| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૯. પઠમમરણસ્સતિસુત્તવણ્ણના
9. Paṭhamamaraṇassatisuttavaṇṇanā
૧૯. નવમે નાતિકેતિ એવંનામકે ગામે. ગિઞ્જકાવસથેતિ ઇટ્ઠકામયે પાસાદે. અમતોગધાતિ નિબ્બાનોગધા, નિબ્બાનપતિટ્ઠાતિ અત્થો. ભાવેથ નોતિ ભાવેથ નુ. મરણસ્સતિન્તિ મરણસ્સતિકમ્મટ્ઠાનં. અહો વતાતિ પત્થનત્થે નિપાતો. બહું વત મે કતં અસ્સાતિ તુમ્હાકં સાસને મમ કિચ્ચં બહુ કતં અસ્સ. તદન્તરન્તિ તં અન્તરં ખણં ઓકાસં. અસ્સસિત્વા વા પસ્સસામીતિ એત્થ અસ્સાસો વુચ્ચતિ અન્તો પવિસનવાતો, પસ્સાસો બહિ નિક્ખમનવાતો. ઇતિ અયં ભિક્ખુ યાવ અન્તો પવિટ્ઠવાતો બહિ નિક્ખમતિ, બહિ નિક્ખન્તો વાતો અન્તો પવિસતિ, તાવ જીવિતં પત્થેન્તો એવમાહ. દન્ધન્તિ મન્દં ગરુકં અસીઘપ્પવત્તં. આસવાનં ખયાયાતિ અરહત્તફલત્થાય. ઇમસ્મિં સુત્તે મરણસ્સતિ અરહત્તં પાપેત્વા કથિતાતિ.
19. Navame nātiketi evaṃnāmake gāme. Giñjakāvasatheti iṭṭhakāmaye pāsāde. Amatogadhāti nibbānogadhā, nibbānapatiṭṭhāti attho. Bhāvetha noti bhāvetha nu. Maraṇassatinti maraṇassatikammaṭṭhānaṃ. Aho vatāti patthanatthe nipāto. Bahuṃvata me kataṃ assāti tumhākaṃ sāsane mama kiccaṃ bahu kataṃ assa. Tadantaranti taṃ antaraṃ khaṇaṃ okāsaṃ. Assasitvā vā passasāmīti ettha assāso vuccati anto pavisanavāto, passāso bahi nikkhamanavāto. Iti ayaṃ bhikkhu yāva anto paviṭṭhavāto bahi nikkhamati, bahi nikkhanto vāto anto pavisati, tāva jīvitaṃ patthento evamāha. Dandhanti mandaṃ garukaṃ asīghappavattaṃ. Āsavānaṃ khayāyāti arahattaphalatthāya. Imasmiṃ sutte maraṇassati arahattaṃ pāpetvā kathitāti.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૯. પઠમમરણસ્સતિસુત્તં • 9. Paṭhamamaraṇassatisuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૯. પઠમમરણસ્સતિસુત્તવણ્ણના • 9. Paṭhamamaraṇassatisuttavaṇṇanā
