવિત્વા અચ્ચુગ્ગમ્મ લોકુત્તરધમ્મે ઠાતબ્બં. ઇદં, મહારાજ, પદુમસ્સ દુતિયં અઙ્ગં ગહેતબ્બં.
‘‘Puna caparaṃ, mahārāja, padumaṃ udakā accuggamma ṭhāti. Evameva kho, mahārāja, yoginā yogāvacarena sabbalokaṃ abhibhavitvā accuggamma lokuttaradhamme ṭhātabbaṃ. Idaṃ, mahārāja, padumassa dutiyaṃ aṅgaṃ gahetabbaṃ.
‘‘પુન ચપરં, મહારાજ, પદુમં અપ્પમત્તકેનપિ અનિલેન એરિતં ચલતિ. એવમેવ ખો, મહારાજ, યોગિના યોગાવચરેન અપ્પમત્તકેસુપિ કિલેસેસુ સંયમો કરણીયો, ભયદસ્સાવિના વિહરિતબ્બં. ઇદં, મહારાજ, પદુમસ્સ તતિયં અઙ્ગં ગહેતબ્બં. ભાસિતમ્પેતં, મહારાજ, ભગવતા દેવાતિદેવેન ‘અણુમત્તેસુ વજ્જેસુ ભયદસ્સાવી સમાદાય સિક્ખતિ સિક્ખાપદેસૂ’તિ.
‘‘Puna caparaṃ, mahārāja, padumaṃ appamattakenapi anilena eritaṃ calati. Evameva kho, mahārāja, yoginā yogāvacarena appamattakesupi kilesesu saṃyamo karaṇīyo, bhayadassāvinā viharitabbaṃ. Idaṃ, mahārāja, padumassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘aṇumattesu vajjesu bhayadassāvī samādāya sikkhati sikkhāpadesū’ti.
પદુમઙ્ગપઞ્હો દુતિયો.
Padumaṅgapañho dutiyo.
