| Library / Tipiṭaka / તિપિટક • Tipiṭaka / કઙ્ખાવિતરણી-અભિનવ-ટીકા • Kaṅkhāvitaraṇī-abhinava-ṭīkā |
૩. વિકાલગામપ્પવેસનસિક્ખાપદવણ્ણના
3. Vikālagāmappavesanasikkhāpadavaṇṇanā
ચારિત્તેતિ ચારિત્તસિક્ખાપદે. ઉપચારન્તિ દુતિયલેડ્ડુપાતં. અઞ્ઞં ગામં ગચ્છન્તાનં પુન આપુચ્છનકિચ્ચં નત્થીતિ ઉસ્સાહં અપ્પટિપ્પસ્સમ્ભેત્વા અઞ્ઞં ગામં ગચ્છન્તાનં ગામસતમ્પિ હોતુ, પુન આપુચ્છનકિચ્ચં નત્થીતિ અત્થો. તેનાહ ‘‘સચે પના’’તિઆદિ. ઉસ્સાહન્તિ ગામપ્પવિસનુસ્સાહં. અન્તરારામાદીસુ (પાચિ॰ અટ્ઠ॰ ૫૧૫) ન કેવલં અનાપુચ્છા ગચ્છન્તસ્સેવ, કાયબન્ધનં અબન્ધિત્વા સઙ્ઘાટિં અપારુપિત્વા ગચ્છન્તસ્સાપિ અનાપત્તિ. આપદાસૂતિ સીહો વા બ્યગ્ઘો વા આગચ્છતિ, મેઘો વા ઉટ્ઠેતિ, અઞ્ઞો વા કોચિ ઉપદ્દવો ઉપ્પજ્જતિ , અનાપત્તિ. એવરૂપાસુ આપદાસુ બહિગામતો અન્તોગામં પવિસિતું વટ્ટતિ.
Cāritteti cārittasikkhāpade. Upacāranti dutiyaleḍḍupātaṃ. Aññaṃ gāmaṃ gacchantānaṃ puna āpucchanakiccaṃ natthīti ussāhaṃ appaṭippassambhetvā aññaṃ gāmaṃ gacchantānaṃ gāmasatampi hotu, puna āpucchanakiccaṃ natthīti attho. Tenāha ‘‘sace panā’’tiādi. Ussāhanti gāmappavisanussāhaṃ. Antarārāmādīsu (pāci. aṭṭha. 515) na kevalaṃ anāpucchā gacchantasseva, kāyabandhanaṃ abandhitvā saṅghāṭiṃ apārupitvā gacchantassāpi anāpatti. Āpadāsūti sīho vā byaggho vā āgacchati, megho vā uṭṭheti, añño vā koci upaddavo uppajjati , anāpatti. Evarūpāsu āpadāsu bahigāmato antogāmaṃ pavisituṃ vaṭṭati.
વિકાલગામપ્પવેસનસિક્ખાપદવણ્ણના નિટ્ઠિતા.
Vikālagāmappavesanasikkhāpadavaṇṇanā niṭṭhitā.
