| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૩. પેણાહિકઙ્ગપઞ્હો
3. Peṇāhikaṅgapañho
૩. ‘‘ભન્તે નાગસેન, ‘પેણાહિકાય દ્વે અઙ્ગાનિ ગહેતબ્બાની’તિ યં વદેસિ, કતમાનિ તાનિ દ્વે અઙ્ગાનિ ગહેતબ્બાની’’તિ? ‘‘યથા, મહારાજ, પેણાહિકા સકપતિમ્હિ ઉસૂયાય છાપકે ન પોસયતિ, એવમેવ ખો, મહારાજ, યોગિના યોગાવચરેન સકમને 1 કિલેસે ઉપ્પન્ને ઉસૂયાયિતબ્બં, સતિપટ્ઠાનેન સમ્માસંવરસુસિરે પક્ખિપિત્વા મનોદ્વારે કાયગતાસતિ ભાવેતબ્બા. ઇદં, મહારાજ, પેણાહિકાય પઠમં અઙ્ગં ગહેતબ્બં.
3. ‘‘Bhante nāgasena, ‘peṇāhikāya dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, peṇāhikā sakapatimhi usūyāya chāpake na posayati, evameva kho, mahārāja, yoginā yogāvacarena sakamane 2 kilese uppanne usūyāyitabbaṃ, satipaṭṭhānena sammāsaṃvarasusire pakkhipitvā manodvāre kāyagatāsati bhāvetabbā. Idaṃ, mahārāja, peṇāhikāya paṭhamaṃ aṅgaṃ gahetabbaṃ.
‘‘પુન ચપરં, મહારાજ, પેણાહિકા પવને દિવસં ગોચરં ચરિત્વા સાયં પક્ખિગણં ઉપેતિ અત્તનો ગુત્તિયા, એવમેવ ખો, મહારાજ, યોગિના યોગાવચરેન એકકેન પવિવેકં સેવિતબ્બં સંયોજનપરિમુત્તિયા, તત્ર રતિં અલભમાનેન ઉપવાદભયપરિરક્ખણાય સઙ્ઘં ઓસરિત્વા સઙ્ઘરક્ખિતેન વસિતબ્બં. ઇદં, મહારાજ, પેણાહિકાય દુતિયં અઙ્ગં ગહેતબ્બં. ભાસિતમ્પેતં, મહારાજ, બ્રહ્મુના સહમ્પતિના ભગવતો સન્તિકે –
‘‘Puna caparaṃ, mahārāja, peṇāhikā pavane divasaṃ gocaraṃ caritvā sāyaṃ pakkhigaṇaṃ upeti attano guttiyā, evameva kho, mahārāja, yoginā yogāvacarena ekakena pavivekaṃ sevitabbaṃ saṃyojanaparimuttiyā, tatra ratiṃ alabhamānena upavādabhayaparirakkhaṇāya saṅghaṃ osaritvā saṅgharakkhitena vasitabbaṃ. Idaṃ, mahārāja, peṇāhikāya dutiyaṃ aṅgaṃ gahetabbaṃ. Bhāsitampetaṃ, mahārāja, brahmunā sahampatinā bhagavato santike –
‘‘‘સેવેથ પન્તાનિ સેનાસનાનિ, ચરેય્ય સંયોજનવિપ્પમોક્ખા;
‘‘‘Sevetha pantāni senāsanāni, careyya saṃyojanavippamokkhā;
સચે રતિં નાધિગચ્છેય્ય તત્થ, સઙ્ઘે વસે રક્ખિતત્તો સતીમા’’’તિ.
Sace ratiṃ nādhigaccheyya tattha, saṅghe vase rakkhitatto satīmā’’’ti.
પેણાહિકઙ્ગપઞ્હો તતિયો.
Peṇāhikaṅgapañho tatiyo.
Footnotes:
