| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૭. વંસઙ્ગપઞ્હો
7. Vaṃsaṅgapañho
૭. ‘‘ભન્તે નાગસેન, ‘વંસસ્સ એકં અઙ્ગં ગહેતબ્બ’ન્તિ યં વદેસિ, કતમં તં એકં અઙ્ગં ગહેતબ્બ’’ન્તિ? ‘‘યથા, મહારાજ, વંસો યત્થ વાતો, તત્થ અનુલોમેતિ, નાઞ્ઞત્થમનુધાવતિ, એવમેવ ખો, મહારાજ, યોગિના યોગાવચરેન યં બુદ્ધેન ભગવતા ભાસિતં નવઙ્ગં સત્થુ સાસનં, તં અનુલોમયિત્વા કપ્પિયે અનવજ્જે ઠત્વા સમણધમ્મં યેવ પરિયેસિતબ્બં. ઇદં, મહારાજ, વંસસ્સ એકં અઙ્ગં ગહેતબ્બં. ભાસિતમ્પેતં મહારાજ થેરેન રાહુલેન –
7. ‘‘Bhante nāgasena, ‘vaṃsassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, vaṃso yattha vāto, tattha anulometi, nāññatthamanudhāvati, evameva kho, mahārāja, yoginā yogāvacarena yaṃ buddhena bhagavatā bhāsitaṃ navaṅgaṃ satthu sāsanaṃ, taṃ anulomayitvā kappiye anavajje ṭhatvā samaṇadhammaṃ yeva pariyesitabbaṃ. Idaṃ, mahārāja, vaṃsassa ekaṃ aṅgaṃ gahetabbaṃ. Bhāsitampetaṃ mahārāja therena rāhulena –
‘‘‘નવઙ્ગં બુદ્ધવચનં, અનુલોમેત્વાન સબ્બદા;
‘‘‘Navaṅgaṃ buddhavacanaṃ, anulometvāna sabbadā;
કપ્પિયે અનવજ્જસ્મિં, ઠત્વાપાયં સમુત્તરિ’’’ન્તિ.
Kappiye anavajjasmiṃ, ṭhatvāpāyaṃ samuttari’’’nti.
વંસઙ્ગપઞ્હો સત્તમો.
Vaṃsaṅgapañho sattamo.
