| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૯. ઉદાયીસુત્તવણ્ણના
9. Udāyīsuttavaṇṇanā
૧૫૯. નવમે અનુપુબ્બિં કથં કથેસ્સામીતિ દાનાનન્તરં સીલં, સીલાનન્તરં સગ્ગન્તિ એવં દેસનાનુપુબ્બિં કથં વા, યં યં સુત્તપદં વા ગાથાપદં વા નિક્ખિત્તં હોતિ, તસ્સ તસ્સ અનુરૂપકથં કથેસ્સામીતિ ચિત્તં ઉપટ્ઠપેત્વા પરેસં ધમ્મો દેસેતબ્બો. પરિયાયદસ્સાવીતિ તસ્સ તસ્સ અત્થસ્સ તં તં કારણં દસ્સેન્તો. કારણઞ્હિ ઇધ પરિયાયોતિ વુત્તં. અનુદ્દયતં પટિચ્ચાતિ ‘‘મહાસમ્બાધપ્પત્તે સત્તે સમ્બાધતો મોચેસ્સામી’’તિ અનુકમ્પં આગમ્મ. ન આમિસન્તરોતિ ન આમિસહેતુકો, અત્તનો ચતુપચ્ચયલાભં અનાસીસન્તોતિ અત્થો. અત્તાનઞ્ચ પરઞ્ચ અનુપહચ્ચાતિ અત્તુક્કંસનપરવમ્ભનાદિવસેન અત્તાનઞ્ચ પરઞ્ચ ગુણુપઘાતેન અનુપહન્ત્વા.
159. Navame anupubbiṃ kathaṃ kathessāmīti dānānantaraṃ sīlaṃ, sīlānantaraṃ sagganti evaṃ desanānupubbiṃ kathaṃ vā, yaṃ yaṃ suttapadaṃ vā gāthāpadaṃ vā nikkhittaṃ hoti, tassa tassa anurūpakathaṃ kathessāmīti cittaṃ upaṭṭhapetvā paresaṃ dhammo desetabbo. Pariyāyadassāvīti tassa tassa atthassa taṃ taṃ kāraṇaṃ dassento. Kāraṇañhi idha pariyāyoti vuttaṃ. Anuddayataṃ paṭiccāti ‘‘mahāsambādhappatte satte sambādhato mocessāmī’’ti anukampaṃ āgamma. Na āmisantaroti na āmisahetuko, attano catupaccayalābhaṃ anāsīsantoti attho. Attānañca parañca anupahaccāti attukkaṃsanaparavambhanādivasena attānañca parañca guṇupaghātena anupahantvā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૯. ઉદાયીસુત્તં • 9. Udāyīsuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / (૧૬) ૧. સદ્ધમ્મવગ્ગો • (16) 1. Saddhammavaggo
