| Library / Tipiṭaka / તિપિટક • Tipiṭaka / મહાવગ્ગ-અટ્ઠકથા • Mahāvagga-aṭṭhakathā |
રાધબ્રાહ્મણવત્થુકથા
Rādhabrāhmaṇavatthukathā
૬૯. રાધબ્રાહ્મણવત્થુસ્મિં – કિઞ્ચાપિ આયસ્મા સારિપુત્તો ભગવતા બારાણસિયં તીહિ સરણગમનેહિ અનુઞ્ઞાતં પબ્બજ્જઞ્ચેવ ઉપસમ્પદઞ્ચ જાનાતિ, ભગવા પન તં લહુકં ઉપસમ્પદં પટિક્ખિપિત્વા ઞત્તિચતુત્થકમ્મેન ગરુકં કત્વા ઉપસમ્પદં અનુઞ્ઞાતુકામો. અથસ્સ થેરો અજ્ઝાસયં વિદિત્વા ‘‘કથાહં ભન્તે તં બ્રાહ્મણં પબ્બાજેમિ ઉપસમ્પાદેમી’’તિ આહ. બુદ્ધાનઞ્હિ પરિસા અજ્ઝાસયકુસલા હોન્તિ, અયઞ્ચ બુદ્ધપરિસાય અગ્ગો.
69.Rādhabrāhmaṇavatthusmiṃ – kiñcāpi āyasmā sāriputto bhagavatā bārāṇasiyaṃ tīhi saraṇagamanehi anuññātaṃ pabbajjañceva upasampadañca jānāti, bhagavā pana taṃ lahukaṃ upasampadaṃ paṭikkhipitvā ñatticatutthakammena garukaṃ katvā upasampadaṃ anuññātukāmo. Athassa thero ajjhāsayaṃ viditvā ‘‘kathāhaṃ bhante taṃ brāhmaṇaṃ pabbājemi upasampādemī’’ti āha. Buddhānañhi parisā ajjhāsayakusalā honti, ayañca buddhaparisāya aggo.
બ્યત્તેન ભિક્ખુના પટિબલેનાતિ એત્થ બ્યત્તો નામ યસ્સ સાટ્ઠકથં વિનયપિટકં વાચુગ્ગતં પવત્તતિ, તસ્મિં અસતિ યસ્સ અન્તમસો ઇદં ઞત્તિચતુત્થકમ્મવાચામત્તમ્પિ સુગ્ગહિતં હોતિ, વાચુગ્ગતં પવત્તતિ, અયમ્પિ ઇમસ્મિં અત્થે બ્યત્તો. યો પન કાસસોસસેમ્હાદિના વા ગેલઞ્ઞેન ઓટ્ઠદન્તજિવ્હાદીનં વા અસમ્પત્તિયા પરિયત્તિયં વા અકતપરિચયત્તા ન સક્કોતિ પરિમણ્ડલેહિ પદબ્યઞ્જનેહિ કમ્મવાચં સાવેતું, બ્યઞ્જનં વા પદં વા હાપેતિ, અઞ્ઞથા વા વત્તબ્બં અઞ્ઞથા વદતિ, અયં અપ્પટિબલો. તબ્બિપરીતો ઇમસ્મિં અત્થે ‘‘પટિબલો’’તિ વેદિતબ્બો. સઙ્ઘો ઞાપેતબ્બોતિ સઙ્ઘો જાનાપેતબ્બો. તતો પરં યં સઙ્ઘો જાનાપેતબ્બો, તં દસ્સેતું ‘‘સુણાતુ મે ભન્તે’’તિઆદિમાહ.
Byattena bhikkhunā paṭibalenāti ettha byatto nāma yassa sāṭṭhakathaṃ vinayapiṭakaṃ vācuggataṃ pavattati, tasmiṃ asati yassa antamaso idaṃ ñatticatutthakammavācāmattampi suggahitaṃ hoti, vācuggataṃ pavattati, ayampi imasmiṃ atthe byatto. Yo pana kāsasosasemhādinā vā gelaññena oṭṭhadantajivhādīnaṃ vā asampattiyā pariyattiyaṃ vā akataparicayattā na sakkoti parimaṇḍalehi padabyañjanehi kammavācaṃ sāvetuṃ, byañjanaṃ vā padaṃ vā hāpeti, aññathā vā vattabbaṃ aññathā vadati, ayaṃ appaṭibalo. Tabbiparīto imasmiṃ atthe ‘‘paṭibalo’’ti veditabbo. Saṅgho ñāpetabboti saṅgho jānāpetabbo. Tato paraṃ yaṃ saṅgho jānāpetabbo, taṃ dassetuṃ ‘‘suṇātu me bhante’’tiādimāha.
૭૧. ઉપસમ્પન્નસમનન્તરાતિ ઉપસમ્પન્નો હુત્વા સમનન્તરા. અનાચારં આચરતીતિ પણ્ણત્તિવીતિક્કમં કરોતિ. ઉલ્લુમ્પતુ મન્તિ ઉદ્ધરતુ મં, અકુસલા વુટ્ઠાપેત્વા કુસલે પતિટ્ઠપેતુ; સામણેરભાવા વા ઉદ્ધરિત્વા ભિક્ખુભાવે પતિટ્ઠાપેતૂતિ. અનુકમ્પં ઉપાદાયાતિ અનુદ્દયં પટિચ્ચ; મયિ અનુકપ્પં કત્વાતિ અત્થો.
71.Upasampannasamanantarāti upasampanno hutvā samanantarā. Anācāraṃ ācaratīti paṇṇattivītikkamaṃ karoti. Ullumpatu manti uddharatu maṃ, akusalā vuṭṭhāpetvā kusale patiṭṭhapetu; sāmaṇerabhāvā vā uddharitvā bhikkhubhāve patiṭṭhāpetūti. Anukampaṃ upādāyāti anuddayaṃ paṭicca; mayi anukappaṃ katvāti attho.
૭૩. અટ્ઠિતા હોતીતિ નિચ્ચપ્પવત્તિની હોતિ. ચત્તારો નિસ્સયેતિ ચત્તારો પચ્ચયે. યસ્મા ચત્તારો પચ્ચયે નિસ્સાય અત્તભાવો પવત્તતિ, તસ્મા તે નિસ્સયાતિ વુચ્ચન્તિ.
73.Aṭṭhitā hotīti niccappavattinī hoti. Cattāro nissayeti cattāro paccaye. Yasmā cattāro paccaye nissāya attabhāvo pavattati, tasmā te nissayāti vuccanti.
રાધબ્રાહ્મણવત્થુકથા નિટ્ઠિતા.
Rādhabrāhmaṇavatthukathā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવગ્ગપાળિ • Mahāvaggapāḷi / ૧૭. પણામિતકથા • 17. Paṇāmitakathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / રાધબ્રાહ્મણવત્થુકથાવણ્ણના • Rādhabrāhmaṇavatthukathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / રાધબ્રાહ્મણવત્થુકથાવણ્ણના • Rādhabrāhmaṇavatthukathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / રાધબ્રાહ્મણવત્થુકથાવણ્ણના • Rādhabrāhmaṇavatthukathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / રાધબ્રાહ્મણવત્થુકથા • Rādhabrāhmaṇavatthukathā
