Library / Tipiṭaka / તિપિટક • Tipiṭaka / પટિસમ્ભિદામગ્ગપાળિ • Paṭisambhidāmaggapāḷi |
૩૫. પરિનિબ્બાનઞાણનિદ્દેસો
35. Parinibbānañāṇaniddeso
૮૬. કથં સમ્પજાનસ્સ પવત્તપરિયાદાને પઞ્ઞા પરિનિબ્બાને ઞાણં? ઇધ સમ્પજાનો નેક્ખમ્મેન કામચ્છન્દસ્સ પવત્તં પરિયાદિયતિ, અબ્યાપાદેન બ્યાપાદસ્સ પવત્તં પરિયાદિયતિ, આલોકસઞ્ઞાય થિનમિદ્ધસ્સ પવત્તં પરિયાદિયતિ, અવિક્ખેપેન ઉદ્ધચ્ચસ્સ પવત્તં પરિયાદિયતિ, ધમ્મવવત્થાનેન વિચિકિચ્છાય…પે॰… ઞાણેન અવિજ્જાય… પામોજ્જેન અરતિયા … પઠમેન ઝાનેન નીવરણાનં પવત્તં પરિયાદિયતિ…પે॰… અરહત્તમગ્ગેન સબ્બકિલેસાનં પવત્તં પરિયાદિયતિ.
86. Kathaṃ sampajānassa pavattapariyādāne paññā parinibbāne ñāṇaṃ? Idha sampajāno nekkhammena kāmacchandassa pavattaṃ pariyādiyati, abyāpādena byāpādassa pavattaṃ pariyādiyati, ālokasaññāya thinamiddhassa pavattaṃ pariyādiyati, avikkhepena uddhaccassa pavattaṃ pariyādiyati, dhammavavatthānena vicikicchāya…pe… ñāṇena avijjāya… pāmojjena aratiyā … paṭhamena jhānena nīvaraṇānaṃ pavattaṃ pariyādiyati…pe… arahattamaggena sabbakilesānaṃ pavattaṃ pariyādiyati.
અથ વા પન સમ્પજાનસ્સ અનુપાદિસેસાય નિબ્બાનધાતુયા પરિનિબ્બાયન્તસ્સ ઇદઞ્ચેવ ચક્ખુપવત્તં પરિયાદિયતિ, અઞ્ઞઞ્ચ ચક્ખુપવત્તં ન ઉપ્પજ્જતિ. ઇદઞ્ચેવ સોતપવત્તં…પે॰… ઘાનપવત્તં… જિવ્હાપવત્તં… કાયપવત્તં… મનોપવત્તં પરિયાદિયતિ, અઞ્ઞઞ્ચ મનોપવત્તં ન ઉપ્પજ્જતિ. ઇદં સમ્પજાનસ્સ પવત્તપરિયાદાને પઞ્ઞા પરિનિબ્બાને ઞાણં. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘સમ્પજાનસ્સ પવત્તપરિયાદાને પઞ્ઞા પરિનિબ્બાને ઞાણં’’.
Atha vā pana sampajānassa anupādisesāya nibbānadhātuyā parinibbāyantassa idañceva cakkhupavattaṃ pariyādiyati, aññañca cakkhupavattaṃ na uppajjati. Idañceva sotapavattaṃ…pe… ghānapavattaṃ… jivhāpavattaṃ… kāyapavattaṃ… manopavattaṃ pariyādiyati, aññañca manopavattaṃ na uppajjati. Idaṃ sampajānassa pavattapariyādāne paññā parinibbāne ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sampajānassa pavattapariyādāne paññā parinibbāne ñāṇaṃ’’.
પરિનિબ્બાનઞાણનિદ્દેસો પઞ્ચતિંસતિમો.
Parinibbānañāṇaniddeso pañcatiṃsatimo.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / પટિસમ્ભિદામગ્ગ-અટ્ઠકથા • Paṭisambhidāmagga-aṭṭhakathā / ૩૫. પરિનિબ્બાનઞાણનિદ્દેસવણ્ણના • 35. Parinibbānañāṇaniddesavaṇṇanā