| Library / Tipiṭaka / તિપિટક • Tipiṭaka / કઙ્ખાવિતરણી-અભિનવ-ટીકા • Kaṅkhāvitaraṇī-abhinava-ṭīkā |
અસાધારણપારાજિકં
Asādhāraṇapārājikaṃ
૫. ઉબ્ભજાણુમણ્ડલસિક્ખાપદવણ્ણના
5. Ubbhajāṇumaṇḍalasikkhāpadavaṇṇanā
ઉબ્ભકપ્પરન્તિ દુતિયમહાસન્ધિતો ઉદ્ધં. ઇતો ચિતો ચ સઞ્ચરણન્તિ હત્થસ્સ વા કાયસ્સ વા તિરિયં ઇતો ચિતો ચ સઞ્ચરણં.
Ubbhakapparanti dutiyamahāsandhito uddhaṃ. Ito cito ca sañcaraṇanti hatthassa vā kāyassa vā tiriyaṃ ito cito ca sañcaraṇaṃ.
એકતોઅવસ્સુતેતિ (પાચિ॰ અટ્ઠ॰ ૬૬૨) ભિક્ખુનિયા અવસ્સવે, ભિક્ખુનિયા કાયસંસગ્ગરાગેન અવસ્સુતભાવે સતીતિ અત્થો. ભિક્ખુનિયા વસેનેવ ચ એકતોઅવસ્સુતભાવો ગહેતબ્બો. વુત્તઞ્હેતં સમન્તપાસાદિકાયં (પાચિ॰ અટ્ઠ॰ ૬૬૨) –
Ekatoavassuteti (pāci. aṭṭha. 662) bhikkhuniyā avassave, bhikkhuniyā kāyasaṃsaggarāgena avassutabhāve satīti attho. Bhikkhuniyā vaseneva ca ekatoavassutabhāvo gahetabbo. Vuttañhetaṃ samantapāsādikāyaṃ (pāci. aṭṭha. 662) –
‘‘એકતોઅવસ્સુતેતિ એત્થ કિઞ્ચાપિ ‘એકતો’તિ અવિસેસેન વુત્તં, તથાપિ ભિક્ખુનિયા એવ અવસ્સુતે સતિ અયં આપત્તિભેદો વુત્તોતિ વેદિતબ્બો’’તિ.
‘‘Ekatoavassuteti ettha kiñcāpi ‘ekato’ti avisesena vuttaṃ, tathāpi bhikkhuniyā eva avassute sati ayaṃ āpattibhedo vuttoti veditabbo’’ti.
પુરિસસ્સ કાયન્તિ પુરિસસ્સ યં કઞ્ચિ કાયં. ઉભતોઅવસ્સુતેપીતિ ભિક્ખુનિયા ચેવ પુરિસસ્સ ચ કાયસંસગ્ગરાગેન અવસ્સુતભાવે સતિપિ. કાયેનાતિ યથાપરિચ્છિન્નેન અત્તનો કાયેન. કાયપ્પટિબદ્ધન્તિ પુરિસસ્સ કાયપ્પટિબદ્ધં. અવસેસકાયેન વાતિ યથાપરિચ્છિન્નકાયતો અવસેસેન કાયેન, ઉબ્ભક્ખકઅધોજાણુમણ્ડલઅધોકપ્પરસઙ્ખાતેન કાયેનાતિ વુત્તં હોતિ. તસ્સ કાયન્તિ અવસ્સુતસ્સ તસ્સ પુરિસસ્સ યં કઞ્ચિ કાયં. યથા ચેત્થ સયં આમસન્તિયા થુલ્લચ્ચયં, એવં તસ્સ આમસનં સાદિયન્તિયાપીતિ દટ્ઠબ્બં. પુરિસસ્સ કાયસંસગ્ગરાગો નત્થીતિ પુરિસસ્સ મેથુનરાગો, ગેહસિતપેમં, સુદ્ધચિત્તં વા. અવસેસેતિ પારાજિકખેત્તતો અવસેસે. કાયપ્પટિબદ્ધેન કાયપ્પટિબદ્ધાદિભેદેતિ ‘‘કાયપ્પટિબદ્ધેન કાયપ્પટિબદ્ધં આમસતિ, આપત્તિ દુક્કટસ્સા’’તિઆદિકે (પાચિ॰ ૬૫૯, ૬૬૨) સબ્બવારે. ‘‘અસઞ્ચિચ્ચા’’તિઆદીસુ વિરજ્ઝિત્વા વા આમસન્તિયા, અઞ્ઞવિહિતાય વા, ‘‘અયં પુરિસો’’તિ વા ‘‘ઇત્થી’’તિ વા અજાનન્તિયા વા, તેન ફુટ્ઠાયપિ તં ફસ્સં અસ્સાદયન્તિયા વા આમસનેપિ સતિ અનાપત્તિ.
Purisassa kāyanti purisassa yaṃ kañci kāyaṃ. Ubhatoavassutepīti bhikkhuniyā ceva purisassa ca kāyasaṃsaggarāgena avassutabhāve satipi. Kāyenāti yathāparicchinnena attano kāyena. Kāyappaṭibaddhanti purisassa kāyappaṭibaddhaṃ. Avasesakāyena vāti yathāparicchinnakāyato avasesena kāyena, ubbhakkhakaadhojāṇumaṇḍalaadhokapparasaṅkhātena kāyenāti vuttaṃ hoti. Tassa kāyanti avassutassa tassa purisassa yaṃ kañci kāyaṃ. Yathā cettha sayaṃ āmasantiyā thullaccayaṃ, evaṃ tassa āmasanaṃ sādiyantiyāpīti daṭṭhabbaṃ. Purisassa kāyasaṃsaggarāgo natthīti purisassa methunarāgo, gehasitapemaṃ, suddhacittaṃ vā. Avaseseti pārājikakhettato avasese. Kāyappaṭibaddhena kāyappaṭibaddhādibhedeti ‘‘kāyappaṭibaddhena kāyappaṭibaddhaṃ āmasati, āpatti dukkaṭassā’’tiādike (pāci. 659, 662) sabbavāre. ‘‘Asañciccā’’tiādīsu virajjhitvā vā āmasantiyā, aññavihitāya vā, ‘‘ayaṃ puriso’’ti vā ‘‘itthī’’ti vā ajānantiyā vā, tena phuṭṭhāyapi taṃ phassaṃ assādayantiyā vā āmasanepi sati anāpatti.
ઉબ્ભજાણુમણ્ડલસિક્ખાપદવણ્ણના નિટ્ઠિતા.
Ubbhajāṇumaṇḍalasikkhāpadavaṇṇanā niṭṭhitā.
