| Library / Tipiṭaka / તિપિટક • Tipiṭaka / મહાવગ્ગ-અટ્ઠકથા • Mahāvagga-aṭṭhakathā |
પાલિલેય્યકગમનકથા
Pālileyyakagamanakathā
૪૬૭. પાલિલેય્યકે વિહરતિ રક્ખિતવનસણ્ડેતિ પાલિલેય્યકં ઉપનિસ્સાય રક્ખિતવનસણ્ડે વિહરતિ. હત્થિનાગોતિ મહાહત્થી. હત્થિકલભેહીતિ હત્થિપોતકેહિ. હત્થિચ્છાપેહીતિ ખીરૂપકેહિ દહરપોતકેહિ. છિન્નગ્ગાનીતિ તેહિ પુરતો પુરતો ગચ્છન્તેહિ છિન્નગ્ગાનિ ખાયિતાવસેસાનિ ખાણુસદિસાનિ તિણાનિ ખાદતિ. ઓભગ્ગોભગ્ગન્તિ તેન હત્થિનાગેન ઉચ્ચટ્ઠાનતો ભઞ્જિત્વા ભઞ્જિત્વા પાતિતં. અસ્સ સાખાભઙ્ગન્તિ એતસ્સ સન્તકં સાખાભઙ્ગં તે ખાદન્તિ. આવિલાનીતિ તેહિ પઠમતરં ઓતરિત્વા પિવન્તેહિ આલુલિતાનિ કદ્દમોદકાનિ પિવતિ. ઓગાહાતિ તિત્થતો.
467.Pālileyyake viharati rakkhitavanasaṇḍeti pālileyyakaṃ upanissāya rakkhitavanasaṇḍe viharati. Hatthināgoti mahāhatthī. Hatthikalabhehīti hatthipotakehi. Hatthicchāpehīti khīrūpakehi daharapotakehi. Chinnaggānīti tehi purato purato gacchantehi chinnaggāni khāyitāvasesāni khāṇusadisāni tiṇāni khādati. Obhaggobhagganti tena hatthināgena uccaṭṭhānato bhañjitvā bhañjitvā pātitaṃ. Assa sākhābhaṅganti etassa santakaṃ sākhābhaṅgaṃ te khādanti. Āvilānīti tehi paṭhamataraṃ otaritvā pivantehi ālulitāni kaddamodakāni pivati. Ogāhāti titthato.
નાગસ્સ નાગેનાતિ હત્થિનાગસ્સ બુદ્ધનાગેન. ઈસાદન્તસ્સાતિ રથઈસાસદિસદન્તસ્સ. યદેકો રમતી વનેતિ યસ્મા બુદ્ધનાગો વિય અયમ્પિ હત્થિનાગો એકો પવિવિત્તો વને રમતિ; તસ્માસ્સ નાગસ્સ નાગેન ચિત્તં સમેતિ, એકીભાવરતિયા એકસદિસં હોતીતિ અત્થો.
Nāgassa nāgenāti hatthināgassa buddhanāgena. Īsādantassāti rathaīsāsadisadantassa. Yadeko ramatī vaneti yasmā buddhanāgo viya ayampi hatthināgo eko pavivitto vane ramati; tasmāssa nāgassa nāgena cittaṃ sameti, ekībhāvaratiyā ekasadisaṃ hotīti attho.
યથાભિરન્તં વિહરિત્વાતિ એત્થ તેમાસં ભગવા તત્થ વિહાસીતિ વેદિતબ્બો. એત્તાવતા કોસમ્બકેહિ કિર ઉબ્બાળ્હો ભગવા તેમાસં અરઞ્ઞં પવિસિત્વા વસીતિ સબ્બત્થ કથા પત્થટા અહોસિ.
Yathābhirantaṃ viharitvāti ettha temāsaṃ bhagavā tattha vihāsīti veditabbo. Ettāvatā kosambakehi kira ubbāḷho bhagavā temāsaṃ araññaṃ pavisitvā vasīti sabbattha kathā patthaṭā ahosi.
અથ ખો કોસમ્બકા ઉપાસકાતિ અથ ખો ઇમં કથાસલ્લાપં સુત્વા કોસમ્બિવાસિનો ઉપાસકા.
Atha kho kosambakā upāsakāti atha kho imaṃ kathāsallāpaṃ sutvā kosambivāsino upāsakā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવગ્ગપાળિ • Mahāvaggapāḷi / ૨૭૫. પાલિલેય્યકગમનકથા • 275. Pālileyyakagamanakathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / પાલિલેય્યકગમનકથાવણ્ણના • Pālileyyakagamanakathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / પાલિલેય્યકગમનકથાવણ્ણના • Pālileyyakagamanakathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / પાલિલેય્યકગમનકથાવણ્ણના • Pālileyyakagamanakathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૨૭૫. પાલિલેય્યકગમનકથા • 275. Pālileyyakagamanakathā
